- Ксениямылы арес но кык толэзь гинэ вал, Глазовысь малюткалэн юртысьтыз басьтыкумы, - мачке Елена Вениаминовна. – Уг но вераськы на вал. Али укмысэтӥ классын ни. Тямыс арес дыръяз эшшо кык ныл басьтӥмы на. Ксюшалэн гуртын эшъёсыз ӧй вал, весь огназ. Тодӥмы, Граховоын пиналъёслы семья кулэ шуыса. Мынӥмы тодматскыны, нош бертӥмы ни ӵош – Аняен но Ленаен. Соос приёмной семьяын уло ни вылэм, но маке соосыз отказтӥллям, ум, пе, быгатӥське. Петя пие шуиз, жаль ук, пе, нылъёсты, айда ум ни кельтэ. Машинае пуксьыкумы ик юазы, луоз-а "мам" но "пап" шуыны. Ваньзы "мама", "папа" шуо.

Озьы Дряхловъёслэн семьязы будӥз-йылӥз. Али куать кузя уло, бордазы арлыдо анайзы, нош кык пиоссы карын семьяос кылдытӥзы.

- Пиосмы нылъёсты вордскем нуналъёсазы, праздникъёсы ӵем Глазове, Иже нуллылӥзы, каль уггес ваньмо – кыкназы корка пукто. Милям ведь внукъёсмы но вань ни.

- Нылъёсын огкыл шедь- тӥськоды-а?

- Юн ӟечесь соос милям. Котьмар но каро. Пыжиськыны ярато, животэн турско, бакчае но пото. Ксюшамы трос лыдӟиське. Ачиз но кылбуръёс гожъя, маде.

Дряхловъёс шуо ке но, трос пудо-живот уг вордо шуыса, ичи но ӧвӧл. Асьсэос парсь пиято, куакеч, ӵӧж, курег, курка возё. Бакча сиён 50 сотка котыр музъем вылын будэто. Нош али бадӟымез пизы муш вордыны кутскем на. Вань ужъёсты ӵошен быдэсто. Диван вылын кыллисез, компьютер азьын пукисез ӧвӧл.

- Кызьы вераськиськоды? Ӟуч-а, удмурт-а?

- Ксюша удмурт вала, бабушез удмурт вераське, а Лена но Аня ӟуч сямен гинэ.

Елена но Аркадий асьсэос егит дырысен спортэн эшъяськылӥзы, пӧртэм ужрадъёсы пыриськылӥзы, сыӵе ик мылкыд пиналъёссылы но пыӵато.

Ксения, Аня но Лена ӵошатсконъёслэсь, конкурсъёслэсь, концертъёслэсь палэнэ уг кылё. Куиньназы нылъёс Пышкет школаын дышетско. Нуналмысь соосты школа автобус олань-талань нуллэ. Соос сяна, гуртын дышетскисьёс ӧвӧл ни.

- Ваньмон дырдэс кызьы ортчытӥськоды?

- Милям со уг луылы. Мон клубын кочегаром ужасько. Мужике корка котырын турске, пилорама возе, пиосмылы лэсьтӥськыны юрттэ. Нош ӝытазе гуртын, семьяен пукем потэ ни.