ЧС режимъя ужазы

Кызьы вераз Ольга Абрамова, таиз ар гуртоослы секыт йӧтӥз: кӧс куазь тулыс бусы ужъёс бере кутскыса аранэз быдэстытозь ик кыстӥськиз. Юослы но, мукет культураослы но ӟеч-ӟеч будыны-пушйыны ӧз сёты. Планэз быдэстыны ӧз пӧрмы ни. Кылем аре элькунъя рекорд пуктэмын вал: 703 тонна ю тысь люкамын, нош туэ – 496,2 тонна, котькуд гектарысь – 17,5 центнер гинэ.

Тужгес но бадӟым урожай басьтӥзы алнашъёс – 49,1 тонна. Озьы ик азьветлӥсьёс пӧлын – Можга но Ува ёросъёс (45,6 тонна но 41,2 тонна).

Вылӥ урожай басьтэмзыя, уйпал ёросъёсысь гурт эштосъёс пӧлын висъяськиз Глазов ёросысь "Чура", кытын юос гектарысьтыз 24,3 центнер урожай сётӥзы. Лымшор палъёсъя азьветлӥсен луиз Сарапул ёросысь "Русская нива" ООО, отын котькуд гектарысьтыз 28,4 центнер люкамын.

- Куазен кылдэм югдурез лыдэ басьтыса, та лыдпусъёс - ӟечесь. Ужась коллективъёс вылӥ данъетъёсын сӥлы карымон тыршизы, эштосъёс Удмуртилэн Тӧроезлэн Таукаронъёсыныз пусъемын луозы.

Рапс но етӥн будэтӥсьёс кӧс куазен сэрен озьы ик трос ыштонъёс адӟизы. Толлы пудо сиён но туэ ӧжыт люкамын. Планъя котькуд пудо йырлы 25 центнер чакламын ке вал, лыдпус 20-озь сяна вуымтэ. Ӵошатон вылысь: кылем аре 32 центнер вылэм.

- Кылем арлэн запасъёсыз юрттозы ни вуоно урожайозь возиськыны. Но югдур хозяйствоосын пӧртэм: кытын толэз огсыр потозы, кытын нош выль арозь но уз тырмы, - шуиз министр.

Асьсэос но сюлмасько

Гурт удысын тыршисьёслы кун ласянь юрттон вылысь пӧртэм амалъёс кутӥсько, соос ӧжыт ӧвӧл. Котькудӥз сярысь Ольга Абрамова тупен-тупен вераз. Кылсярысь, элькунамы палэнысь ваем ю тысь понна чугун сюрес вылын кутӥськись тарифъёс обнулить каремын луозы. Со сярысь Россиысь правительстволэн постановлениез вуоно толэзе кутэмын луоз. Сыӵе ик куронэн Удмуртия правительстволы вазиськиз пудолы жмых но шрот ваем понна.

- Та дыре дасясько на документъёс пудо сиён басьтэмзы понна субсидиос висъян пумысен. Со силос, сенаж, комбикорм понна висъяськоз. Оскисько, огкыл матысь дыре гожтэмын луоз но арлэн пумозяз уксё вуоз. Таиз чылкак выль юрттэт, уже кутэм уксёез 50 процентозь берыктыны чакламын, - валэктэ Ольга Абрамова.

Гурт эштосъёс асьсэос но чырмыт тыршо, урожай басьтонэн герӟаськем ыштонъёс мукет ыштонъёсозь медаз вуттэ шуыса. Сюлмаськизы дыраз лымы улэ кизьыны, соин валче толйись юос улэ музъемъёсты но йылэтӥзы.

Йӧл тросгес потто

Шаерысьтымы пудо вордӥсьёслэн йӧл кысконэз будэтонъя лыдпусъёссы Россиысь тужгес ӟечъёсыз радын луо. Туэ 9 толэзь ӵоже йӧлъя лыдпусъёс 6,5 процентлы йылэмын. Кылем арен ӵошатыса, со 40 сюрс тонналы тросгес. Та удысын пусйымон тыршо Вавож, Шаркан, Можга но Алнаш ёросъёс.

Удыслэн кивалтӥсез Ольга Абрамова пудо вордӥсьёс азе ужпум пуктӥз: йӧл будэтонэз вуоно аре но азьланьтоно.

Туспуктэмез "Агропром Удмуртии" журналлэн "ВКонтакте" огинысьтыз.