Дизьмино фапын тыршись ӧнерчиос шоры синмаськыса учконо. Шумпото гуртоос но: эмчиоссэс ушъяло но тау каро, кулэ ке, шутэтскон нуналъёсы но соослы вазиськиськомы, шуо.
Роман Шангин татын август толэзьысен гинэ ужа ай. Глазовысь медколледжез йылпумъямез бере сое Кезэ ыстӥллям, нош аслаз солэн Глазовлы матэгес кариськем потэ вылэм. Озьы, куке тодэм гинэ, Дизьминое фельдшер кулэ шуыса, малпам отчы мыныны. Кезъёслэн, валамон ни, егит ӧнерчиен люкиськемзы уг поты вылэм.
- Пиньёсынызы ӟукыртыса но мар, лэзизы ик. Дизьминоез бырйи куинь муген: бадӟым сюрес дурын сылэ, гуртын коммуникациос вань но инкуазьлы матын, шулдыр интыын, - вера Роман Васильевич.
Нош будэм со Киров улосысь Омутнинск карын, выжыосыз, пе, ӟучо-удмурто луо. Пинал дырысеныз биологиен но химиен тунсыкъяськем, озьы, азьпал улонзэ тазалыкез утёнэн герӟаны малпам. Вордскем городаз сое целевой амалэн педиатрлы дышетскыны ысто вылэм, но военкомат вормем. Арми бере ини пияш Глазове шонтэм.
- Дизьминоын монэ ӟеч пумитазы, улӥсьёсын кусыпъёсмы умоесь. Троссэ тодӥсько ни: татын юрттэм сяна, нуналлы быдэ куинь-ньыль муртэ доразы эмъяно луэ на. Улон интые аслам ӧвӧл эшшо, снимать карисько. "Земский фельдшер" программая подъёмной басьтӥ ини, сое ас мылпотэмъя кутыны луэ, - азьланьтэ веранзэ со.
- Ваньмон дырез тунсыко ортчытыны луонлыкъёс вань-а кадь гуртын? – юаськомы егит пилэсь.
- Мынам вань ӟеч компьютере. Собере Глазов матын, мынӥсько отчы, эшъёсы доры.
- Гуртын чалмыт, каньыл – соин ик монэ бордаз кыске. Нош ваньмон дыръям тыршисько тросгес лыдӟиськыны - ӧнеръя тодон-валанъёсме будэтыны. Эпидемиология, вирусология тунсыко пото, - шуэ.
Мар бен, тани ук – кышкыт чер котырамы. Егит эмчи соин пумиськылэм ни.
Дизьминоын сокугес гинэ ужзэ мытэм, нош сое коронавирусэн висись доры ыстӥллям. Противочумной костюм дӥсяй но мынӥ, шуэ. Сыӵе ужез уга, ачиз бырйиз.
Кемалы-а та палъёсын Роман, шуг али вераны. Нош ужъя эшезлы Мария Матвеевалы оскон бадӟым: егит нылкышнолэн татын выжыосыз. Ачиз со артысь Мосейгуртысь. Биологиен тунсыкъяськемез ик вуттэм Глазовысь медколледже. Практиказэ скоройын ортчем, соку тӥни валам: ужез – кельше, со – ас интыяз.
Берпуметӥ курсысен практикае Дизьминое мынэм ни, отчы уга бызиз. Нош диплом басьтэмез бере, егит фельдшерез Мария Матвееваез уже кутӥзы. Нырысь аръёсаз солы удалтӥз бадӟым опытэн эмчиос бордын ужаны. Но кема ик дыр ӧз ортчы – табере солэсь дышетско ни.
Эмъюрттэт сётонэз радъяны-нуыны кык кузя трослы капчигес, шуо. Кулэ дыръяз – кенешо, огзэс огзы вошто, ог-огзылы юрттӥсько. Туж витё ни выль фапез усьтэмзэс, сое Дизьминоын "Тазалык" нацпроектъя пуктӥзы. Отын выль эмтӥрлык, нимаз кабинетъёс, сайкыт но шуныт луоз. Чидатэк витё ни сое улӥсьёс но.