Елена Леонидовна Ярославцева вань улонзэ книгаосын эшъяське. 37 ар ӵоже со библиотекарь луыса тырше. Унозэ Яр ёросысь Бармашур библиотекаын.
Ужан сюресэз 1983-тӥ арын Бачумовоын кутскиз, нош бызем бераз, 1986-тӥ арын Бармашуре выжиз.
- Пинал дыръям юн яратылӥ лыдӟиськыны, школьной программая одӥг книгаез но лыдӟытэк ӧй кельты. Соку ик малпанэ вал: книгаосты ваньмыз мед яратозы шуыса, мае мон тодӥсько, мукетъёсыз но мед тодозы кадь потэ вал. Ачим мон Тарасовоысь, дышетски Бачумовоын. Со аръёсы быдэс классъёсын колхозэ кыльыны курылӥзы. Мон но сыӵе мылкыдын кошки – одно ик гуртам берытско шуыса. Школа бере культурая колледжез быдтӥ но вордскем палъёсам лыктӥ.
Колхоз правление, фермае мынӥсько вал, мачкисько, кыӵе выль книгаос гурт удысысь специалистъёслы ужазы юрттозы.
Библиотекалэн фондаз та дыре 2866 книга лыдъяське, соос пӧлысь 1146-ез – нылпиослы. Кылем арын ӝажыос вылэ интыяськиз 96 выль книга, 19-эз – удмурт кылын.
- Трос ваё лыдӟиськисьёс. Тани туннэ Екатерина Суворова "Я познаю мир" сериысь 31 книга кузьмаз. Лидия Барышникова любовной романъёс ваиз. Каль соосты тросэз лыдӟо, ярато детективъёсты но.
Елена Леонидовнаен вераськыкумы пырисьёс луизы:
- Пие куке удмурт кылын книга басьяз, мон но лыдӟи, но со кемалась вал. Выльысь лыдӟеме потэ, но нимзэ вунэтӥ. Гурт улон сярысь лыдӟыны кельше, - шуэ кышномурт.
Елена Леонидовна та пумысен мылкыдзэ уг ваты:
- Шумпотӥсько, книгаослы калык кулэяське на шуыса. Кык пол арняяз гуртъёсы потасько: Кычиное, Льнозаводэ. Тол но, гужем но великен ветлӥсько. Калык вите. Библиотекаосын асьме историмы, соос ноку но медаз быре.