Сюрес вылэ машинаен потӥмы. Мынӥмы навигаторлы оскиськыса, но со вакытэ ик котыр сюресъёсты бырйыса. Вакчиосыз я уродэсь, я город пыр потто. Огъя вераса, Крыме кык сутка пала мынӥмы, берен - одӥг но ӝыны сутка сяна ӧз луы. Трос интыосын сюресэз выльдо, чакласькытэк ӧвӧл. Со сяна, котькытын ГАИ сылэ, юболы быдэ сямен камераос пуктылэмын. Кӧня меда "салам" вуоз ни?
Алушта — пичи город
Крыме выжимы уйин. Таврида - выль сюрес - вольыт, машинаез вӧй вылтӥ кадь нуэ. Котыр юг тылъёс ӝуало.
Улыны малпамы Алуштаын, Симферопольысен 60 иськем мыноно на. Улӥмы кык комнатаем квартираын, "Авито" пыр шедьтӥм, Алушта доры вуыкумы. Уй понна куро 3 но ӝыны сюрс манет, одӥг комнатаем квартира понна 2 но ӝыны сюрс. Сюрес дурын квартира дэмласьёслэсь юаса, дунэз уськытыны луэ, но ми вуимы уйин, таӵеослы дунэз уг уськыто. Умойгес луоз, 2 яке 1 толэзь азьло улон инты шедьтӥды ке. Оло дунтэмгес но, зарезьлы матэгес но сюроз. Ми утчаку, тросэз квартираос бронировать каремын вал ни.
Пичи городын улыны кельшиз. Пляжзы пичи, соин ик арня пумын ваньзэсты тодмаськод ни: таиз кышномурт Новосибирскысь, мукетыз - Москваысь, эмъяськыны лыктэм... Пляжзы из (галька) коже, пыдъёслы - массаж, пыдлонгес - векчи изо луо.
Асьме палась юген ӵошатоно ке, Крымын дунъёс ог 20 процентлы дуногес. Черешня, инжир кадьёсты ми басьямы уйин частникъёслэсь, соос бичам емышсэс сюрес дурын 2 поллы дунтэмгес вузало. Бензин дун сярысь уг ик вера, синкылиос пото: 1 литрез 50 манет котыр сылэ.
Котькуд сэрегын — история
Кыкетӥ нуналаз ик кошкимы Ялта пала, Ласточкино гнездо нимо двореце, Ай-Петри гурезе. Огзы бӧрсьы мукетыз городъёс вошъясько: Гурзуф, Артек, Никита, Ялта, Гаспра, Алупка... Но Крымын улӥсьёс вань та посёлокъёсты кык микрорайонлы люко: Вуж но Выль Ялта. Сюресъёс туж сюбегесь но икыр-кукыресь, сюлэм ик шуг луэ. Но инкуазьлэсь чеберзэ кылын уд вера, фотоосысь но сое лулыныд уд шӧды, сое ас синмыныд адӟоно!
Ласточкино гнездо бере кожимы Юсуповский двореце - Крымын туж трос сыӵе юртъёс: Воронцовский, Ливадийский, Массандровский. Юсуповский дворецын, кылсярысь, Ялтинской конференция дыръя улэм советской делегация. Пырон дунъёс куртчылӥсько - одӥг билет сылэ 800 манет, эшшо машина пуктон инты понна тыроно на.
Ай-Петри 1 234 метр ӝужда, отчы тубтэ но васькытэ гозы сюрес. Сое лэсьтӥллям Совето вакытэ, военнойёслы сиён-юон ӝуткан понна. Билет тубыны но, васькыны но нимаз басьтоно: 400 манет. Ми тубыны малпамы экскурсионной газелен. Тыримы 500 манет, но со понна адӟимы на Учан-Су ("Лобӟись ву") водопадэз, Азвесь беседкаез но трос мукет интыосты. Нош канатной будкаысен, нюлэс сяна, номыр уг адӟиськы.
Тубимы Бахчисарае нуись сюрестӥ. Сое но лэсьтӥллям военноёс, ог 20 аръёс ӵоже, тросэз кынмыса, сютэм улыса кулылӥллям. Кызьыгес меда лэсьтоно шуыса, кема малпаськиллямтэ, лэзиллям осёлэз - та визьмо пудо-живот аслыз котьку, пе, капчи сюрес быръе, кызьы со кожылэм, озьы ик, пе, сюрес лэсьтӥллям (зэм но озьы-а вал, кин тодоз на). Сюрес туж кышкыт, сюбег: кӧт шурдэ, меӵ вадьсытӥ мынӥськод ке.
Бур палан - шайвыл. Улӥын, му вылын, будо виноградъёс, шайёслы инты висъяло гурезь йылын. Соос пичиесь гинэ, ӵемысь луыло обвалъёс, оползеньёс шайёсты гылтыса нуо.
Тани Учан-Су - Лобась Ву - водопад усе. Ог 50 метр кемысь ваське. Ми лыктон азьын ик татчы изъёс усизы, соин ик дораз пырыны ӧм быгатэ. Ялтаын ӵапак та нуналъёсы кӧшкемыт зориз.
Бур палан ик гурезе тубе эмчилэн С. Боткинлэн туберкулёзной сюресэз. Крымской нюлэс йӧнатэ пӧртэм висёнъёсты. Сое тодыса, тодмо врач С. Боткин пиезлэсь туберкулёззэ кык арня куспын йӧнатэм. Нюлэстӥ поръяса гинэ! Крымын будӥсь пужым, пе, эфиръёсты поттэ, кудӥз туберкулёзной палочкаез вие. Эшшо татын будэ Ягодный тис. Солэн вуэз адямилэсь сюлэмзэ лябӟытэ но вие. Екатерина II, пе, кинэ ӧз яраты, кузьмалляз ягодный тислэн вуэныз пыӵатэм книга. Адями книгаез лыдӟе ке, кулэ.
Дугдӥмы ошмес дуре, юзмыт вузэ веръямы. Удмуртиысь ошмес ву трослы ческытгес. Крымын со зор ву, лымы шунам шӧмо. Тазэ ошмесэз гурезьысь гумы кузя поттӥллям, пичи тыметэ вияттӥллям. Та выллем тыметъёс кулэ вал, пе, тылпуосты кысылыны. Ӝуась нюлэсэз зарезьысь сылал вуэн кисьтад ке, со бӧрсьы, пе, кема аръёс ӵоже номыр уг буды ни.
Огдырлы дугдӥмы Азвесь (Турецкой) беседка доры. Со бигер тусо: тузӥ но чильтэро, толалтэ гӧртэ ке, шунды улын азвесь кадь чиля, пе. Татчы дугдылыны яратэ вылэм Николай II. Татысен гурезьёс, Ялта но зарезь туж чебер усьтӥсько.
Мырдэм вуимы Ай-Петри гурезь йылэ. Гурезь йылын - паськыт возь. Кыдёкын адӟиське военной база, писпуос пӧлын куштӥськем ӝужыт юртъёс сыло. Совето вакытэ татын тӧллэсь электричество поттыны туртто вылэм, пуктылӥллям генераторъёс, но огез но соос кужмо тӧлъёсты вормиллямтэ, тӥяськиллям. Ма, писпу йылъёс гинэ но татын чисто чигтылэмын.
Гурезь йылысь музъемез Россиысь огез банк басьтэм, горно-лыжной курорт, пе, пуктоз.
Крымской бигер но удмурт
Мынӥмы Джур-Джуре. Машинаен, пе, отчыозь уд тубе, кутӥмы уазик. Дунъёс кӧшкемытэсь. Куинь иськемез ортчон понна 2 сюрс манет! Ярам ни. Водительмы - крымский татарин.
- Украина дыръя, - шуэ Абазер, - Белоруссиысь, Молдавиысь, Европаысь туристъёс трос вал, али границаез выжыны секыт, кема возё. Соин берло дыре Россиысь туристъёс гинэ вуо. Таосыз уксёзэс зол лыдъяло. Дунъёс кӧшкемыт будӥзы. Азьло 100 гривна (ог 300 манет) тыр кӧт тырымон басьяськиськод вал, али 1 сюрс манет уг тырмы. Ӵужкушман гинэ килоез 100 манет сылэ! Соин ик гурт калык выльысь пудо вордыны кутске ни.
Абазерлэн ньыль пиосыз, ачиз туристъёсын ужа ке, кышноез мамаеныз пыжисько, пыжиськемзэс базарын вузало.
- Быдӟым ож дыръя, - мачке Абазер, - Крымысь бигеръёсты поездэн Узбекистанэ келязы. Тросэз сюрес вылын кулӥзы. Песянаелы (алигес кулӥз, 100 ар тырме вал ни) соку 14 арес вал. Шӧйёсты сюрес дуре ик куяллязы, шуэ. Нош песятае соку войнаын вал, ож быриз, гуртаз бертэ но, кышноез но, нылпиосыз но ӧвӧл. Юалляськыса-юалляськыса, семьязэ Узбекистанысь шедьтӥз. Нош Керчь вадьсысь одӥг шормуӵысь бигеръёсты вунэтыса кельтӥллям. Соосты берло баржае пуктыса зарезьын выйтӥллям. Быдӟым ож дыръя кин ке пӧлысьтымы немецъёс пала кариськем, со понна Сталин вань калыкмес ӧз яраты. Кулэм бераз калыкмы выльысь вордскем палъёсаз берытскиз.
Нош бигеръёс интые Крыме вайизы мукет калыкъёсты. Машинамылэсь "удмурт" номеръёссэ адӟыса, милемлы кин ке вазись луиз: - Ӟечбуресь!
Виталий Андреев туристъёсты уазикен нуллэ. Выжыосыз Сюмси палъёсысь. Быдӟым ож бере атайзэ семьяеныз ӵош Крыме келяллям, атаез уго американецъёс кие пленэ сюрем. Пичи дыръяз Виталий вуылэм на Сюмси палъёсы, но али ӵыжы-выжыосыныз кусып уг возьы ни.
Бертыкумы малпамы Анапае пыраны. Валтӥсь пляжын номыр карыны: калыкез тачак, интыяськыны нокытчы. Но нылпиосын умой вылэм: котыр луо, ярдурез меӵ ӧвӧл.
Ӝытсэ васькамы дикий пляже. Тани кытын зэмос зарезь вылэм! Пыд улын нушы быдӟа кӧльыос, ярдуртӥ чорыгъёс, медузаос уяло. Шутэтскисез, 3-4 адями сяна ӧвӧл, ваньзы Анапаын улӥсьёс.
- Учке, учке, дельфинъёс тэтчало, - кошкыкумы, мышкамы кеськись луиз. Шунды улын чилясь тыбыръёссэс гинэ адӟимы на, кыдёкын.
- Тӥ асьтэос Анапаын улӥськоды? - юасько вазиськем воргоронлэсь.
- Кыкетӥ арзэ ни, - шуэ. – Ачим Кемеровоын вордскемын, ужай Якутиын шахтаын, зарни утчай. Пенсие потӥм но кышноеным Анапае улыны лыктӥм, квартира басьтӥм. Пие но, нылы но квартира татчы басьтӥзы ни.
Воргорон кема вераса улӥз на Анапаысь чебер интыос сярысь, ӧтиз милемыз но та пала улыны. Квартираоссы Ижынлэсь трослы ик дуногес уг сыло. Но удмурт сюлэмлы матын салкым нюлэсъёс, ӝужыт писпуос, юзмыт ошмесъёс но бакча!