Берло дыре гуртын улӥсьёс, улонзэс ӟечгес карон вылысь, туж чырмыт кутскизы ӵектосъёсын ужаны. Кыӵе воштӥськонъёсты витё Яр ёросысь "Укан" поселениын?
Тӧролэсь ужъёссэ быдэсъясь ӧнерчи Анна Данилова нуналмысь ужъёс, сэрттоно-пертчоно ужпумъёс сярысь ивортӥз:
- Котькытын сямен ик, лымыен нюръяськимы. Берло дыре сюресъёсмес сузя Ярославцева фермер, соин огкыл возиськомы. Сузятэк ӧз возьы, ужзэ ӟеч тодэ. Валамон, огдыре ик ваньзэ ужез уд быдэсты. Гуртъёсмы ведь милям трос - даслэсь ятыр. Тымпалан тани ньыль улӥсез, Азьмановоын – дас куать, но сузяськомы ведь ваньзэ сюресъёсты.
Водопроводъёсын но курадӟон дыръёс луылӥзы. Кытӥ асьмеос улӥсьёсын ӵош тупатъяськомы. Колонкаос но кынмылӥзы, шунтыны вырылӥмы. Куке ёрос администрацие вазиськиськомы – калыклы чылкыт ву сётон понна со кыл кутэ. Но вутэк кема ӧм ик пукылэ. Тани Уканын ик югдур вал, кык нунал сяна ӧз улэ, ву нош вуиз.
- "Наша инициатива", "Деревня будущего" но мукет со выллем конкурсъёсы пыриськиськоды-а? Мар кулэ каро улӥсьёсты? – юаськомы тӧролэсь.
- Ӧм пыриськылэ на, ӵектосъёсын ужан борды кутскымтэ эшшо. Татын мон выль адями. Озьы, улонлэсь ӧжыт бергес кылиськеммы ни. Но малпанъёс вань, быдэстыны луонлыкъёс но вань. Малпасько, кутскомы та уж борды. Нырысь ик чакласькомы Уканысь нылпи площадкаосты выльдыны. Уканэ ик туж кулэ вылэм спортъя комплекс инъяны. Егитъёсмы трос ӧвӧл ке но, со кулэ. Школае 70 пинал ветлэ, спортъя площадка соосты но бордаз кыскысал.
- Туэ ар элькунамы Гуртлэн ареныз ялэмын. Тӥ палан кыӵе ке бадӟым воштӥськонъёсты шӧдозы-адӟозы-а меда?
- Милям музъемъёсмы вылын, Ярен Уканэн вискын, пудо вордон комплекс пуктыны чакламын. Лэсьтӥськон ужъёс туэ кутскозы ни. Нош инвесторез Кировысь – Фалёнкиысь "Межрайонная станция по травам". Комплекс 3200 йырлы луоз, милесьтым калыкмес но, оло, уже кутоз. Кузёез вазиськылӥз ни, трактористъёс кулэ шуыса. Тулыс бусы ужъёсты мытыны малпа ни со. Пумиськон радъяломы, ог дасо воргоронъёсмы мылкыд каризы лыктыны. Но мар пӧрмоз, улыса адӟомы ни. Оскем потэ, собыдӟа комплекслэн ужамез ӟечен милемлы но берытскоз шуыса. Ӟеч уждун тыриз ке, оло, егитъёс но гуртэ кылёзы, - усьтэ малпанъёссэ Анна Владимировна.
Уканъёс понна туэ радъяно ужъёссы пӧлысь одӥгез яркытэз но калыкез огазеясез луыны кулэ черкогуртлэн юбилеез. Дано дырпусэз гужем бадӟым шулдыръяськонэн пусйыны малпало. Праздникез радъяны-ортчытыны асьсэос гуртоос сюлмаськозы. Гурт эштосъёссы ӧвӧл ке но, куинь фермеръёс ужало, соос быгатэмзыя итӥськозы. Гуртсылэсь юбилейзэ пусъён улсын валчеяськемзы мукет ужъёслы но ӝуткалоз!