"Удмурт кенеш" огазея" марафон улсын Иж бере куншетлэн сюресэз азьланьтӥське ни ёросъёстӥ. Чырмыт но шулдыр вамышен со дыртэ котькудӥз доры. Алигес гинэ вал Кезын, нош 1-тӥ коньывуонэ дуно эшез сямен сое пумитазы ни Балезино ёросын. Пиналъёс доры но вуылэм, бадӟымъёслэсь но ужзэс адӟем.

4-тӥ коньывуонэ пумен глазовъёс кие выжиз. Шуныт пумиськон ортчиз Балезино но Глазов ёросъёс вожын, куинь батыръёсын утиськись интыын. Тау балезиноослы: чебересь кырӟанъёсын шулдыртӥзы, вӧйен-нянен, ческыт пӧрамъёсын куноятӥзы. "Удмурт кенеш"-лэсь кулэлыксэ пусйыса вераськиз Балезино ёрослэн тӧроезлэн воштӥсез Елена Касимова. Огазеяськон уно ӟеч ужъёсыныз данъяськыны быгатэ шуыса вераз Лидия Иванова, со но та нуналэ дуно эшъёсыз пӧлын вал, уга 30 арлэсь ятыр кивалтӥз "Удмурт кенеш"-лэн Балезино ёросысь ёзэтэныз. Глазовысь кенешчиосын ӵош куншетэз пумитаны вуизы Глазовысь кар Думалэн но Глазов ёросысь Депутат кенешъёслэн кивалтӥсьёссы Игорь Волков но Сергей Буров. "Сюресэд вольыт, эшлыко но шулдыр мед луоз!" - озьы шуыса келязы куншетэз балезиноос.

Нырысь нуналаз ик куншетэз шумпотыса пумитазы карысь "Золотой ключик" нылпи садын, отысь коллектив мыло-кыдо ужа нылпиослы шаертодонъя тодон-валанъёс сётон бордын, удмурт дэремен герӟаськем ӵектосэз пыӵатэ. Вуриськись, дизайнер Валентина Пряженникова юрттэм улсын нылпи садын ужасьёс удмурт стилизованной дэремъёс вуризы. "Эмезе" коллекцизэс соос Глазовын гинэ ӧвӧл, Эгралан но, Лудорвайын но, Пичи Пургалан но возьматӥзы ни. Котькытын соосты умой мылкыдын, ӟырдыт кичабонъёсын пумитало. "Удмурт кенеш" огазея" марафонэ но нылпи садлэн коллективез мылысь-кыдысь пыриськиз.

Кыкетӥ нуналаз куншет Пӧжы гуртэ ширтӥз – удмурт культурая ёрос центре, шаертодонъя "Истоки" музее. Музейын ужась Антонида Бёрдова – уйпалась удмуртъёслэн движенизылэн одӥгез азьветлӥсез, соин ик со "Кенеш"-лэсь куншетсэ доразы куноятытэк ӧз кельты ни. Ӵапак со дыре гуртысь дышетӥсьёс, удысысь ветеранъёс Дышетӥсьлэсь нуналзэ пусйыны люкаськизы, озьы куншетэз дышетӥсьёсты сӥлы карон ужрадын но шуныт пумитазы.

Ми но, "Иднакар" газетын ужасьёс, куншетэз дорамы кунятытэк ӧм кельтэ. Ужъя сюрес вылэ потоно луиз но, сое сьӧрамы нуллӥмы, лыдӟисьёсмылы адӟытӥмы.

6-тӥ коньывуонэ эшшо одӥг пумиськон Яре нуись сюрес вылын радъяськиз. Кырӟанъёсын, перепечен витё ни вылэм дуно куноез. "Кенеш"-лэсь куншетсэ глазовъёс бускельёссылы сётӥзы. Табере со поръя ни Яр музъем вылтӥ, кудӥз узыр губиен но узыен, чебер нылъёсын но йӧно воргоронъёсын, усто ужасьёсын но данъяськымон удмуртъёсын.