Глазов ёросысь Удмурт Ключи гуртысь 14/07 номеро быръён участок 8 часысен ини ӧсъёссэ усьтӥз. Быръёнъёслы татын ваньмыз дась. Пандемиез чакласа, куара сётон залэ пыронын ик котькудӥзлы маска, перчатки но ручка сёто, температуразэс эскеро.
- Куара сётыны лыктэм муртлы 4 бюллетень сётӥськомы: кыкезъя – Кун Думае партиез но нимаз адямиез быръёно луо, кыкезъя – ёросысь Депутат Кенеше, озьы ик партиез но нимаз адямиез. Калык ӵукнаысен ик лыктэ ини. Ключиос сяна, ми доры лыкто Педоново, Горлица но Тукбулатово гуртъёсын улӥсьёс. Озьы ик та пичи гуртъёсын ватсаса куара сётон радъяськомы, комиссиысь кыкез ужасьёсмы но одӥг наблюдатель туннэ Тукбулатовое потэмын, отын ужало. Туннэ понна кызьлэсь ятыр куриськонъёс вань ни ас доразы куара сётыны мылкыд карисьёслэсь.
Быръёнъёс – туж кулэ но бадӟым ужрад. Оскиськомы, улӥсьёсмы мыло-кыдо пыриськозы, куаразэс кин понна сётыны соослэн дырзы малпаны вал, агитаторъёс но чырмыт ужазы, - валэктэ быръёнъёсъя комиссилэн кивалтӥсез Татьяна Худякова.
Тукбулатовоысь Александр Мальчаков 8 часлы быръёнъёсъя участокын вал ни. Со нырысетӥез бырйисен луиз. Егит пияш ужа "Коммунар" СПК-ын, но та нуналъёсты куара сётон участокын ортчытэ, малы ке шуоно ёросысь Депутат Кенеше кандидат Дмитрий Целоусов солы оскем наблюдатель чотын ужаны.
- Быръёнъёсы мон, кызьы 18 арес тырмиз, пыр ветлӥсько. Туннэ но, нырысь ик, куараме сётӥ, собере тани наблюдательёслы висъям интыын эскерыса пукиськомы. Ваньмыз каньыл, кулэезъя мынэ. Нокыӵе валантэмъёс, ченгешонъёс ӧвӧл, - шуэ Александр.