- Портал кылдытон борды 2019-тӥ арын басьтӥськизы. Со кылэз дышетыны туала луонлыкъёс кылдытон понна лэсьтӥське. Туж оскиськом, со нылпиослэсь анай кылзэс дышетыны мылкыдзэс ӝутыны юрттоз шуыса, - вераз министр.

Порталын школаын дышетскись пиналъёсты удмурт кыллы онлайн дышетон радъямын луоз, учебникъёслэн электрон формаоссы вӧлмытӥськозы, ужаны аудио- но видеоматериалъёс поттэмын луозы.

Порталэз кылдытон понна оборудование но нимысьтыз техника басьтӥзы. Ӵектосэз улонэ пыӵатыны 3 миллион манет висъязы. Порталэз туэ южтолэзе лэзьыны чаклало.

Али элькунысь школаосын удмурт кыллы дышетон пӧртэм амалъя радъямын – сое предметэз сямен, факультативез сямен но кружокез сямен нуо.

Туннэ нуналлы удмурт кылэз Удмуртиысь 283 школаосын 21 676 пиналъёс, 61 нылпи садъёсын 9 146 нылпиос дышето.

2019-тӥ арын удмурт кылэз дышетӥсьёслэн лыдзы 963-лы кулэсмиз, 2020-тӥын - 368 адямилы.

- Но куд-ог ёросъёсын удмурт кылэз дышетӥсьёслэн лыдзы йылэ. Со Дэри, Пичи Пурга, Игра, Якшур-Бӧдья ёросъёсын, Глазовын, Можгаын но Ижкарын. Нимысьтыз пусйисько Кузебай Герд нимо гимназиез, - шуиз Светлана Болотникова.

Удмуртиысь Дышетонэз азинтонъя институт, Дышетон удысысь йӧскалык ужпумъёсты эскеронъя тодос институт но "Вордскем кыл" журнал дышетӥсьёс понна методикая но ивортодэтъя уж ялан нуо. Ужазы куто дистанционной амалэз но. Озьы, соос дышетӥсьёслэсь квалификацизэс будэтонъя курсъёс, котырес ӝӧкъёс радъяло, вебинаръёс, научно-практической конференциос, ӧнеръя быгатонлыкъёсъя конкурсъёс ортчытъяло, методикая бичетъёс потто. Кылсярысь, "Вордскем кыл" журнал Татарстанын удмурт кылъя но литературая дышетонын пайдалыко ужан амалъёслы сӥзем номер поттӥз.

Элькунамы удмурт кыллы дышетӥсьёслэсь быгатонлыкъёссэс, тодон-валанъёссэс будэтыны луонлыкъёс вань. Со сяна, дышетӥсьёс окладзы вӧзы 15 процент ватсаса коньдон басьто. Арлы быдэ элькун коньдэтысь школаослы но нылпи садъёслы удмурт кылын дышетон литература басьтон понна коньдон висъяське. Туэ со ужпумъёслы 6 миллион 500 сюрс манет сётэмын, пусйиз министр.