Берло дыре со ӵемысь пыралляз редакцие алнаш калык театрлы сӥзем книга поттон сярысь вераськыны. Угось Вячеслав Михайлович трос аръёс ӵоже со театрен кивалтӥз, газетъёсын потам статьяос, спектакльёслэн афишаоссы, данъян грамотаос лач гинэ люкаськыса улӥзы Вячеслав Михайловичлэн портфолиоаз.Солэн туж потэ вал вань со материал одӥг книгаен мед потоз но алнашъёслы мед кылёз шуыса. Ӝоген со портфолио мынам кабинетам выжиз. Ар куспын удмурт газетэз дасясь Наталия Карпушина трос гинэ печатлаз театр, солэн азинскемез, вормонъёсыз сярысь материалъёсыз "Алнаш куара" газет бамъёсы.

Эшшо Вячеслав Михайлович ёросысь клубъёсы вазиськиз, театральной кружокъёссы сярысь тодэ ваёнъёссэс мед гожъялозы шуыса. Озьы тӥни рос-прос книга поттымон материал люкаськиз. Сое ваньзэ тупатъяно но аръёсъя висъяно вал. Вячеслав Михайлович куремъя ик мон вазиськи "Удмуртия" издательстволэн кивалтӥсезлы Юрий Кузнецовлы. Юрий Васильевич вуоно книгалэсь электронной вариантсэ лэзьыны косӥз. Лэзи но чидатэк возьмай: мар меда шуозы ини? Ку жингыртозы? Вуиз сыӵе нунал, Юрий Васильевич жингыртӥз но книга бордын эшшо кӧня ке ужаны куриз на, тупатъяны косӥз. Тырмымтэос вал ик, соосыз палэнтоно луиз. Тау шуисько аспал эшмылы Татьяна Ворониналы, со та книгаез редактировать карыны басьтӥськиз шуыса, сюлмысь но тыршыса ужаз котькуд текст бордын. Соин валче книга поттыны дась луиз.

Туж шумпотӥз вал та иворлы Вячеслав Михайлович. Но коньдон ӧвӧлэн книгаез поттон ӝегаз. Нош куке тодӥзы Вячеслав Михайлович секыт висе шуыса, книгаез номыр шоры учкытэк но ӝегатскытэк поттоно кариськизы. Алнаш калык театрлэн режиссёрез Светлана Плотникова спонсоръёс утчаз — шедьтӥз, издательствоын ужасьёсын вераськиз. Но… ӧм вуэ. Вячеслав Михайлович книгаез адӟытэк улонысь кошкиз. "Алнаш калык театр: дауръем куара" нимын Алнаш театр сярысь книга югыт дуннеез адӟиз Вячеслав Михайловичлэн кулэм дырысеныз 40 нунал ортчыса гинэ. Солэн эшъёсыз быдэс тиражез Алнаше ваизы но нырысь экземпляръёссэ нылпиосызлы кузьмазы.

Та нуналъёсы Вячеслав Михайловичез буре ваён ужрад ортчыны кулэ вал, но солы люкетӥз пандемия.

Туж оскисько, книга шедьтоз аслэсьтыз лыдӟисьсэ шуыса. Тужгес но тунсыко луоз со азьвыл аръёсы ас улонзэс алнаш калык театрен герӟам адямиослы.