Марий календарь почеш 2018 ий - Шоншо идалык гын, шушаш 2019 ий Шордын идалыкше лиеш. Мом тудо ончыкта? Шордо (1923, 1955, 1987, 2019 ийла) - артист койыш, пушкыдо кумыл, чынлык, гармоний дене илаш тыршымаш. У ий вашеш ты янлык дене кылдалтше "Шордо - марий чодыран озаже" усталык конкурсым увертарена да тендам тушко ушнаш ужына. Конкурс 3 номинаций дене эрта: "Сылнымут произведений (ойлымаш, илыш гыч историй, басне, йомак, почеламут)", "Сурет" да "Фотографий”. Кажне номинацийыште сеныше ден призер-влак палемдалташ туналыт. Конкурс 2018 ий 21 декабрь марте шуйна, иктешлымаш 2018 ий 28 декабрьыште лиеш. Условий-влак: 1) конкурсышто участвоватлаш манын, газетлан подпискым ыштыман; 2) материал-влак газетын сайтыштыже савыктыме лийыт. Конкурсышто, ийготым ончыде, кумылан кажне ен участвоватлен кертеш. Шордо идалыклан полеклалтше паша-влакым редакцийыш конден але электрон почтыш колтен кертыда. Адрес: Шернур поселко, Комсомольский урем, 24-ше порт (2-шо пачаш). Электрон почто: servel7055@bk.ru

Сенышым полек вуча!