Статистика возьматэ: коронавирусэн висисьёслэн лыдзы берло дыре нуналмысь йылэ, но кышкыт черлэсь прививка лэсьтӥсьёс но пумен тросгес луо.
Роспотребнадзорлэн ивортэмезъя, элькунамы коронавирусэн черлам 43 сюрслэсь ятыр учыр шараямын, 35336 висисьёс бурмизы, нош 1347 адями улонысь кошкиз. Инвожо толэзе гинэ суткаяз ог 50 мурт кышкыт висёнэн черлаз ке, берло нуналъёсы лыдпус 200-эз ортчемын ни. Соин но выльысь усьтэмын ни ковидэн секыт висисьёсты йӧнатон понна койкаос. Вань соос Ижын, Можгаын, Воткинскын, Глазовын, Сарапулын но Дэри черкогуртын.
Югдур кышкатэ, соин адямиос но чырмытгес кутскизы ни прививка пуктылыны. Эмъяськонниосын сяна, та уж радъямын интыысь интые ветлӥсь мобильной пунктъёсын но. Одӥгез ужа Ижысь Шор площадьын, со ӵукнаысен бер ӝытозь усьтэмын. Озьы ик прививка лэсьтыны быгато Тазалыкъя форум ужан дыръя но, али сыӵе ужрад ёросъёсын ортче. Кемалась ӧвӧл со радъяськиз Глазов ёросын, вазьнал Красногорскын ужаз.
Вакцинацияя быдэс курсэз ортчемын ни ог 250 сюрс адями, нош оглом та лыдпус бадӟымгес - 322420 муртлы вакцина пуктэмын.
Та дыре прививка лэсьто ини куинь пӧртэм вакцинаен. Кык пол пуктӥськись "Спутник Ви" но "ЭпиВакКорона" вакцинаос сяна, поттэмын одӥг пол пуктӥськисез – "Спутник Лайт", сое шаерысьтымы 10 сюрслэсь ятыр муртлы лэсьтэмын. Таӵе вакцинаосты уже куто Глазов ёросысь Качкашур гуртысь ФАП-ын но.
Фельдшер Татьяна Данилова котькудӥзлы жингыртэ-ивортэ, тодэ уськытэ, лыктон дырзэс вера. Нырысетӥоссэ вакцинаосты Качкашурын пуктылӥзы гурт эштосын ужасьёс, март толэзе соос доры нимысьтыз мобильной пункт вуылӥз. Кыкетӥзэ но куинетӥзэ та ужез фельдшер ачиз радъяз ни инвожо но пӧсьтолэзьёсы. 16-17-тӥ гудырикошконэ мылкыд карисьёсты нош ӧтьылӥз гуртысь эмъяськонние. Тани одӥгез воргорон чугун сюрес вылын, пе, ужасько, прививка лэсьтонлэсь кулэзэ ачиз но валам ни.
- Мон нокыӵе прививкаос уг лэсьтылӥськы, но тазэ – улон косэ ни. Уже сыӵе – трос калык но пиналъёс бордын, - шуэ артэ сылӥсь кышномурт.
Кыксы ик соос "Спутник- Лайт" выль вакцинаез бырйиллям, прививка пуктэмзы сярысь сертификатъёссы но киязы ни.
Матысь тодмоелэн нылыз озьы ик дышетон удысын ужа, солы "Спутник Ви" пуктӥллям.
- Асьме эмъяськонниын прививка соку уг на лэсьтыло вал, нош мынам отпускын дыръям та ужез быдэстэме потӥз. Пыри "Госуслуги" сайтэ, прививка лэсьтыны гожтӥськонлы буш укноос вал – тупась нунал бырйи но карысь Калинина урамын интыяськем эмъяськонние мынӥ. Вакцинаез ачим ӧй бырйы, маин ужало, сое ик пуктӥзы. Со нуналэ температурае 38-озь ӝутскылӥз, но со сяна номыр сыӵезэ-таӵезэ ӧй шӧды. Табере кыкетӥзэ но компонентсэ пуктӥ ни, - вера со.