1985-тӥ арын, Глазов карысь медучилищеез йылпумъяса, егит ӧнерчи ужаны лыктӥз гуртамы.

Гуртын будэм, востэм сямо нылаш вань басьтэм тодон-валанзэ мур пыӵатыны тыршиз ас удысаз. Калык ӝог дунъяз валанъёссэ, быгатонлыкъёссэ, шуэрес учыръёсын кышкасьтэм но дӥсьтӥсь луэмзэ.

Пумен, вакчи дыр куспын, Татьяна выль интылы ачиз но синмаськиз. Чебер тусо, веськрес мугоро нылашез соку ик синйылтӥзы егитъёс. Самой шудоезлы – Зорин Герман Ивановичлы – удалтӥз. Кылдӥз егит семья. Кыксылы ик пиоссылы – Иванлы но Владимирлы – вылӥ образование басьтыны юрттӥзы, калыкез, ужез гажан мылкыд пыӵатӥзы.

Гуртысь ӧнерчилэн – фельдшерлэн - ужан радлыкез пӧртэмгес каръёслэсь. Шуом, кар поликлиникаын ужасьлэн юнматэм графикез вань, солэсь мултэс дырлы со уг быгаты ни кыльыны, нош гуртын ужась фельдшерлы ӵем кылдэ на пеймыт, нӧд уйёсы но висись доры мыныны. Татьяна Вячеславовна эмъюмен гинэ ӧвӧл, лякыт вазиськеменыз, буйгатӥсь кылъёсыныз юрттэ капчиятыны висисьлэсь мылкыдзэ но тазалыксэ.

Паськыт ужан удысэз фельдшермылэн: гуртын тросгес арлыдоос уло бере, соослы нимаз саклык кулэ. Егит семьяос но ӧжыт ик ӧвӧл, соос сяна – садик, школа, патронаж, дыраз прививкаосты пуктон вакыт, пӧртэм документация, нош гуртын семья вите на – ваньмызлы лякыт, буйгатон кылъёс шедьтоно.

Ас ужзэ визьмо радъяны дышем кышномурт котькудаз вуэ. Общественной уже но пыриське, ялан тодон-валанзэ будэтэ. Юн гажа удмурт культураез, художественной самодеятельностез. Кужмо, чебер куараез татын но шумпоттэ кылзӥсез но учкисез.

Шумпото гуртоос, таӵе визьмо, оскымон, ӟырдыт сюлэмо ӧнерчизы вань шуыса.

Усточимылэн ужез вылӥ пусъемын, нош тужгес но вылӥ дунъет, милям малпаммыя, гурт калыкедлэн гажамез, данъямез.

Сюлмысьтымы ӟечкыласьком гажано Татьяна Вячеславовнаез та дано дырпусэныз.

Шудбуро кузь даур сӥзьыса,

Ӟечезлы оскон тысь пазьгыса,

Ми тыныд сӥзиськом тазалык,

Эшлыко кусыпъёс, ӟеч мылкыд!

Котькуд нунал – дурыстэм шумпотон,

Яратон но пальпотон!

Котькуд адямилы улытозяз пӧртэм "могӟетъёсын" пумиськоно луэ. Соосты быгатыса, капчиятыса ортчыны Татьяна Вячеславовналы матысь, оскымон эшъёсыз юртто.

Туспуктэм вылын:

Татьяна Вячеславовна Зорина ӵош ужам эшъёсыныз Диана Геннадьевна Волковаен но Елена Аркадьевна Волковаен.