Ӵапак туннэ, 20-тӥ куартолэзе, А. А. Волковез буре ваён нунал: ньыль ар талэсь азьло со улонысь кошкиз. Но уно ӟеч ужъёсыныз, сайкытэсь мылкыдъёсыныз, кулэ визь-кенешъёсыныз кемалы кылиз шаермылэн улоназ, калыклэн сюлэмаз.

Ӟеч нимзэ но ужъёссэ али азьланьтэ ни пиез – Андрей Волков. Кун Кеншысь депутат, берло аръёссэ со ужа Яр, Юкаменск но Глазов ёросъёсъя. Толон вуылӥз Глазов ёросэ. Ужзэ мытӥз Качкашур школаысен. Ёрослэн тӧроеныз Вячеслав Сабрековен ӵош пумиськылӥз нылпиосын но дышетӥсьёсын. Буре вайыса, А. А. Волков сярысь фильмез учкизы. Нош собере Андрей Волков ачиз но вераз бубиз сярысь: макем со вал сюлмо, ужез но ужась адямиез гажась, улонэз но зэмос эшъёсты дунъясь. Кызьы пиналъёссэ ужлы дышетӥз, чурыт куронъёс пуктылӥз, котьмалы дышетӥз.

- Дышетсконмес но азьланьтыны со милемыз бадӟым каръёсы, кунгож сьӧры ӧз келя, ас вордскем музъем выламы мед уломы но кулэ луомы шуыса, - вера Андрей Александрович.

Пусйиз на: котьку но котькытын А. А. Волков Удмуртия но калыкез понна дур басьтылӥз. Ачиз тужгес но вылӥ малпанъёсын улӥз, соосты быдэстыны сюресъёс утчалляз но шедьтылӥз. Яратоно веранэз но, пе, вал: "Дорогу осилит идущий".

Пиналъёс, шӧдӥськиз, тунсыкен кылзӥськизы. Александр Александрович пумысен юанъёс но сётъязы.

Андрей Волков бӧрсяз улмопуос ваем. Выпускникъёсын ӵош соосты школа азбаре мерттӥзы, отчы пул юнматӥзы: А. А. Волковлы сӥзем аллея. Улмопуослэн вож ненег куаръёссы шуныт шунды пала кыстӥсько ни, будэмзыя кужым люкалозы. Кема но дыр уз ортчы, тулыс школа азбарез улмопу сяськаос шулдыртозы, соосты мерттэм пиналъёслы школа аръёссэс тодазы вайытозы, нош азьланяз – улмоен но шумпоттозы.

Та нуналэ ик Парзи школаын но та выллем уж радъяськиз: азбаре кедръёс мерттӥзы. Соосты озьы ик депутатмы ыстэм. Нош Штанигуртысь нылпи садлэн укноосыз улын сяськаялоз гортензия.