Коронавирусэн сэрен Удмуртиын вуоно арняысен выль лэчыт куронъёс юнматэмын. Та сярысь Оперштабын вераськизы. Премьер-министр Ярослав Семёнов верамъя, трос калыкен ужасьёслы одно ик вакцина пуктыны косэмын луоз.
Сыӵе категориосын списокъёсты дасялоз Тазалыкез утёнъя министерство Роспотребнадзорлэн элькунысь управлениеныз ӵош.
11-тӥ коньывуонысен трос калыкен герӟаськем ужрадъёс - соос пӧлы пыро концертъёс но - уз ортчытъяське. Та муген Глазов ёросын уз ортчы "Штат-базар", со декабрь толэзьлы выжтэмын. Со сяна, Глазовысь но уйпал ёросъёсысь учкисьёс уз быгатэ адӟыны "Айкай" ансамблез но Валентина Пудоваез. Та концертъёс матысь дыре луыны кулэ вал Глазовысь "Россия" культурая центрын. Жаляса верано - соос уз ортче.
Озьы ик, югдур тупатскытозь, мукет дырлы выжтэмын Ижын ортчись "Элькуновидение" ужрад но.
Вуз карон но шутэтскон центръёсын нылпиослы шудон сэрегъёс уз ужалэ, баръёс, кафеос но ресторанъёс уйлы 23-ысен 7 часозь ворсаськылозы.
Кар транспортын маскаосын ветлонэз кужмо чаклалозы. Куронъёсты тӥясьёс кылкутытэмын луозы.
Югдурез тупатыны юрттоз прививка гинэ
4-тӥ коньывуонлы асьме шаерамы 400 сюрс адямилэсь ятырез (вань улӥсьёсты чакласа, со 43,3 процентэз луэ) вакцинироваться кариськизы ни. Глазовын улӥсьёс пӧлын – котькуд куинетӥез прививка лэсьтӥз.
Тодэ уськытом, прививка пуктыны луэ Глазовын:
- Калинина 2 А урамысь прививочной пунктын;
- Т. Барамзина нимо урамысь МСЧ-41 поликлиникаын;
- ЧМЗ-лэн здравпунктъёсаз.
Со сяна, вакцинация ортчыто предприятиосын но ужъюртъёсын, озьы ик гуртъёсысь ФАП-ъёсын.
Глазовысь ёроскуспо больницаын нимысьтыз колл-центр ужаны кутскиз
Отчы жингыртыса, тодыны луоз сётэм анализъёсты, больничной басьтон, ковид-центрын кыллись ӵыжы-выжыосты сярысь. Озьы ик ковид-бригадаез доре ӧтчаны луоз.
Колл-центр ужа 8.00 часысен 19 часозь. Жингыртоно 8 (34141) 7-50-55 телефонъя.
Уйпал ёросъёсын улӥсьёслы валэктон сётъяны юнматэмын куать операторъёс.