Марлы уз ни дышетэ
Но туэ школа берпуметӥ арзэ аграрной направлениея ужа. Та дырозь татын трос бакча емыш будэтылӥзы, пудо вордылӥзы.
Любовь Наговицына – директорлэн экономикая воштӥсез. Школа бере Асановоысь техникумын агрономлы дышетскем. Школаын 20 ар ӵоже ужа, хозяйство понна кыл кутэ.
- Трос техникамы вал: куинь трактормы, комбайнъёсмы. Школа дорын музъеммы 19 гектар котыр, 20 гектар колхоз висъялляз на. Бусые кизьылӥмы чабей, сезьы, трос аръем турынъёсты. Пудо сиён дасян бордын быдэс коллектив тыршылӥз. Гидмы вань, скал вордылӥмы, парсь пиятылӥмы, калыклы вузаллямы. Пороз парсьмы быдэс гуртлы яралляз, первый парень на деревне вал. Кыскем йӧлмес Кезысь молокозаводэ вузаллям, - мачке Любовь Николаевна. – Скалъёсмы вань на, но аграрной ум ни луэ бере, пудомес вузаськом ни. Теплицаосын, парникъёсын огреч, помидор будэтылӥм. Росодамы калыклы вузаны но окме. Каль тросэз пластиковой укнооссэс жаляло ни, асьсэос уг будэто.
Ас киосынызы поттэм продукцизы школалы бадӟым юрттэт вал. Куке-соку тросэз со школа столовойысь ӝӧк вылэ вуылӥз. Али, анализъёс лэсьтэм бере, будэтэм бакча емышъёссэс гинэ пиналъёс сиё на. Сӥль-йӧл магазинысь басьтэмез гинэ яра.
Азьло бакчаын, луд вылын, гидын асьсэос пиналъёс тыршылӥзы, но берло аръёсы соосты секыт ужъёслэсь мозмытӥзы. Пудоосты нимысьтыз адямиос утялто, вань механизаторзы но.
Программае пыртэмын вал "Основы животноводства", "Агрономия" предметъёс, со улсын дышетскисьёс тодматскылӥзы пудоосты утялтон, будосъёсты будэтон амалъёсын.
Коньдон асьсэос поттылӥзы, кытысь-мар потэ- пиналъёс умой валаллязы. Али ваньмыз воштӥськиз. Умойлы меда?
Быгатэмзы азьланяз яралоз
Леонид Петрович Дерендяев Турецкой школаын уно аръёс ини пиналъёсты киужъёслы дышетэ.
Яр педучилищеез йылпумъям егит дышетӥсь нырысь аръёссэ физкультурая но НВП-я урокъёсты нуиз, собере трудъёсы но ОБЖе выжоно луиз. Школаын 40 ар пала ужа ке, 34-ез мастерскойын ортчизы, шуыны луэ. Мастерской интыяськемын азьвыл начальной школаын, куинез ик классъёсыз уже кутӥсько: одӥгаз пиналъёслэн урокъёссы ортчо, кыказ станокъёсын ужало – пуэн но кортэн. Ваньзэ тае адӟыса, тодэ лыкто азьвыл гурт школаос, уга ӵапак таӵе мастерскойёсын пиос киужен выризы.
- Станокъёсмы вужесь ни, но ужало. Тӥясько, но нош тупатӥськом. Пуэн, кортэн ужаны быгатӥськом, но материал шедьтыны шуг луиз. Азьвыл аръёсы кӧня тылобурдо уморто лэсьтылӥмы! Балезино лесхоз арлы быдэ курылӥз, ачиз материал но вайылӥз. Школа азбарысь писпуосты но выль умортоос одно ик чебермаллязы. Али вужъёссэ тупатъяны-выльдыны выриськомы ик на. Туала пиналъёсты киужен турскон сокем ик уг ни бордаз кыскы. Нош азьвыл, урокъёс быро гинэ вал, пиосын ӵош нылъёс но татчы люкаськылӥзы, - вера Леонид Петрович.
Мастерскойын ми пырон вакыт 7-тӥ классысь пиос ужало вал. Кык нылъёссы нимазы ас ужен выро, нош вить пиос сапегъёсты миськон щёткаос дасяло. Дэри куазен соос туж кулэ луо.
Кызьы верало пиос, тужгес но кельше соослы станокен ужаны. Таизлы 6-тӥ классысен дышетско.
- Технологиын али теориез трос луиз, практикаен огмында час. Нош пиослэн станокез ужамзы потэ, мар ке кие кутымонзэ лэсьтэмзы, - валэктэ дышетӥсь.
Одӥгез валтӥсез ужзы – творческой проект. Со бордын арлы быдэ ужало: котькудӥз быръе аслыз кельшымон уж, быдэстэмез бере "защищать каре". Тани Гриша Назаров кызбугор лэсьтэм, Максим Дмитриев – шкатулка. Ас киосынызы лэсьтэменыз мамаоссэс но бабушъёссэс шумпоттозы.
Валай ини: мон – ас интыям
Озьы шуэ егит дышетӥсь Ольга Селезнёва. Нош куинь ар талэсь азьло, Глазовысь пединститутэз йылпумъяса, ужан удыссэ мытӥз вал чылкак мукет азьын.
- Школае мыноно яке ӧвӧл – та пумысен валантэмгес потылӥз. Балезиноын уж шедьтӥ но отчы кариськи. Одӥг пол, ӵапак выль дышетскон ар кутскон азьын, жингыртэ Турецкой школалэн директорез, ӧте доразы ужаны. Мон ачим та школаын дышетски, ноку ӧй малпалля вал берен татчы вуо шуыса. Мар кароно? Малпаськыны дыры уй сяна ӧй вал. Школа – бюджет чотын ужась организация, ужасьёсыз котыр ласянь утемын. Быръён лэсьтыкум, тӥни со луиз валтӥсен. Кема но дыр ӧз ортчы, валай ини: пиналъёсын, уката но бадӟым классъёсын дышетскисьёсын, ужаны мыным сюлэмыя, - шуэ Ольга Александровна.
Ӧнерезъя удмурт но англи кылъёсъя дышетӥсь луэ, но урокъёс нуэ ӟуч кылъя но литературая. Озьы ик солы оскемын воспитательной ужез радъяны. Вань улонэз кадь ини татын – школаын, пиналъёс пӧлын. Балезиноысь нуналлы быдэ ветлонлы но дышем ини, историен но математикаен дышетӥсьёсын ӵош лыкто-берто.
- Туала пиналъёс милесьтым пӧртэмесь ини: телефонэн люкиськылэмзы ик уг поты, книга лыдӟон соослы тунсыко ӧвӧл. Школаын сётэм визьнодъёс улоназы макем кулэ луозы, со сярысь чик но валанзы ӧвӧл. Ярам, классын одӥг-кык пинал тросгес тодон-валан люканы тыршись вань ке, кудӥз ке но соос сьӧры кыстӥськыны выре, - мылкыдъёссэ усьтэ егит дышетӥсь.
Нош тросэз нылъёс но пиос понна Ольга Александровна ачиз адӟем карымон луэ. Та школаысь потэмын, вылӥ образование басьтэмын, гуртын улонэз бадӟым карлы ӧвӧл воштэмын.