Тросэз соос радъяськизы выль стадионын, озьы ик уже кутӥсько черкогуртысь гимназилэн стадионэз но спортъя залэз, куд-огезлы висъямын РДК-лэн залэз. Ваньмаз объектъёсын сак эскерисько коронавируслэсь утиськонъя куронъёс.

Нош туннэ спортсменъёс но учкисьёс пыриськозы кема витем праздникез сӥё-дано усьтон ужрадэ. Со луэ гурт шудонъёслэн одӥгез тужгес яркытэз люкетсы. Дасяськон дырзы вакчи ке но вал, культура удысын тыршисьёс но ваньмыз, кин та уже кыскемын, вань сюлэмзэс но мылкыдзэс сётӥзы. Калыкез одно ик паймытыны быгатозы, праздникез вунонтэм карозы. Туннэ ик ортчоз эшшо одӥгез учкымонэз но тунсыкоез вожвылъяськон – триатлон. Оглом вераса, мылкыдъёс уртчымон луозы.

Нимысьтыз верам потэ гурт шудонъёслы пуктэм стадион но спортъя огъет сярысь. Зэм, туж синмаськымонэсь! Соосты сӥё-дано усьтон талэсь азьвылгес ортчиз – 8-тӥ гудырикошконэ, Физкультурниклэн нуналаз.

- Такем устоесь спортъя объектъёслы мукет ёросъёс гинэ уз вожъяське, котькудаз карын но сыӵеез ӧвӧл ай, - пусйиз, празднике вуылыкуз, спортъя министр Александр Варшавский.

Красногорскъёсты ке верано, синзылы уг оско на – выжыкылын кадь потэ, луоз. "Гурт шудонъёс - 2020" пыраклы пырозы но ӟеч пытьы кельтозы ёрослэн историяз. Сӥзёмы на кузёослы уно вормонъёс но выль рекордъёс!

Выль стадионлэсь ӟечлык- сэ но умойзэ дунъяны быгатозы Глазов ёрослэн командаяз вожвылъяськись Качкашурысь Семакинъёс. Иван но Катя спорт удысын тодмо адямиос. Иван уно пол шумпоттылӥз полиатлонын басьтэм вормонъёсыныз, но огдырлы со син улысь ышылӥз, шуыны луоз. Кузпалъёс Удмуртилэн палэназ улӥзы, но берен ас палъёсазы кариськизы. Кык нылпи будэто ни, соослы адӟем карымон луо. Бадӟыменыз, пиенызы, семьяос куспын ӵошатсконъёсы пыриськыны дасяськизы.

- Берло ивортӥзы: нылпиостэк, пе, мыномы. Валамон, со черлэсь утиськон понна озьы лэсьтӥзы шуыса, но мылкыд куашказ ик. Нырысь ик, нылпиосмы понна тыршиськомы ук, - шуиз вал Иван, та нуналъёсы пумиськылыкумы.

Озьы тӥни, гужем гурт шудонъёс туэ покчи спортсменъёсмытэк ортчозы. Нош Семакинъёс понна та шудонъёс асьсэды эскеронэн, кужымзэс мертанэн луозы. Уга семьяен соос стартэ нырысьсэ пото. Таяз учыре семьяос понна радъяськозы дартс, визез сынан но бызьылонъя эстафета, ӵошатсконъёс ортчозы 14-тӥ гудырикошконэ. Озьы ик Иван кужымзэ возьматоз на полиатлонын. Сюлмысьтымы сӥзиськомы вормонъёсын бертыны!