Глазов ёросысь "Октябрьский" эштосын валтӥсьёсыз ужъёс радэ пуктэмын техникаез выльдон.
Та ужлы ӟеч кутскон понэмын ни вал азьвылэз кивалтӥсьсы Николай Плетенёв дыръя. Туала выль техникалэсь кулэлыксэ валаса, валтӥсь инженерен Иван Максимовен ӵош тыршизы-сюлмаськизы.
Выль кивалтӥсьсы Александр Баженов но техникаез выльдонлы бадӟым саклык висъя. Туэ тулыс тани бусые потӥз кужмо Версатайл, со Алексей Сунцовлы оскемын. Та, пе, ньылетӥез ни таӵе тракторзы.
Рустам Касимов МТЗ-ен ужа, корт валэз солэн но туалаосыз радысь.
- Кабинаын кондиционерез вань, нокыӵе урод сюресъёс солы кышкыт ӧвӧл, - мылкыдъёссэ усьтэ воргорон.
Эштосын со ог кызё ар ни тырше. Алигес "Октябрьский" Гырон быдтон праздник лэсьтӥз, Рустам Касимов отчы тракторзэ адӟытонэ сямен пуктӥз: трактореныз со выль опрыскивателез ваем. Зэм но, Трубашур котырысь возь вылэ со нуналэ трос техника люкамын вал, отын ик Версатайлзы но мукет выль техниказы.
Гырон быдтонын шулдыръяськизы, табере октябрьскийёс выль кужымен пудо сиён дасян борды басьтӥськизы. Ужзы капчиен мед мыноз, малпанъёссы мед быдэсмозы!