Глазкар пединститутын Йӧскалык политикая министерстволэн кичӧлтэмез улсын арлы быдэ радъясько удмурт кылъя курсъёс. Туэ но 16 адями мыло-кыдо басьтӥськиз удмурт кылмес дышетон уже.
Пӧртэм арлыдо, профессиё калык лыктэ дорамы. Соос пӧлын студентъёс но, дышетӥсьёс но, журналистъёс но, пенсионеръёс но. Котькудӥз ас мугеныз вуэ. Арлыдоос ӵемысь пусъё, пересьмыса гинэ валай, кызьы кыске анай кылы бордаз шуыса. Студентъёс школаын ужанэн герӟало: удмурт нылпиосты дышетыку кылэз тодӥд ке, соосын огкыл ӝоггес шедьтыны быгатод. Удалтӥз туэ англи кыллы дышетӥсьёсын. 6 номеро гимназиысь кык Татьянаос вуизы.
Эшшо но паймытӥз Елена Анатольевна Ворончихина. Удмурт нылкышно вить кыл тодэ. Но, жаляса верано, вордскем кылыз отчы уг пыры. Соин ик дышетыны малпам. Эшшо Елена вераз на, та дыре улонысьтыз трос люкетсэ Барселонаын, Испаниын ортчытэ шуыса. Отын котькуд кыл тодэмлы уждун будэто. Вот озьы луэ ини, мукет кунъёс дунъяло трос кыл тодӥсьёсты. Оло асьмелы но, удмуртъёслы,
удалтоз?
Курсъёс йылпумъяско ини, но оскисько, тулыспал вылез ужанзэ одно кутскоз шуыса.