Выль кылдэм секциын ужаны дасесь мыло-кыдоос люкаськылӥзы но кенешизы ни чаклано-быдэстоно ужъёссы сярысь. Ваньмыз соос герӟаськемын Туктым гуртэн – калык комиссарлэн но Удмуртилэсь кунлыксэ кылдытон бордын тыршем И. А. Наговицынлэн вордскем гуртэныз
Нош землячество кылдытонлы кичӧлтон сётӥз Валентина Хазиахметова, дано бӧлякенымы одӥг выжыысь луись кышномурт. Кӧня ке аръёс ини со бадӟым уж нуэ дуно ӵыжы-выжыезлэсь нимзэ пыраклы историе кельтон понна, соин валче Туктым гуртлы азинскыны юрттон вылысь.
- Отын ӧй ке но вордскы-буды, Омутницаез пичи родинаеным лыдъясько. Ваньзэ, мар лэсьтӥсько, со одӥг малпанэн – Омутницалы юрттыны: мед сое тодозы, мед со сярысь ӵемгес вералозы, адӟыны-вуылыны мылкыд карозы. Нош со понна асьмелы ваньмылы огъя кужымен тыршоно гуртлэсь историзэ но улӟытыны, туссэ но воштыны, - шуиз Валентина Серафимовна кенеше люкаськемъёслы.
Та бадӟым малпанэз улонэ пыӵатон вылысь Валентина Серафимовна, истори наукаосъя кандидат, кема аръёслы чаклам проект дасяз. Нырысьёсыз пусйымон ужъёс пӧрмизы-быдэсмизы ни, соос сярысь газетын но гожъямы. Проект ужалоз туэысен 2029-тӥ арозь - ӵапак соку Туктым пусъёз 400 аръем юбилейзэ.
"Омутницкое землячество" азьын али сыӵе ужпум: кин улӥз, кин та вакыт улэ Туктымын, кинлэн выжыез отысь – ваньзэс шедьтыны, огазе люканы. Кызьы тодмо истори кагазъёсъя, куке но та гуртын сюрс пала улӥсьёсыз вылэм. Озьыен, Туктымысь потэмъёс Удмуртиын но трос, солэн палэнъёсаз но. Котькудзы быгатозы кыӵе ке иворен, тунсыко материалэн яке ӵектонъёсын юрттыны. Кусыпъёсты тупатыны одӥгез амал - уже интернетэз кутыны.
Озьы, огъя кужымен но мылкыдын кыкетӥзэ бадӟым ужез радъяны: нимын-тулын шедьтыны ваньзэ туктымъёсты, кин Быдӟым атыкай оже пыриськиз. Озьы ик ивор утчано-шедьтоно "За доблестный труд в годы Великой Отечественной войны" медален данъямъёс сярысь. Ужез валаса но ӝог радъян вылысь землячествое пыремъёс кыклы люкиськизы: Глазовъя ужен кивалтоз карын улӥсь Юрий Перминов, нош ёросъя – Туктымысь Людмила Куртеева. Тодосъя (научной) кивалтӥсен быръемын Валентина Хазиахметова.
Кызьы кенешисьёс пусйизы, ивор люканы та дырлы куинь пӧртэм ӧръя луоно: "Книга Памяти Удмуртии" - отын 76 туктымъёслэн нимъёссы вань, военкоматлэн архивез но Октябрьскойысь лыдӟетъюрт.
- Быдӟым ожын быръемъёсыз но, ожысь бертэмъёсыз сярысь но, материалъёс люкан бордын ми дасо ар ӵоже ужамы. Ваньмыз ивор Октябрьскойысь библиотекамылэн сайтаз поттэмын. Малпасько, со кулэ инъетэн луоз али ужмес азьланьтон понна, - пусйиз библиотекалэн кивалтӥсез Валентина Шудегова.
Войнаын ожмаськемъёслэсь но фронт мышкын геройлыко тыршемъёслэсь нимъёссэс пыраклы вунонтэм карон понна Туктыме синпелет пуктоно. Сыӵе малпанэн уж борды басьтӥськиз "Омутницкое землячество".