- Гужем школамы сяська пӧлы ышоз, - шуэ дышетон ужъюртлэн директорез Надежда Сандалова, со ик химиен но биологиен дышетӥсь. – Нош будэтэм емышмы столовое мынэ, нылпиослэн сиёнзы дунтэмгес луэ.

Дун тырыса сиськисьёсыз школаын трос ик ӧвӧл. Начальной школаысь пиналъёсты кык пол нуналаз дунтэк сюдо, нош 5-11-тӥ классъёсысь дышетскисьёслэн обедзы 30-60 манет усе. Но уксё тыре 10 мурт гинэ, трос нылпиё семьяосысь пиос но нылъёс дунтэк нуназеяло.

- Урокъёсмы 9 часэ кутско, - шуэ кивалтӥсь. – Собере пиналъёс кружокъёсы, секциосы мыно. Вань предметъёсъя визьнодасьёсмы окмо, но физкультураен дышетӥсьмы Васильевскойысь ветлэ. Спортъя ужрадъёсы, конкурсъёсы, фестивальёсы пыриськиськом. Тани 10-тӥ классысь Максим Чирков Уваын ортчем дышетскисьёслэн спортъя тол шудонъёсазы кужымзэ мертаз но 2-тӥ бадӟым разряд басьтӥз. Предметъёсъя олимпиадаосын но пиналъёсмы умой тодон-валанъёссэс возьмато.

Бадӟым семья

- Дышетӥсьёсмы бадӟым опытэн, трос аръёс ӵоже ужало, - шуэ завуч Валентина Фефилактова. – Мон ачим 1977-тӥ арын татчы распределениея лыктӥ, 44 ар ӵоже англи кылэз нуисько. Егитъёс пӧлысь математикмы гинэ, туэ ужаны кутскиз Максим Васильевич Киселёв. Ми татын бадӟым семья кадь улӥськом. Котькуд пиналлэсь улэм-вылэмзэ тодӥськом, мылкыдзэ валаськом, огкыл шедьтыны тыршиськом. Пиналъёсмы умоесь, ужрадъёсы мылысь-кыдысь пырисько.

Умой сяме пыӵаз ни тулыс коммунарской сборъёсты ортчытъян. Кутскизы соос 15 ар котыр талэсь азьло. Туэ ёросысь вить школа пыриськиз.

Тросэз дышетӥсьёссы та школаез ик быдтэмын, соос пӧлын директорзы Надежда Ивановна но. Дас ньыль визьнодась пӧлысь куинез гинэ палэнысь лыктэмын. Вань сюлэмзэс поно гуртооссылы мур тодон-валанъёс сётон, ӟеч адямиосты будэтон понна.

Адӟем карымон

Выпускникъёссы дышетсконзэс вузъёсын азинто, пыро Санкт-Петербургысь, Москваысь но мукет улосъёсысь институтъёсы, пӧртэм удысъёсын ужало. Вань федеральной судьяос но, адвокатъёс но.

- Кылем арын 11-тӥ классмы ӧй вал, нош вазьвала арын кык адями школаез йылпумъяз, кыкназы институтын дышетско. 2001-тӥ арысен куатез выпускникъёсмы школаез медален йылпумъязы.

- Конечно, городын кадь луонлыкъёсмы ӧвӧл, но киосмес ум лэзиське, ужаськомы.Тросэз шуг-секытъёс гуртын уж ӧвӧлэн герӟаськемын, семьяосын кошко. Куд-огез пиосъёс вахтае ветло. Нылпи садын туэ 12 пинал, кылем арын 21 вал на.

Одӥг липет улын

Школа юртын ик нылпи сад, библиотека но гурт администрация интыясько. Отчы ик пу коркась клубез выжтыны малпало.

- Тэромы, дыр. Дышетскыны гинэ медам люкетэ, - шуо дышетӥсьёс.

- Та юртэ 1983-тӥ арын выжимы, соку 800 котыр нылпиосмы вал, - тодаз вае Валентина Фефилактова. – Нырысетӥ толзэ юн кезьыт вал, пальтоосын пукылӥмы. Собере отопленизэ мукет сямен лэсьтӥзы, шуныт луиз.

Азьло школаез эгырен эстылӥзы, али пуэн шунско. Юртын укноос, ӧсъёс ӵыж вылесь.

- Полъёсмы уродэсь ни, соосты вошъяно на, - шуэ Надежда Ивановна. – Капремонтлы куриськон сётӥмы. Азьланезлы осконэн улӥськомы.