И. А. Наговицын - Удмуртилэсь кунлыксэ кылдытӥсьёс пӧлысь одӥгез луэ. Озьы ке но, дано муртлэн нимыз, оло, воксё вунысал, Валентина Хазиахметова сое улӟытон борды лулысь-сюлмысь ӧй ке кутскысал. Солэн но юрттӥсьёсызлэн тыршеменызы Иосиф Наговицынлэн нимыз элькунамы выльысь улӟиз.
Алексей Загребин, Россиысь Кун Думалэн депутатэз:
- Кык дано удмурт пиос, кык пӧсь сюлэмъёс, лымшорысь Трокай Борисов но уйпалась Иосиф Наговицын валче ужазы, вань удмуртъёсты огазеян понна. Ӧй вал сюресъёс, лымшор но уйпал удмуртъёс ас понназы, люкиськыса улӥзы. Кык батыръёс азьын сылэ вал бадӟым ужпум: удмурт улос кылдытон.
Иосиф Наговицын ортчиз ссылкаосты, кунмылэн пӧртэм сэрегъёсаз вуылӥз, но бертӥз вордскем палъёсаз. Ортчизы аръёс, но солэн куараез али ке но ӧте милемыз: "Ми - удмуртъёс. Азьлань!".
Татьяна Ишматова, "Удмурт кенеш" огазеяськемлэн тӧроез:
- Йыбырттыса тау шуисько туктымъёслы, аспалдэс Иосиф Наговицынэз гажамды, данъямды, ужзэ азинтэмды, улон сюрессэ туала егитъёслы вуттэмды понна. Со возьматэ, макем тӥ гурттэс, ёростэс, шаердэс дунъяськоды. Улон интыдэс шулдыргес, умойгес карыны турскиськоды. Нош пичи ужъёс бордысь пото бадӟымъёсыз.
Валентина Хазиахметова:
- Мон асме шӧдӥсько туктым нылэн. Татын улӥзы мынам выжыосы. Асьмеос ӵош бадӟым уж лэсьтӥськомы, Туктым гурт но Иосиф Наговицынлэн нимыз мед улозы шуыса. Та гуртын улӥзы кибашлы адямиос, трос вал дышетскем муртъёс но. Озьы верало архивысь документъёс. Оскисько, асьме тыршеммы гуртлэсь данзэ нош ӝутыны юрттоз шуыса.
Дано гуртозылы туктымъёс сӥзё кылбуръёс, кырӟанъёс.
Иосиф Наговицынэз дунъяса но гажаса, люкаськемъёс стенд доры сяська понӥзы.