Котькыӵе удысын тыршиз, вань лэсьтоно ужзэ йылаз-пумаз вуттылӥз. Ас улонзэ, кужымзэ сётӥз но сӥзиз кунмес кылдытонлы, удмуртлыкмес ӝутонлы, соосты кужмоятонлы. Аслыз ачиз оскыса, ас визьмыныз малпаса, котькыӵе удыс борды кышкатэк басьтӥськиз. Татын юан кылдэ: кин сое озьы лэсьтыны косӥз? Ачиз. Малы ке шуоно туж яратӥз вордскем шаерзэ, отын улӥсь удмурт калыксэ. Трос вал пыдзэс пуктӥсьёс. Нош солы со ӧз сётскы, ваньзэ дырыз дыръя чиданы, вормыны тыршиз. Оскиз аслаз кужымезлы, визьмызлы, быгатонлыкезлы, матысь эшъёсызлы. Но малпамезъя, оло, ӧз но луы.
Солэн нимыз трос аръёслы вунэтэмын вал. Улон дыртыса ортче, уг луы сое дугдытыны. Аръёс ортчыса гинэ со сярысь мургес валаны кутскиськод. Тӥни озьы Трофим Борисовлэсь ӟеч нимзэ калыке берыктон (реабилитировать) борды басьтӥськиз Москваын улӥсь военной врач-эксперт Коля агаезлэн пиез, Иван Николаевич Борисов. Мынам анаелы, аслаз пичи сузэрезлы, Чернова Екатерина Николаевналы, кудӥз вань улонзэ улэ вордӥськем гуртаз со тазьы гожтэ: "Катя, мон та улонын ваньзэ адӟи — секытсэ но, курытсэ но, ултӥямзэс но чидай, сютэм улонэз но мар со — тодӥсько. Быдӟым ож но, япон война пыр но потӥ, быдэс кыли. Котькин котьма мед шуоз, мон басьтӥськисько Трокай агаез реабилитировать карон борды". Уж секытэн ке но мынӥз, кӧня ке но со вырӟиз. Кытчы гинэ гожтэтъёс ӧз гожъя Иван Николаевич. Верантэм шуг-секытъёсын пумиськоно луиз та бадӟым уж борды басьтӥськыса. Пӧртэм интыосы гожъяса, кӧня килограмм кагаз быдтэмын. Иван Николаевич нырысь ик куриськонэн вазиськиз СССР‑лэн Москваысь Генеральной Прокуратураяз. Гожтэтэн ӵош Трокай агайлэсь туспуктэмзэ лэзиз но гожтӥз солэсь характеристиказэ, ортчем сюрессэ, лэсьтэм ужъёссэ. Собере Казахстанэ Вылӥ судэ гожтэт ыстэ. Та ужез нуиз КГБ‑ысь подполковник Олег Семенович Горбунов. Со ачиз вуылӥз Москвае но Иван Николаевичен пумиськылӥз. Следствие мынӥз кык ар пала. Кӧня уйёсты ӧз изьы ӵужмуртэ гожтэтъёсты возьмаса, тазалыкез но трослы лябӟиз, ваньзэ сюлэм пыр поттӥз, озьы ке но солэн мылкыдыз ӧз куашка. Гожтэтъёсаз кинэ ке но зол тышкаськылӥз, нош ӟеч иворъёс басьтыкуз, одно ик тау карыса гожтэтъёс лэзьылӥз. Трос гожъямъёс вуылӥзы Казахстанысь Вылӥ судысь но отын огвыллем чуръёс вал: "Реабилитировать карыны уг луы, ӧвӧл уголовной ужез". Гожтэм чуръёсын Иван Николаевич соглаш ӧз луылы, сюлмыз ӧз буйга. Берпуметӥ гожтэтаз вожез потыса ик таӵе чуръёс гожтӥз: "Кыӵе ке но документъёсыз луыны кулэ. Тӥляд утчамды уг поты, жаляськоды асьтэлэсь ужасьёстэс, кудъёсыз ыштӥзы уголовной ужзэ". Таӵе кылъёс ик юрттӥзы, лэся, Т. Борисовлэсь судебной ужзэ шедьтыны. Со шараяськиз Казахстанысь Вылӥ (Верховной) судлэн лушкем архивысьтыз. 1987-тӥ арын январь толэзе Иван Николаевичлы сыӵе справка-кагаз вуэ, кытын гожтэмын вал Трофим Кузьмич Борисов янгыш ӧвӧл шуыса. Та ужез Генеральной прокуратураысь прокурор Юрий Иванович Седов чакласа возиз, вань кагазъёсты тупен-тупен эскериз. Собере ини шонере поттон сярысь берпуметӥ справка-кагаз 1989-тӥ арын 20-тӥ октябре вуиз. Отын таӵе чуръёс гожтэмын:
Справка
Постановлением Пленума Верховного Суда СССР от 20 сентября 1989 г. приговор народного суда 3 участка г. Чимкета от 7 мая 1940 г. и все последующие судебные решения в отношении Борисова Трофима Кузьмича, 1891 г. рождения, отменены и дело о нём прекращено за отсутствием в его действиях состава преступления. Борисов Т. К. по настоящему делу реабилитирован.
Секретарь Пленума, член Верховного Суда СССР Р. К. Бризе.
Трокайлэн нимыз дауръёс ӵоже улоз
Трос аръёс ӵоже шуг-секытъёс пыр потыса, Иван Николаевич ваньзэ вормиз, каньылэн шокчиз. Нош вань бичам ӟеч иворъёсты, справкаосты Алнаш ёросэ, вордӥськем гуртаз ксерокопировать карыса, сузэрезлы лэзьяз. Озьы милям ваньзэ огазе люкаса, быдэс зӧк папка кылдӥз. Со ваньмыз туннэ нуналозь утемын. Тросэз соос нокытын поттэмын но нокинэн адӟемын ӧвӧл. Анае ас мылкыд каремезъя 1979-тӥ арысен газетъёсын потэм вань гожтэмъёсты люканы кутскиз. Али милям вить папкаосын люкаськем материалъёсмы ни. 2011-тӥ арын Вениамин Ившинлэн "Т. К. Борисов: жив — лишенный жизни" ("Быдтӥзы ке но — улэп") книгаез потӥз, отчы архивысьтымы лэзем справкаос, гожтэмъёс, ваньзэ-ӧвӧлзэ — 6 статьяос пыртэмын. Нош аспал эшъёсмылэн Лидия Нянькиналэн но Мария Петровалэн "Сюлмы бӧрдэ, сюлмы кырӟа" книгаязы тросэз туспуктэмъёс но озьы ик милям архивысьтымы кутэмын.
Иван Николаевич сузэрезлы трос гинэ гожтэтъёс гожъяз. Тазьы но гожтэмез вань: "Катя, не бросай мои письма, в дальнейшем они тебе очень пригодятся". Шонер гожтэм. Анае солэсь кылзӥськем. Гожтэтъёсыз синвутэк лыдӟыны уг луы. Со история. Аслаз но Иван Николаевичлэн трос вал архивной материалъёсыз, оригиналъёсыз.
Нош кызьы Актюбинскысь сюй вуиз дорамы? Таиз но Иван Николаевичлэн ужез. Со нырысь ик вазиськем Актюбинскысь прокуратурае Трокай агайлэсь ватэм интызэ юаса. Та пумысен областьысь прокурорлэн нырысетӥ воштӥсез В. Чернов пыр-поч валэктон ыстӥз: "1989-тӥ арын июль-август толэзьёсы калык Актюбинск котырысь адями лыос но пӧртэм арбериос шедьылыны кутскем пумысен вазиськылӥзы. Малпазы, со 30-тӥ — 50-тӥ аръёсы репрессировать каремъёслэн лысьӧмъёссы шуыса. Мынам кивалтэме улсын эскерон ортчытэмын. Озьы тодмо луиз: адямиос репрессия улэ янгыштэк шедемын, ултӥяса ватэмын. Репрессие пыриськемъёслэн нимтулъёссы шараямын, бӧрысь соос пӧлысь тросэз асьсэос но сыӵе ик адӟонэз адӟизы".
1940-тӥ арын 29-тӥ сентябре Актюбинскысь обисполком Сталин геноцидлэсь чидам муртъёсты выльысен калык радъя ватӥз, памятник пуктӥз. Сопал дуннее кошкемъёс вӧсямын вал, ӝыны даур ортчыса.
Гожтэтэз вӧзы прокурор синпелетлэсь туспуктэмзэ но ватэм интыысьтыз сюйзэ лэзе. Нырысь ик кыдёкысь шаерысь ваем сюй Иван Николаевич доры Москвае вуэ. Собере гинэ сое пичи сузэрезлы, анаелы, вордӥськем гуртаз лэзё. Туннэ нуналозь возиськемын на сюен лэзем посылка ящикез но. Алнаше со сюй 1991-тӥ арын декабрь толэзе ваемын вал. Калыкын веран вань, шайвылысь, пе, сюез юрт котырын возьыны уг яра. Но анае солэсь ӧз кышка. Со Иван Николаевич агаез кадь бадӟым осконэн улӥз: вуоз ай сыӵе нунал, Алнашын синпелет пуктозы. Зэмзэ но, валазы, кылӥзы. Нош шайгу вылысь лэзем сюез анае 2006-тӥ арын 11-тӥ инвожое синпелет усьтыку вӧлдӥз. Трокай агай котьку шуылоз вылэм эшъёсызлы: котькытчы мед кулом-быром, выдыны ас музъем вылам мед выдом. Туж жаляса верано, малпанэз ӧз быдэсмы. Но табере Алнашын но, Ижкарын но синпелетъёс вань. Асьмеос быгатӥськомы солы йыбырттыны, тау карыны ас кунмес, удмурт шаермес кылдытэмез но трос ӟеч ужъёс лэсьтэмез понна.
Мон туж умой тодӥсько на Семён Тарасович Шихаревез. Со ужаз "Алнаш колхозник" газетын корреспондент луыса. Алнашысь Кизегурт пала, Туймы шуре, велосипедэн чорыганы ветлӥз. Бертыкуз пыралляз песятае доры (Николай Кузьмич Борисов, Трокай агайлэн агаез луэ). Кема пукылӥзы вераськыса. Мон соку Кучыран школаын дышетски, йырам но ӧй поны, ӧй кылзӥськы, мар сярысь соос верасько. Коля песятае вера, нош Семен Тарасович аслаз тетрадяз гожъялляз. Нош со чик кышкатэк мадем аслаз пичи выныз сярысь. Со аръёсы нокин но со сярысь ӧз тоды, реабилитировать но каремын ӧй вал, нимтулыз кема аръёслы вунэтэмын. Берло гинэ тодӥ ини, мар сярысь гожъям Семен Тарасович. Аслаз дасям рукописеныз со вуэ Ижкаре, издательствое, книга поттыны курыса. Рукописьёссэ лыдӟыса, кивалтӥсьёс солы шуиллям: улэмед потэ ке, чаляк ват та гожъямдэ. Дыртыса но кышкасагес Шихарев издательствоысь потэ. Гожъямзэ кисыяз поныса, куашкам мылкыдын Алнаше берытске. Нош аслаз йыраз одӥг малпан бергаз: вуоз сыӵе дыр, та гожтэм ужме одно ик калык лыдӟоз. Тӥни озьы, татын но зэмлык вормиз. Семен Тарасовичлэн 1990-тӥ арын "Трокай Борисов" очеркез потэ. Со вал нырысетӥез книга Трофим Борисов сярысь.
1966-тӥ арысен "Советской Удмуртия" газетын но Шихаревлэн статьяез потӥз, кудзэ со гожтӥз Коля песятае доры пыракуз. Со аръёсы тросэз ӧз но тодэ, кин со Трофим Борисов.
1993-тӥ арын Удмурт университетын этнографияя но археологияя факультетын нырысетӥез курсовой уж со сярысь гожтэмын вал. Таӵе уж гожтӥз нылы куинетӥ курсын дышетскыкуз. Соку ужзэ туж вылӥ дунъязы — вить пуктӥзы. Шуизы на, тая кандидатской уж гожтыны луоз. Татын туж юрттӥз Иван Николаевич но. Материалъёс, архивной документъёс трос лэзьяз. Нылылы но уно юанъёс дышетӥсьёс сёткаллям, малы ке шуоно реабилитировать карем дырысен ньыль ар гинэ ортчемын вал ай соку, нимтулзэ ӧз поттылэ.
Асангуртэ мыныку, Туймы шур сьӧрын, гурезь йылын али но огназ сылэ вож кыз. Азьвыл аръёсы та интыын нюлэс вылэм. Борисов агай-вынъёслэн, Павол, Коля но Максим, семьяоссы йылӥзы, гырыны-кизьыны бусы кулэ луиз. Нылпиосынызы но кузпалъёсынызы ваньзы ӵош люкаськыса, асьсэлы бусы тазатӥзы. Анаязы одӥг гинэ кыз кельтӥзы. Гужем пӧсь нуналъёсы, вай улаз пуксьыса ялкаризы. Кыз бадӟым ӧз буды, вайёсыз гинэ пуштресэсь луизы. Аннок апай (Анна Кузьмовна Борисова), пичи сузэрзы, та кызлы сӥзьыса, пичи гинэ кылбур но гожтӥз.
2011-тӥ арын "Мынам Удмуртие" телекомпаниысь ужасьёс, корреспондент Елена Слесарева но режиссёр Анатолий Добряков "Кто мы?" кино лэсьтӥзы. Со вал Трофим Борисов сярысь. Та киное но вож кыз пыриз. Мон соосты отчы нулдӥ. Трокайлэсь рользэ Анатолий Добряков ачиз шудӥз (табере ми сое шуиськом кыкетӥ Трокай). Туж кельше со агаймылы.
Кино умой пӧрмиз. Корка пушкез, гуртэз, вашкала юртъёсыз снимать каризы. Анае но киноын вераськиз, атаезлэсь верамзэ тодаз вайиз.
Николай Кузьмич Борисов песятае 1914-тӥ — 1917-тӥ аръёсы Алнаш волостьын волостной старшина луыса ужам. Озьы гожтэмез архивной документаз вань. Ужаллям соос куинь кузя: волостной старшина, солэн юрттӥсез но гожъяськись (писарь). Песятаелэн верамезъя, писарьлэн фамилиез Нестеров вылэм. Быдэс Алнаш волосте пособиос, гожтэтъёс, пенсиос асьсэос нулдӥллям. Николай Кузьмичлэн куинь класс гинэ дышетскемез вылэм. Нырысетӥ граждан война дыръя гуртэ тӧдьыос но гордъёс ӵем вуылӥллям. Татын но песятаелэсь Трокай выныз понна кылзэ юаллям. Тӧдьыослэн юанзы одӥг вылэм: "Кытын Трокай выныд?" Нош гордъёслэн: — "Кытын волостной старшинады?" Нестеров Алнашысь Октябрь революция бере кошкем. Берло 1950-тӥ аръёсы Бондюга заводын ужам. Песятае со пала вуылыкуз котьку дораз пырам. Ужам аръёссэс тодазы вайыса, кема вераськыса пукылӥллям.
Нош одӥг гужем август толэзе, Трокаез утчаса, гуртазы тушмонъёс вуо. Соослы ивортӥллям Трокай гуртаз бертэм шуыса. Агаймы нош соос вуытозь, Вятка пала пегӟыны быгатэм. Гуртазы вуыса, соос быдэсак юртэз котыртӥллям. Корка пырыса, сабляен вань валессэ кораллям, листовкаос утчаллям — номыр шедьтӥллямтэ. Собере гидэ потыса, кыед люкез гинэ но штыкен бышкиллям. Сарай сиге тубыса, вань турынэз бугыръяллям. Гуртысь номыре шедьтытэк (гуртын уго нылпиос но песяйзы гинэ вал), тушмонъёс бусые мыно. Отын агай-вынъёс — Павел, Николай но Максим ас бусыязы сезьы аразы. Паволэн Максим ӧтьымтэ куноослэсь вал вылын лыктэмзэс синйылтӥллям, ватӥськыны вуиллям. Нош Николай улӥын, бусы дорын ужам, вуэмзэс адӟымтэ. Сое кутӥллям, соослэн,пе, одӥг юанзы: "Кытын, Трокай вынды?" Николайлэсь "уг тодӥськы" шуэмзэ пелязы но уг поно. Байтэрек гуртэ сюрес возьматыны куриллям, ассэ но сьӧразы нуиллям. Тушмонъёс вал вылын, пе, мыно, нош Коля песятае соослэн азязы пыдын вамыштэ. Собере Камой гуртозь сюрес юаллям на. Песятае верамзэс кылзӥськем, нош ик азьлань сюрес возьматэм. Та гуртэ вуэмзы бере, ассэ мозмытыны косэм. Берло ини вераллям, Алабгое, пе, тонэ нуиськом, тон арестовать каремын. Озьы верамзы бере, песятаелэн йырсиез пежыр султэм. Йыраз соку ик малпан кылдэм: кызьы меда улоз семьяе, мар луоз соосын? Сое тюрьмае ворсаллям. Туж ӵем допросэ нулдӥллям, юанзы котьку ик одӥг: "Кытын Трокай выныд?" "Уг тодӥськы" шуэмез понна, кӧня тышкаллям сое. Йырсазьзэ ыштыкуз, вылаз ведраен кезьыт ву вайыса кисьто вылэм. Нош пумит ке вазиськод, эшшо зол жуго, кылзэ юаллям. Камерае пытсало, потаны уг лэзё. Огпол коридортӥ нуыкузы, та тюрьмаын ик пукись Никита Пудович Замятин - Алабгоысь военной комиссар, Кучыран пи (солэн тросэз эшъёсыз пегӟыны вуиллям, нош Замятин вуымтэ) пумитаз шедем. Та гурт Кизегуртысь куинь иськем гинэ. Соку Никита Пудович атаелы верам, тонэ, пе, ыбыны каремын. Монэ но, пе, ыбозы. Доре бертонэз уг адӟы ни шуэм, улэп ке кылид, вань тодмоосылы, семьяелы салам вера.
Ыбылыны дас кык часын уйин поттазы. Ӧсъёслэсь усьтӥськемзы уйин умой кылӥськылӥз, тодмо вал ини - нош ик ыбыны нуо шуыса. Песятаелэн верамезъя, Камлэн меӵ ярдураз ыбылӥзы. Кин ке бӧрдыса, пе, мынэ, тросэз "Интернационал" кырӟанэз быдэсъяса вамышъяло. Ӵуказеяз песятаелы ивортӥллям: "Замятин ӧвӧл ни".
Кызьы Николай Кузьмич улэп кылем? Допрос дыръя Алабгоысь узыр тодмоосыз сярысь юаллям. Со верам, Стахеев купецез, солэсь Смолин управляющийзэ но матысь эшсэ Косьта уромзэ. Соослэсь ваньмызлэсь юалляськиллям, кыӵе адями со Николай Борисов. Воргоронъёс песятае сярысь умоен гинэ вераллям, озьы тӥни соолы луыса, Коля песятае улэп кылем. Лэзем беразы, тюрьма азбаретӥ туж кышкаса вамышъям, тыбыраз ыбозы кадь потэ вылэм. Сюрес кузя кошкымтэ, быдэс уй нюлэскытӥ бертэм. Берло та учыр сярысь песятае ӵемысь тодаз вайылэм на, анаелэн верамезъя, котьку юрттэм эшъёсызлы бадӟым тау карылэм.
Песятайме кык пол кулак кариллям. Со 1930-тӥ но 1933-тӥ аръёсы вылэм. Юртысьтызы поттӥллям, вылазы дӥськутэн гинэ килиллям. Семьяезлы одӥг горшок но одӥг пуньы сиён гинэ кельтӥллям. Корказэс клуб кариллям, нош гидазы колхоз скалъёсты пыртӥллям. Сибире но келяны туртто вылэм. Песятае семьяеныз ӵош дӧдьые пуксем ни вылэм. Вань гурт калык соосты келяны лыктэм. Ярам али, ӟеч адямиос шедиллям, соос пала дурбасьтӥллям. Ӵана апай но Юбер агай гуртоослы вазиськиллям: "Соос кизекгурт музъем вылын вордӥськизы, неужто татын улыны соослы инты ӧвӧл?"
Озьы песятае аслаз семьяеныз гуртэ ик улыны кылем. Абыш кенак доры интыяськиллям, одӥг коркан дас куинь кузя улӥллям. Песятайме но солэсь семьязэ пичи выныз понна янгыш кариллям.
Озьы ик агайёсызлэн нылпиоссылы но курадӟоно луэм. Уже, пе, нокытчы уг куто. "Вы племянники - врага народа" но "Дети кулака" шуылӥзы. Песятаелэн нылпиосызлэн туж потэ вылэм дышетскемзы. Шуг-секытъёс пыр потыса, но соос визьмо адямиос луиллям. Дарья Николаевна бадӟым нылыз Можга педтехникумез йылпумъяз. Иван Николаевич - 1941-тӥ арын Ижысь мединститутэз. Со аре ик сое войнае басьтӥллям. Татын тодӥзы, кинлы со дышетскемын. Ож бусыын сӧсырмем солдатъёсты эмъяны эшъёсызлы (врачъёслы) ӵем юрттӥськылэм. Война бырытозь трос сӧсырмемъёсты эмъям, операциос лэсьтылэм.
Нош Тимофей Николаевич нырысь Можга педучилищее дышетскыны пыре, но кинлэн со пиез тодэмзы бере, сое улляло. Но отӥяз выльысь куто. Педучилищеез йылпумъяса, дышетсконзэ Ижысь пединститутысь англи кылъя факультетын азьланьтэ.
Война кутскыку, Тимофей Николаевич службазэ нуэ вал ини. Со Иван Николаевич сямен ик Япон война пыр но потӥз. Жаляса верано луэ вордӥськем палъёсазы соослы берытскыны ӧз кылды ни . Тимофей Николаевич вань улонзэ улӥз но ужаз Краснодар ёросысь Ейск городын. Военной авиационной училищеын англи кыллы дышетӥз. Трокай агаймы сямен ик сизьым кылэз тодэ вал.
Песятае, Николай Кузьмич, доразы пырем муртъёслы аслаз визьмо выныз сярысь котьку вералля, пе, вал. Соослэн корка бордазы "Дом заезжих" гожтэм пул шуккемын вылэм, уго песятае ямщикез нулдэм.
Иван Николаевичлэн туж тодэмез потылӥз Удмурт шаерысь но гуртъёсысь выль иворъёсты, ӵем гинэ газётъёс курылӥз. Озьы анае но солэн Ижын улӥсь апаез, Елена Николаевна Поторочина, Москвае газет-журналъёс, пичияк саламъёс лэзьязы. Огпол выны Москвае командировкае ветлӥз, соку ми солы гуртысьтымы Макар ошмесысьтымы вуэз лэзимы. Пичи мурт кадь шумпотыса ыерам: таӵе ческыт вуэз, пе, мынам кемалась ни юэме вал.
2004-тӥ арын оштолэзе шаерамы Венгриысь Будапешт университетысь Петер Домокош вуылӥз. Удмурт университетысь тодосчиос Любовь Петровна Федорова но Светлана Аркадьевна Арекеева солы Трофим Борисовлэн вордскем гуртаз вуылыны ӵектӥзы. Тодосчи трос гожъяз ни вал Трокай агаймы сярысь, удмурт сям-йылолъёсын тунсыкъяськиз.
Дуно куноосты доразы Раиса Ивановна но Кузьма Трофимович (Трокайлэн Максим агаезлэн пиезлэн пиез) Борисовъёс удмурт сям-йылолъёсъя, чалма вылын нянен, чечыен пумитазы. Венгер тодосчи чалмалы синмаськем, гур азьын пыжем зыретэн табань но туж кельшем. Удмурт сиёнъёс пӧлысь табань кадь ческытсэ веръяме ӧй вал, пе. Трос юалляськем Трокай агаймы но солэн ӵыжы-выжыосыз сярысь. 2010-тӥ арын гуртамы мукетыз вегер тодосчи Жужа Шаланки Людмила Евгеньевна Кирилловаен ӵош. Анаеным куать час пукиллям вераськыса.
Иван Николаевич Москваысь архивысь ас синмыныз удмурт шаермылэсь картазэ адӟем, кудзэ ас киыныз Трофим Борисов лэсьтэм. Со туннэ ке но Москваысь Центральной архивын (опись №1316) утиське.
Трокай агаймы Санкт-Петербургысь университетын дышетскыкуз гужем каникулъёсы ӵем бертам вордскем гуртаз, агайёсызлы юрттӥськылэм, фольклорен тунсыкъяськем. Алнаш ёросысь гуртъёсы потам, калыкен пумиськылэм. Кылэмъёссэ гожъяса кельтылэм.
Гуртэзлэсь кыдёкын улыса, Кизекгуртэзлэсь туж мӧзмем. 1929-тӥ арын потэм "Песни южных вотяков" книгаяз тазьы гожтэ:
Зарни меда Кизекгурт?
Азвесь меда Кизекгурт?
Куать писпулэсь йылзэ ӵогыса,
Адӟиськоз меда кизекгурт?
Кизекгурт урам тэгыз урам,
Зангари буртчин вӧлдыны.
Кизекгурт нылъёс туж моторесь,
Сьӧрысьтым кылёнтэм карыны.
Кизегурт урам телеграмм,
Юбооссэ кин пуктэм?
Кошкеме потыса уг кошкиськы,
Тӥ туганлэсь кин ӵыдэм?
Алабгоын ужакуз Трофим Борисовез арестовать каро. Агайёсыз огазе люкаськыса, отысь дӥськутсэ но вань книгаоссэ доразы ваё. Но 1930-тӥ арын Коля агайзэ кулаке потто. Кизекгуртысь вань книгаоссэ кык уробоен Алнаше нуо. Песятае сюлворыса курем вынызлэсь книгаоссэ но сётӥллямтэ. Озьы ке но туннэ нуналозь кык книгаез утемын. Со - "Удмурт кыллюкам" (сое утем пичи сузэрез Анна Кузьмовна Брисова но "Евангелие", кудзэ Трошалы Кучыран земской школаез куинетӥ классэз йылпумъякуз дышетӥсез кузьмам. Отын гожтэмын: "На память Трофиму Козьмину от Кучеряновского земского училища. Учитель И.Д. Богомолов. 28 апрель 1903 год".
Малы нош Козьмину? Малы ке шуоно соку фамилизэс атай нимзыя гожъязы.
Минской фронтысь бертыса, 1918-тӥ арны куартолэзе вордскем гуртаз вуылэ. Агайёсыныз вераськыса, гуртаз школа лэсьтыны малпам. Гурт кенеш люкаса, калык азьын кема вераськем. Школа кирпичлэсь, кык этажъем луыны кулэ, солэн вӧзаз, бакча емышъёс будэтыны кык гектар музъемез мед луоз. Куд-ог арлыдоос пумит кылзэс вераллям. Малы гуртэ школа кулэ? Гуртын улӥсь но будӥсь нылпиос ваньзэ лэсьтыны быгато: гырыны, кизьыны, кутсаськыны, черсыны, кут кутаны... Та ужъёсты быдэсъяны трос визь кулэ ӧвӧл. Ӟечсэ валаллямтэ. Трокай агайлэн кӧтыз ӝож луэм, кыкетӥ нуналаз Алабгое кошкем. Кошкыкуз верам: "Уд ке валаське ӟечме, котьмар каре. Нош мон одно ик кытчы ке но школа усьтыны тыршо". Озьы малпанзэ быдэстэ. 1918-тӥ арлэн пумаз Алабгоын учительской семинария усьтэ.
Тодосчилэн Людмила Христолюбовалэн "Учёные Удмуртии" книгаяз выжыысьтымы ньыль мурт пыртэмын: Трофим Кузьмич Борисов, Алексей Павлович Борисов - тодосчи-педагог, солэн пиез Владимир Алексеевич - тодосчи государственной деятель, Галина Тимофеевна Живаева -история наукаосъя кандидат, али Москваын улэ.
Трофим Кузьмичлэн 19 племянникъёсыз но 16 племянницаосыз вал. Туннэ нуналлы соос кык кузя гинэ кылемын на. Мынам анае но Максим агаезлэн нылыз Евдокия Максимовна Маркова. Милям архивамы вань песятаелэн Кузьма пиезлэн гожтэтэз. Отын со атаезлэсь юа: "Вань-а Трошалэн кыӵе ке иворез? Кытын солэн семьяез?" Гожтэт гожтэмын 1943-тӥ арын 12-тӥ мае. Песятаелы гожтэтэз 4-тӥ июне вуэ. Соку, со ӧз но малпа, дыр та нуналэ пичи вынызлэн сюлмыз йыгаськемысь дугдӥз шуыса.
Мон туж данъяськисько ас выжыеным. Трофим Кузьмичлэн агайёсыз но соослэн нылпиоссы секыт сюресэз ке но ортчизы, котьку ӟеч улонлы оскыса улӥзы.
Кинъёс луизы Борисовъёс? Выжыямы трос юристъёс но вузкарисьёс, заводын но колхозын ужасьёс, кивалт5сьёс но ужбергатӥсьёс, инженеръёс но лэсьтӥськисьёс, дышетӥсьёс но эмчиос.
Макем вакчи дыр сётэмын вылэм Трофим Борисовлы та дунне вылын улыны. Калыкмылэн батыр пиез вань улонзэ сӥзиз асьме кунмес кылдытонлы. Со кужмо но кышкасьтэм адями вал. Со зэмлык понна кышкатэк нюръяськиз. 52 ар улытозяз, 17 ар дышетскиз, 12 ар эмчи луыса ужаз. Туж шумпотӥсько ёрос калыкмы понна, Трофим Кузьмичез уг вунэто шуыса. Котькуд ар сое данъяса бадӟым ужрад ортчытъяло.
Та гожтэм чуръёсме лыдӟыса, тросэз малпалозы, кытысь таӵе тодэ-ваёнъёс? Тау анаелы но Иван Николаевичлы. Соос троссэ уг вунэто, тодазы возё. Огез но та учыр малпаса гожтэмын ӧвӧл, ваньмыз улонысь басьтэмын.