Синмаськон но кузпалъяськон

Ог-огзэс соос пинал дырысенызы тодо, одӥг школаын дышетскизы. Пышкетысь шоръёзо школае Саша - Турчиноысь, нош Анжелика Кельдыкиысь ветлӥзы. Кыксы ик спортэн эшъяськизы, ӵош ӵошатсконъёсы пыриськылӥзы. Дыр вуиз – сюлэмъёсазы зэмос синмаськон ӝужаз, но висказы вал ни уно иськемъёс. Огез – Глазовысь, мукетыз - Асановоысь техникумъёсын дышетсконзэс азьланьтӥзы. Яратонзылэн тылыз эшшо юнгес на гомаз, пумиськонъёсты гинэ чидатэк витьылӥзы на.

Сюан шудэмзы бере, егит кузпалъёс Турчиноын улыны кутскизы. Со аре ик семьяязы бадӟым шумпотон пыриз – пизы вордӥськиз. Егит анай вань сюлмыныз-мылкыдъёсыныз вож нуныен турскиз, нош дипломен ӧнерчилы Александр Ешмеметьевлы та вакыт оскизы ни колхозысь фермаен кивалтыны. Яратоно кышноез, пизы кужым но мылкыд сётӥзы солы семьязэ но утьыны-вордыны, ферма ужъёс понна кыл но кутыны, дышетсконзэ но азьланьтыны – табере ини институтын. Берлогес Александр Владимирович валтӥсь зоотехник луыса ужаз, но эштоссы куашкамен, мукет удысэз радъяно луиз - пуэн турскиз.

Гыро-кизё, пудо вордо

2009-тӥ арын Ешмеметьевъёс Пышкетын пуктэм выль корказы пыризы, уже интыяськон пумысен соку Анжела ёрос центре вазиськем.

- Мон биржае султӥ, отысен ик мыным ӵектӥзы самозанятосте потыны: сыӵе программа, пе, вань, государство ласянь нимысьтыз уксё висъяське. Сашаен кенешимы но огкылэ вуимы: кутсконо, оскалтоно. Пудоен ми котьку но улӥмы, кема малпаськонэз ӧй вал. Вить скал вордӥмы, озьы йӧл, творог, йӧлвыл вузаны кутскимы, сыр но лэсьтӥмы. Лымшор палъёсын таӵе ужен кемаласьгес выро ни вал, нош ми татӥын – нырысьёсыз радын, дыр, луимы. Сиён-юонмес Юкаменске, Глазове нуллӥмы, пумен-пумен ас басьяськисьёсмы но люкаськизы, - тодаз вае Анжелика Георгиевна.

Быръем удыссы капчи ӧй вал, берганэз-тыршонэз уй-нунал окмылӥз. Но лэсьтоно ужед сюлэмыдъя ке, юрттӥсед-валасед вань ке – уж но мынэ, мылкыд но бурдъяське. Выльёсыз но малпанъёс-чакланъёс вордӥсько.

Кӧня ке аръёс ортчыса, Ешмеметьевъёс парсь вордон борды басьтӥськизы на. Фермер хозяйствозы табере гожтэмын но соин кивалтэ ини семьялэн кузёез Александр Владимирович. Ваньзэ ачиз лыдъя-чота. Кышноез – юрттӥсез, мылкыд сётӥсез, корка пушкы но азбаре-бакчае чеберзэ но кулэзэ пыртӥсез. Ешмеметьев кузпалъёс ассэ сярысь умоесь мылкыдъёс кельтӥзы, ӧжыт дыр куспын но шӧдӥськиз, макем шунытэсь кусыпъёссы, корказы шуд но яратон уло шуыса.

2019-тӥ арын Александр Владимирович пыриське фермеръёс пӧлын элькун вожвылъяськонэ но хозяйствозэ азинтыны 2 миллион манет грант утэ. Со уксёлы басьтӥллям ни трактор, погрузчик, кунянъёс. Та дыре скал, мумы парсьёс, кунянъёс вордо. 200 гектар вылын (со пайёссы но арендае басьтэм музъемъёссы) трос аръем турынъёс, чабей но сезьы, картошка будэто.

- Гырон-кизён, пудо сиён дасян но ю калтон ужъёсты Сашалэн двоюродной братэныз ӵош лэсьтӥськом-быдэстӥськом. Юртъерез тани, артысь сылэ, фермер хозяйствоез солэн трослы бадӟымгес, техникаез но уногес, - валэктэ кузё кышно.

Шумпотонзы но данъяськонзы

Выль корказы выжыкузы, Ешмеметьевъёс ньыль кузя ни вал – пиен но нылын узыресь. Илья нимлы укшасьсэ утчаса, нылзылы Илона ним сётӥллям. Будэмзыя соос но музъем бордын, пудо вордон ужъёсын юрттӥсьёс луизы.

- Ильямы котькыӵе ужын ӟеч юрттӥсь ни вал, аслыз но солы кельшиз. Вал вордэмез потэ на шуыса вералляз. Но армие кылиз ук, контракт амалэн али Псковын служить каре, спецназын. Отпуске бертылыкуз, кышнояськыса но вуттӥз, вуоно кузпалыныз соос кемалась эшъясько ни вал. Пимы Юкаменскысь спортъя школае ветлылӥз, отын ик дышетскемын кенмы но. Кыксы ик соос куасэн бызьылонъя спортысь мастере кандидат нимез басьтӥзы, - веранзэ азьланьтэ Анжелика Георгиевна.

Спортлы мылкыдзэ пизылэсь котьку но валаллязы, лӧпкытылӥзы. Пизы уно вормонъёсыныз шумпоттылӥз. Юкаменск ёрослэсь данзэ со утьылӥз гурт шудонъёсын но. Ильязы гурезьёстӥ но ветлыны мылкыдо, Эльбрусэ вуылэм ни.

Вынызлэн пытьыостӥз вамыштӥз Илона но. Нылаш мылысь-кыдысь тырше-дышетске спортъя школаын, тодмо тренер Николай Злобин дорын юнма.

- Бадӟым тау шуиськомы тренеръёссылы, соос пыӵато нылпиосмылы уно ӟеч сямъёс, спортын быгатонлыкъёссэс кыдатыны юртто. Азьланяз но спорт оскымон инъетэн луэ.

Озьы ик Илоналы сюлэмызъя творчество удыс, тужгес но – суредаськон но гожъяськон. Кудӥныз азьпал улонзэ герӟалоз, ӧз на бырйы, уга дырыз малпаськыны вань на.

Нош али, гужем каникулъёс дыръя, Илона муминыз ӵош бакчае потэ, сяськаосты утялтэ. Соос Ешмеметьевъёслэн котькытын лачак. Музъмен, будосъёсын турскыны кузё кышнолэн мылкыдыз бадӟым. Сяськаос пӧртэм-пӧртэмзэ мерттэ, но тужгес розаосты яратӥсько, шуэ. Туэ соосты радэн-радэн мерттэм.

- Туж ярало розаос. Куке быро но, нош басьтӥсько ведь, мылкыды уг пуксьы. Колоновидной яблокпуос будэтыны кутскимы, таосыз но кельшизы, - азьланьтэ веранзэ выль тодмомы.

Нош мон синйылтӥ на садысьтызы кыӵе ке йӧспӧртэм будосэз. Льӧмпулы укшась куаръёсыз, но пеймытэсь. Декоративной льӧмпу, пе, со. Сӥзьыл куаръёсыз чебересь буёлъёсын паймыто.

Кылдэмез но вуоноез

Выль корказы пыремзы Ешмеметьевъёслэн дасо арлэсь ятыр ни, ӝоген тани ӵошен улэмзылы но 25 ар луоз – азвесь сюан дырзы вуоз.

- Выль коркамы пинал ваеме потэ на вал. Со сярысь Сашалы верай, солэн но сыӵе малпанъёсыз вылэм, - вера Анжелика.

Таиз но малпанзы быдэсмиз ини. Корказы шунды пыриз - пичи Ильяна, соин ӵош – уно шумпотон, выль мылкыдъёс, выль малпанъёс.

- Капчи сюресъёс ми Сашаен ноку ӧм утчалэ, но со пумысен ӝожтӥськонмы ӧвӧл, озьы ини кылдэмын, вылды. Оскиськом, пиналъёсмылэн мукет улонзы луоз шуыса. Али ми понна валтӥсез – соос тазаесь мед будозы, яратонэз, гажанэз но ужез мед дунъяны быгатозы.