Улон сюресэз
Вордскиз со 1931-тӥ арын Глазов уездысь Тукбулатово гуртын. Анаез но атаез дышетӥсьёс вал.
1950-тӥ арын йылпумъяз Глазовысь педагогической училищеез. Ньыль ар ортчыса, Удмурт педагогической институтысь дышетӥсь-историк луэмез сярысь диплом басьтӥз. Институтын дышетскыкуз ик партие пыриз, мылысь-кыдысь общественной ужен выриз.
Институт бере егит дышетӥсез келяло Балезино ёросысь Нововолковоысь школае. Татысен ик со тодматске Ижын будэм нылашен, вуоно кузпалэныз Галинаен.
1955-тӥ арын Карл Александровичлы оско Балезино ёросысь комсомоллэн комитетэныз кивалтыны. Нош ар ортчыса ини, 1956-тӥ арын, ВЛКСМ-лэн областной комитетаз лекторской группаын кивалтыны быръё, собере ужа "Комсомолец Удмуртии" газетлэн редакторез луыса.
Куатьтонэтӥ аръёсы Общественной наукаосъя академилэн аспирантураяз дышетске. 1970-тӥ - 1974-тӥ аръёсы Удмурт АССР-ысь просвещениея министр вал, нош 1974-тӥ арын КПСС-лэн Удмурт обкомезлэн секретарез луэ.
1977-тӥ -1980-тӥ аръёсы доцент К. А. Пономарёв Ижысь сельскохозяйственной институтлэн КПСС-лэн историезъя кафедраен кивалтӥз. Собере дас ар ӵоже Удмурт госуниверситетын тыршиз. Та аръёсы ик докторской диссертацизэ утиз.
Укмыстонэтӥ аръёсы ужа Дыше- тӥсьёсты дасянъя но квалификацизэс будэтонъя институтын, 2001-тӥ арын – со историяя, философияя но культурая кафедралэн профессорез.
Улытозяз 200-лэсь уно ужъёссэ гожтӥз но поттӥз. Соос пӧлын – 7 монографиос.
К. А. Пономарёвлэн ужез, тыршемез трос вылӥ данъетъёсын дунъямын, соос пӧлын - "Знак Почета" орден, Трудовой Горд Знамялэн орденэз, пӧртэм пумо медальёс. Карл Александрович пусъемын Удмурт Республикаысь наукая дано ужась но Росси Федерациысь вылӥ школалэн дано ужасез нимъёсын.
К. А. Пономарёвлэн бадӟым интыез луэ удмурт движениез улӟытонын но. Со Удмурт культурая обществолэн нырысетӥ кивалтӥсез, берло "Удмурт кенеш" ассоциацилэн исполкомезлэн ёзчиез, озьы ик - Финн-угор калыкъёслэн ассоциацизылэн Калыккуспо консультативной комитетэзлэн ёзчиез.
2020-тӥ арын 11-тӥ сентябре Карл Александрович Пономарёв улонысь кошкиз.
Асьмемын артэ
5-тӥ оштолэзе Ижысь Калыкъёслэн Эшъяськон юртазы трос калык люкаськиз – пумиськон сӥземын вал К. А. Пономарёвлэн 90 арес тырмонэзлы.
- Карл Александрович кема витиз та юбилейзэ, дасяськиз солы. Соин туннэ та нуналэ ӝож мылкыдын вераськем уг поты. Аруйез ортчымтэ бере, удмуртъёслэн оскемзыя, со милемын артэ на, - ужрадэз таӵе кылъёсын кутскиз "Удмурт кенеш" ассоциацилэн кивалтӥсез Татьяна Ишматова.
Пумиськонэ лыктэмын вал К. А. Пономарёвлэн ӵыжы-выжыосыз, ӵош ужам эшъёсыз, "Удмурт кенеш"-лэн ёзчиосыз. Трос шуныт кылъёс веразы тодмо адямиос А. Е. Загребин, А. Г. Шкляев, Ю. П. Кузнецов…
Пумиськонэ мылысь-кыдысь пыриськимы ми но – Карл Александровичлэн Глазов ёросысь бӧлякъёсыз: "Удмурт кенеш"-лэн Глазов ёросысь ёзэтэзлэн кивалтӥсез Е. В. Пономарёва но шаертодосчи А. В. Баженова. Ас мылкыдъёссэс вераса милемлы келязы удмурт движенилэн азьветлӥсьёсыз Н. К. Золотарева, Н. П. Васильев но Удмурт Ключиысь библиотекарь С. П. Наговицына.
- Карл Александровичен мон тодматски укмыстонэтӥ аръёсы, удмурт движение выльысь улӟыку, - вера Надежда Константиновна Золотарева. - Со котьку пыриськылӥз пумиськонъёсы, съездъёсы. Зэмос тодосчи, профессор вал бере, со котькуд докладъёссэ историысь, улонысь фактъёсын юнматылӥз. Докладъёсыз туж лэчытэсь луылӥзы.
Шуд усиз мыным соин ӵош Венгрие но вуылыны. Отын ортчиз финн-угор калыкъёслэн нырысетӥ съездзы. Удмуртиысь отчы пыриськиз бадӟым делегация – Кузьма Иванович Куликов но пӧламы вал. Карл Александрович Венгриын но туж ӟырдыт вераськиз удмурт кылэз но культураез утён сярысь, удмурт калыклэсь сюлмаськонъёссэ вераз.
Карл Александрович – паймымон адями вал, туж лякыт, калыклы сюлмысь юрттыны тыршылӥз. Удмурт движение ӝутскон аръёс вал бере, съездъёс но туж огыр-бугыр ортчылӥзы. Сыӵе дыръёсы Карл Александрович туж быгатыса со мылкыдъёсты, тэргаськонъёсты зӥбломытыны быгатылӥз. Юн дипломатичной адями, нокинэ вӧсь карытэк быгатэ вал югдурез сэрттыны.
Мон юн данъяськисько, - шуэ Надежда Константиновна, - сыӵе адямиен тодмо вал, соин ӵош ужаны кылдӥз шуыса.
Николай Петрович Васильев тодаз вае Карл Александровичен 2019-тӥ арын Глазовын пумиськемзэ.
- 4-тӥ ноябре карамы ортчиз бадӟым ужрад, сӥземын вал со Удмуртилэн кунлык басьтэмез дырысен 100 ар тырмонлы. Быдэс шаерысь делегациос вуизы. Ижысь лыктэмъёс пӧлын вал Карл Александрович но. Сюлмысь ӟечбуръяським. Со юаз, берло книгаме, пе, адӟид-а ни? Ӧй, шуи. Та пумиськеммы бере ик почтаен мыным К. А. Пономарёвлэсь посылкаез вуиз, отын вал солэн книгаосыз. Жаляса верано, улэп дыръяз тау шуыны мон озьы ик ӧй вуы ни. Сыӵе секыт малпанэн улоно луисько. Но Карл Александрович пыраклы сюлэмам, солэн лэзем кузьымез мыным юн дуно.
К. А. Пономарёвез тодо но гажало Удмурт Ключиысь гуртоос. Карл Александрович татчы ӵем лыктыны тыршылӥз, уго матысь бускель гуртын Тукбулатовоын ортчиз солэн пинал но быдэ вуон дыръёсыз.
- Карл Александрович 2011-тӥ арын Удмурт Ключи школалэн 100 ар тырмоназ ӧтчамын вал, - вера библиотекарь Светлана Петровна Наговицына. - Ар ортчыса, 2012-тӥ арын, нош вуылӥз нылпиосын пумиськонэ. Соку ик со школалы аслэсьтыз библиотекаысьтыз 400 книгазэ кузьмаз. Со вал кунгож но отечественной классика. Эшшо кузьмаз на "Миг. Вечность. Бесконечность" нимаськись книгазэ.
2012-тӥ арын 17-тӥ мартэ школа вазиськиз "Гулековское" муниципал кылдытэтысь депутатъёслы, Карл Пономарёвлы "Тукбулатово гуртлэн дано улӥсез" нимез сётон понна. Депутатъёс сессиын та юанэз учкыса, огкылысь соглаш луизы.
2013-тӥ арын Карл Александрович нош ик Удмурт Ключи школаысь пиналъёсын пумиськонэ вуылӥз. Соку со аслэсьтыз "150 дней красноармейца Пономарева" книгаезлы презентация ортчытӥз. Книгаын со тодаз вае атайзэ, солэсь войнае мынэмзэ, семьязылэсь сюдӥсьсэ-утисьсэ ыштэмзэ.Та пумиськонэ Карл Александрович нош ик тырттэм киын ӧз лыкты. Библиотекалы "Российские князья, цари, императоры" 50 томъем бичетсэ кузьмаз.
Карл Александровичлэн нимыз ноку но уз вуны вордӥськем палъёсаз. 2017-тӥ арын Ключиысь библиотека "Удмурт Ключилэн азбукаез" нимо бичет поттӥз. К. А. Пономаревлы отын нимаз бам висъямын, школа библиотекаын, солы сӥзьыса, борддор сэрег лэсьтэмын.
Газетмылэн бамъёсыз вылын
Глазов музъем вылын Карл Александрович Пономаревен котькуд пумиськон сярысь гожъяллямы "Иднакар" газетамы но. Тани син азям шедиз 2015-тӥ арын нырысетӥ бамын потэм Альбина Бушмакиналэн "Ожысь документъёс зэмос югдурез возьмато" статьяез. Татын ик интыямын Пономаревъёслэн семьязылэн 1937-тӥ арын лэсьтэм туспуктэмез.
2019-тӥ арын "Шаг за шагом – к ассоциации "Удмурт кенеш" статьяын автор А. С. Аввакумов удмуртъёслэн нырысетӥ съездзы сярысь тодаз вае. Шуныт кылъёсын мачке К. А. Пономарёв сярысь но.
Трос уно статьяос вал на – ваньмыз соос архивын, газетлэн бамъёсыз вылын, озьыен, историяз кылизы.
- Ми, глазовъёс, котьку но сюлэмъёсамы возём та дано но вань удмуртъёс понна дуно адямиез – Карл Александрович Пономарёвез, - таӵе кылъёсын йылпумъямы ми люкаськемъёс азьын веранмес.