Анатолий Ушаков кема аръёс ӵоже культура удысын тыршыса ужаз. Со вал автоклублэн заведующиез. Соку поглянъёс вылын клуб толэзяз дас кык пол кыдёкысь гуртъёсы поталляз. Ӵукна уже лыктыса, Толя нырысь ик тодылӥз кытчы потонзэ. Собере артистъёсызлы быгатозы-а потыны шуыса жингыртылӥз. Соослэн кузёоссылы куронъёс дасялляз, ужысь мед лэзёзы шуыса, отчы райкомын яке исполкомын печать пуктытъяз но ужан интыосазы нулдӥз. Дас час котырын агитбригада кулэ интые потыны дась луэ ни вал. Ёросын одӥг ферма но, мастерской но, бригадной контора но, ю куасьтон интыос но, бусыос но солы тодмотэм ӧй вал. Ужась калык котькытын шумпотыса агитбригадаез пумиталляз, ог 15-20 минут котьку дыр шедьтылӥз шутэтскыны, кырӟанъёс кылзыны, эктонъёс учкыны, но тужгес но шунытэн пумиталлязы Анатолий Ушаковлэсь маскара верамъёссцэ, анекдотъёссэ. Ӝытпал, клубе бертыса, со нырысь ик басьтӥське вал выль вуэм газетъёс борды. Тужгес но яратӥз "Советской Удмуртиез", "Алнаш колхозникез", соосын юн кусып возьылӥз. "Алнаш колхозник" -лэн редакцияз ужам мурт та газетъёсы ачиз но трос ивортонъёс лэзьяз, умой ужасьёс, самодеятельносте ветлӥсьёс сярысь зарисовкаос гожьяз.
Мылысь-кыдысь пыриське вал обшественной уже но. Трос пол сое Алнаш сельсоветэ депутатэ бырйылӥзы. Комсомоллэн райкомаз ужасьёслы пӧртэм ужрадъёс ортчытъяны уно юрттӥськиз, концертной но валэктон нуись огазеяськонъёсы пыриськиз. Калыкен вераськыны, одӥг кыл шедьтыны быгатэмезлы луыса, сое пӧртэм ужрадъёсы ӧтьылӥзы.
1975-1977-тӥ аръёсы самодеятельной художественной творчествоя Всесоюзной фестиваль ортчиз. Алнашысь калык театр (1974-тӥ арын солы сыӵе ним сётэмын вал) В. Садовниковлэсь "Сюан" комедизэ отчы дасяны кутскиз. Репетициосын кема вырим удмурт калыклэсь маскаръяськон, со дыре ик лэчыт но шудон пыр визьмо луэмзэ, туссэ но шӧмзэ шедьтыны (театральной терминологиен вераса со "атмосфера спектакля" шуиське). Огпол Толя бертэм дыръяз (соку со Ленинградын эстрадной искусствоосъя творческой мастерскойын дышетске ни вал) репетицие пыриз, кияз арган кутӥз, пӧртэм удмурт гуръёсты шудыны кутскиз: эктон, такмак, сюан но мукет. Шудӥсьёслэн соку ик мылкыдзы воштӥськиз, спектакльлэн шӧмыз но сюриз (атмосфераез). Озьы Анатолий Ушаков коллективлы творческой вормонъёс но кузь сюрес сӥзиз кадь. Та спектакль берло луиз Всесоюзной фестивальлэн нырысетӥ степенё дипломантэз.
Толя котькытын но арганзэ кутыса, такмакъёсын, удмурт кырӟанъёсын но эктон гуръёсын мылкыдэз ӝутылӥз, калыкез огазеяз. Гуртын будэм адями яратэ но быгатэ вал шулдыръяськыны. Со пиналъёсын но, мӧйы адямиосын но ассэ оградэ пуктылӥз. Кожалод, соосын со туж тодмо эшъёс луэ. Пересьёслэсь вераськон манерзэс, лэчыт веранъёссэс, маскара учыръёссэс кылзыны яратылӥз. Соин но, дыр, вань серемес веранъёсыз, анекдотъёсыз сач-сач удмурт кылъёсын, валанъёсын, серемес учыръёсын, кушем но калыкысь потэм маскара нимъёсын тырмытэмын. Лёгор, Котныр Санька, Матрон но мукет нимъёс солэн веранъёсаз валтӥсь геройёс луизы.
Клубын уж – коллективной уж. Ӵош ужатэк, ог-огедлы юрттӥськытэк уг луы. Толя пыриське вал пиослэн ансамблязы, хоре, эктонъя кружоке, арганэн шудэм улсаз такмаъёс кырӟаз, концертъёсты но мукет ужрадъёсты умой нуылӥз, сценкаосын тунсыко шудылӥз. Тодэ лыктэ Толя Ивановен огшоры гинэ одӥг таӵе ваче вераськонзы:
- Алё, алё….
- Кылзӥсько…
- Сельхозтехника-а?
- Озьы.
- Михалыч, тон-а?
- Мон.
-"Звезда" колхозысь та, Петров.
- Кылзӥсько…
- Юрттӥськыны быгатод-а? Запчасть кулэ вал, трактор сылэ….
- Уг кылӥськы… Умой вера…
- Запчасть, шуисько, кулэ, - куаразэ бадӟым карыса вера.
- Номырзэ уг валаськы…
- Запчасть, шуисько…! - куаразэ эшшо но бадӟым карыса вера
- Валамонгес вера...
- Верасько букваосын: зверобой…, анисовой…, померанцевой…, черносливовой…, аперетив….
- А-а-а…валай, валай… лыктэлэ. Сюроз.
Со дыре талэсь мургес адрестэм сатира лэсьтыны уг луы вал, дыр. Шудӥсьёс таӵе луонлыклы но туж шумпотылӥзы. Нош учкись вала вал мар котырын улон берга. Берло Толя ачиз но маскара веранъёс гожъяны кутскиз.
Чорыган - со Толялы сиён шедьтон гинэ ӧй вал. Татчы сое золгес кыскиз, дыр, романтика: ӵукна вазь султон, сайкась инкуазез адӟон, соку гинэ калык иземысь султон вакытэ шур дурысь бертон… Бускелез туж чорыганы яратэ вал. Солэсь адӟем кариз Толя но. Басьтӥз но дасяз визнан тӥрлык, шур дуре ветлыны велик шедьтӥз. Гужем ньыль час котырын чорыганы кошке вал. Огпол сьӧраз монэ но нуиз, визнан тӥрлык бичаны юрттӥськиз, колӟолэсь чорыглы алдан сиён дасяны валэктӥз. Мынӥм. Инкуазь сайканы кутскиз: огез сьӧры мукетыз куаразэс сётыны кутскизы тылобурдоос, паймымон буёло шунды каллен возьматӥськиз. Интыяським тодмо интыяз. Чорыгъёс мед лыктозы шуыса, Толя вуэ пазьгиз ваем сиёнзэ, куштӥз визнанъёссэ. Озьы ик кари мон но. Но кык-куинь чорыг сяна кутэме ӧз луы, интымес но ог-огенымы воштыса турттӥм. Дышетӥсе нош поттаз но поттаз. Гуртысь капка ӟукыртэмьёс но пудолэн куараоссы кылӥськыны кутскем бере, бертоно луиз, калыкен ӵош уже мыноно.
Алнашын артистъёстыз яратэмзы но Ушаковез сӥлы каремзы та учыр но вера. Одӥг пол сӥльлы вандон вылысь базарысь така басьтӥм. Котькыӵе ужез Толя ачиз лэсьтыны тырше вал бере, вандыны быгатом шуиз. Нокинэ ӧм ӧте. Кузэ ниыкумы 4-5 пась лэсьтӥмы, нош сыӵе куэз заготовительёс туж дунтэм басьто. Озьы ке но, нуоно кариським. Милемын ӵош ик така басьтӥз вал Алнашысь одӥг туж тодмо адями но. Заготовитель доры ӵош учырам. Солэн куаз одӥг пасез но ӧвӧл, ӵышкыса ваемын. Куосмес специалист кема-а-а бергатыса учкиз. Малпаськем бераз милемлы куинь манет но куатьтон копейка уксё сётӥз, нош тодмомылы – витьтон копейка. Калыкын ветлӥсь валютаен лыдъяса, со милемлы ӵапак одӥг ӟенэликлы тырмиз.
Шуг вераны мар бордысь потэ вордӥськем интыдэ гажан но яратон. Пӧртэм чыры-пырыос бордысь гинэ но, дыр. Толя туж ушья вал удмурт сиён-юонэз, шу кисалез, пыжиськемъёсты, уката но пельнянез, кудӥзлэн одӥг палыз пась кельтэмын но отчы пӧзем лым пыремын ке. Семьяын эше тужгес но кылзӥське вал анаезлэсь, атаез уго шыпытгес вал. Юмшанъёсын но мукет люкаськонъёсын анаез (сое нэнэй шуылӥз) кырӟаны яратэ вылэм. Тодмо кырӟанлэн кылъёсыз быро ке, ачиз малпаса азьланьтылэм. Оло Толя со выжыегес мынэм? Эше котьку но дораз юрттӥськыны бертаз: картошка мерттыны но октыны, турын утялтыны но мукет ужъёс лэсьтыны.
Вордӥськем ёросэз сярысь умой малпанъёсын гинэ улӥз. "Данъясько алнаш музъемез но калыкез", - шуэ вал со сцена вылысен адямиен тырмытэм залъёсын. Нош мар ке умойтэмзэ кылэ ке, ӝожоме вал. Ёросэ гастрольёсы ветлыкуз таӵе верамзэ тодэ вайисько: "Эшъёсылэсь возьдаськисько. Клубъёсын кезьыт, пеймыт. Алнаше лыктыкум лампочкаос но сьӧрам вайисько. Ужасьёс чай гинэ но уг пӧсято. Мукет ёросъёсын чылкак мукет югдур…".
Ми тодматскыку Толя кышнояськемын вал ни. Бадӟымез Таня вӧзы егит атайлэн вордӥськизы на аслаз нылпиосыз - Лена но Алёша. Улон интызы баракын туж ӟоскыт вал, ужан интызылэсь кыдёкын, урамзы сӥзьыл но тулыс ветлыны луонтэм дэри. Берло куинь висъетъем огъя улонни коркан квартира сётӥзы. Нуны утисьсы ӧй вал бере, нылпиоссэс ӝыт репетициосы но ортчись ужрадъёсы сьӧразы нулдӥзы.
Толялы Алнашын ёркыт луыны кутскиз. Тужгес но уж дораз. Сюлэмыз, валанэз, быгатонлыкез куриськизы вӧл-вӧл паськыт но мур творческой ӧре. Соин ик Н. С. Зубковлэн, соку филармониысь художественной кивалтӥсьлэн, ужаны ӧтемезлы шум гинэ потӥз. Нокыӵе пыкет но возьыны ӧз ни быгаты. Отысен сое Ленинградэ дышетскы лэзизы. Ленинградэ кошкемез бераз, нылпиосыз туж мӧзмизы, балконэ потыса возьмаллязы.
Анатолий Ушаков филармониын ужаны кутскем бере, сцена вылэ ӵошен одӥг пол сяна потаны ӧз ни кылды. Со вал Москваын. Ми, Алнаш музейысь коллектив, ӧтемын вал Венгер культурая центре удмурт сям-йылолъёсыз возьматыны. Нош ӝытаз нуизы Москваысь тылпуэн нюръяськонъя валтӥсь кивалтэтэ. Отын но, пе, трос удмуртъёс службазэс ортчыто. Татысен ми пумиським "Шулдыр ӝыт" ансамблен. Одӥг интые ик кӧлыны интыяським. Кема пукимы Толяен вераськыса, шулдыр дыръёсмес тодэ вайыса. Отысен ик нырысьссэ адӟи удмурт кырӟасьёс пӧлын шер пумиськылӥсь меццо-сопрано куараен кырӟась, веськрес мугоро, сцена вылын ассэ синмаськымон возись артисткаез Галина Платоноваез.
Огпол Толя телефон пыр мыным жингыртӥз но шуэ: "Луоз-а Алнашын кӧня ке маскарчиосты люканы? Телепередачае гожтоно вал. Кинэн быгатод, вераськы. Ӵуказе вуо". Озьы ӵуказеяз мон, Николай Постников, Фридрих Загуляев но ачиз Очей Толя Гондыргуртэ Иосиф Бобров доры мынӥмы. Интыяським Иосиф Петровичлэн бакчаяз, ошмес дуре, писпуос улэ. Гожтӥм плёнка вылэ кин мар тодэ но быгатэ вераны. Кыкетӥзэ таӵе передача гожтӥм крезьгуръя школалэн классаз люкаськыса. Отчы пыриськизы В.А. Ильин, В.Л. Конюхов, А.Ф. Шувалов но мукетъёс. Жаляса верано, соку Ижысь телепередачаосты учкыны уг луы вал бере, адӟытэк кылимы. Центральной телевидениын таӵе возьматонъёс акыльтымон мыно. Нош асьме интыысь каналъёсын со чик но ӧвӧл. Толя малпа вал таӵе программа удмурт телевидениын но кылдытыны. Жаляса верано, кӧня ке возьматонъёс ортчем бере, со кысӥз. Мон малпамъя, удмуртъёс пӧлын маскарчиос, анекдот пормытъясьёс, веросчиос но сое калыке поттыны дӥсьтӥсьёс ӧжыт луэмен. Вылаз ик тросэз соос этической куронъёслы уг тупало. Газетъёсын, журналъёсын серемес макеос пумиськыло ик вал. Озьы ке но, бумага вылэ гожтон - со чылкак мукет жанр, уго маскаръяськыса ваньзы азьын шара вераны быгатонлык кулэ на.
Ас удысэзъя туж вылэ ӝутӥськем "мастерлэн" мукет но бадӟым малпанэз вал. Солэн туж потэ вал кылдытэмез студия, кытын ке удмурт маскарчиосты дышетысалзы, соосты сцена вылэ потыны дасясалзы. Толя синйылтыны, визьнод сётыны, вӧзаз кыскыны быгатэ вал таӵе адямиосты. Одӥгез сыӵеос пӧлысь луиз аспал эшез Вячеслав Иванов (сценической нимыз Вячеслав Цветной). Жаляса верано, та малпанзэ быдэстыса ӧз вутты. Но солэсь кутскем ужзэ мукетъёс азьланьтӥзы. "Шулдыр ӝыт" эстрадной коллективлэн кичӧлтэмезъя, филармониын радъямын Анатолий Ушаковлы сӥзем "Маскара" фестиваль. Со огазеяны быгатӥз пӧртэм ёросъёсысь маскарчиосты, шедьтыны но усьтыны та удысын гожъяськисьёсты но сцена вылын шудӥсьёсты. Оскон кылдэ, Анатолий Ушаковлэн та тунсыко искусствоез удмурт культураын профессиональной сюрес вылэ поттэмез азьланьтӥськоз шуыса. Алнаш черкогуртын "Октябрьский" (Колхоз) посёлокын огез урам Анатолий Ушаковлэсь нимзэ нуллэ.
Берлозэ УАССР-ысь но РФ-ысь Дано артистэн, УАССР-лэн Элькун Премиезлэн, "Шулдыр ӝыт" ансамбльлэн кивалтӥсеныз Анатолий Ушаковен пумиським 16-тӥ толсуре 2004-тӥ арын Алнаш РДК-лэн фойеаз. Ӟыгыртӥським. Котьку сямен ик со адӟиськиз сэзь, мыло-кыдо, ужзэ лэсьтыны дыртӥсь, пальпотӥсь. "Дыртӥсько, гастроле лыктом,- шуиз. - Билетъёс вайи. Али Грахе, Кизнере вуоно на. Кема ӧм пумиськылэ ни. Лыктӥ ке пуком, вераськем потэ...". Ӧз кылды.