Кизён ужъёсты дырыз дыръя быдэстон понна кидыс, кизер эстӥськон сярысь но сюлмаськоно, удобрениос но басьтоно, техникаез но дасяно. Балезино ёросысь "Никольское" огазеяськонын ваньмыз дась. Кылем пятницае отын техосмотр ортчиз.
Валтӥсь инженер Руслан Шиляев шуэ, тракторъёс, машинаос бусые потэмез возьмало ни, эскероно-тупатъяно на кизён арбериосты, музъемез бугыртӥсь техникаез, усыосты.
Механизаторъёс но одӥг малпанэн уло: лымы шунам бере, кызьы ӝоггес кизён ужъёсты быдэстоно, тӥяськонъёс-ӝегатсконъёс медам луэ шуыса.
Хозяйствоын ужась киосын но, техникаен но бадӟым курадӟонъёс ӧвӧл.
Берло аръёсы кык МТЗ басьтӥллям, кылем арын Т-150 (ӵыж выль ӧвӧл, но вылез юн дуно, кредитъёс пӧлы выеммы уг поты, шуо). Со сяна, выльдо прицепной техниказэс.
Мастерскойын ми пумиськимы механизаторъёсын, пӧлазы трос егит, йӧн-йӧн, таза воргоронъёс. Нош Сергей Степанович Наговицын пенсие потыса но тырше.
- Пыр Т-150 тракторен ветлӥсько, - шуэ воргорон. – Музъем гырисько, пудо сиён дасянын ужасько, толалтэ лымы сузясько. Мылкыд вань, но техника выльгес мед луысал, тӥяське ке, мылкыд куашка ук.