Öйди öй солуп, тöрöл школыс канча ÿйени билгирдиҥ телекейиле таныштырып, кийнинде jÿрÿмниҥ jаан jолына ÿйдежип артат. Мында бистиҥ кару ла эрке jаш öйис артып калгандый. Байла, оныҥ да учун юбилейлик байрамга школды башка-башка öйдö божоткон кöп тоолу ÿренчиктер келип, быйанду ла уткуулду алкыш сöстöрин акту кÿÿнинеҥ учурлап айттылар.
Школдыҥ байрамына аймактыҥ ÿредÿлик башкартузыныҥ jааныныҥ ордынчызы К.А.Меркулеев, аймактыҥ ветерандар Совединиҥ, jондык биригÿлер Совединиҥ председатели А.А. Матыков, Кöзÿл jурт jеезениҥ jааны А.М. Ябыев, öскö школдордыҥ ÿредÿчилери, школдо узак jылдардыҥ туркунына иштеген ветерандар келдилер. Айдылган уткуулду сöстöрдö темдектелгениле болзо, Кöзÿл jурт су алтай тилдÿ jурт болуп jат. Оныҥ да учун jурттыҥ орто ÿредÿлÿ школында алтай албатыныҥ jаҥжыгуларын орныктырып, jаш ÿйеге ÿредер jаан иш öткÿрилет. Аймактыҥ администрациязыныҥ адынаҥ Константин Анатольевич уткуулду сöзин айдып, школго сый эдип, 30 муҥ салковойго Сертификат сыйлады. Jурттыҥ jааны Аткыр Михайлович тöрöл школына 20 муҥ салковойдыҥ Сертификадын берди. Аймактыҥ ветерандар Совединиҥ председатели Александр Айдынович алдында jылдарда аймактыҥ администрациязыныҥ ÿредÿлик аайынча бöлÿгининиҥ jааны болуп, узак jылдардыҥ туркунына иштеген. Оныҥ да учун Кöзÿл jурттыҥ школыныныҥ тÿÿкилик jолы керегинде куучынын jуулган улус jилбиркеп уктылар. Алдында jылдарда школдо иштеген ÿредÿчилерди, ишчилерди ончозын адап, кажызыныҥ ла ижин аҥылап темдектеп ийди. Темдектезе, школдыҥ директоры болуп, узак jылдардыҥ туркунына иштеген Василий Павлович Модоров ол öйдö балдарга математикала чыҥдый билгир берген ÿредÿчилердиҥ бирÿзи. Алтай тил ле литературала ÿреткен Татьяна Николаевна Яграшеваныҥ ачык урокторын алтай тилдиҥ ÿредÿчилери бийик баалап туратан. Тÿÿкиниҥ ÿредÿчилери Людмила Юдруковна Торушева ла Людмила Васильевна Кыдрашеваныҥ ÿренчиктери аймак ла республикан кеминде олимпиадаларда jаантайын чыҥдый билгир кöргÿзетендер. Орус тил ле литератураныҥ ÿредÿчизи Роза Николаевна Казакбаева ижине кöп jаҥы методикалык эп-аргалар тузаланып, jиит ÿредÿчилерди кöпкö ÿредип, ууландырган ÿредÿчи. География ла биологияныҥ ÿредÿчизи, база школдыҥ директоры болуп узак öйдиҥ туркунына иштеп келген Вера Содоновна Папитова школдо маала-ажын отургызар ишти эрчимдÿ баштап апарган, балдарды jаштаҥ ала ишке тазыктырган. Кажы ла ÿредÿчи ÿренчиктерине кöпти берген. Олорды ончозын тоолоп айтса, бÿткÿл бичик бичигедий. Александр Айдынович школдыҥ библиотеказына "Кан-Оозы аймак Ада-Тöрöл учун Улу jууныҥ jылдарында" деп эки том бичикти сыйлады.
Кöзÿл jурттыҥ орто ÿредÿлÿ школы 2011 jылдаҥ ала Социалистический иштиҥ Геройы Jелмек Тоедович Тоедовтыҥ адыла адалат. Узак jылдардыҥ туркунына школдо музей иштейт. Музейди тöзöп, тöрöл jурты, jерлештери керегинде материалды jууп баштаган ÿредÿчи Александр Викторович Матин. Оныҥ да учун музей бÿгÿнги кÿнде Александр Викторовичтиҥ адыла адалат. Александр Викторович качан билезиле Тыва jерине кöчö берерде, музейдиҥ ижин Людмила Юдруковна Торушева баштап апарган. Бу база бедиреништиҥ ле jаҥыртуныҥ öйи болгон. Бÿгÿнги кÿнде музейдиҥ ижин Ай-Сылу Викторовна Ютеева, Александр Викторовичтиҥ сыйны, билгир башкарат. Байрам кÿнде келген айылчыларга экскурсовод ÿренчиктер музейдиҥ тöзööчизи Александр Викторович Матин, школдыҥ тÿÿкизи, jурттыҥ тÿÿкизи, jуртта калыҥ сööктöрдиҥ бирÿзи ара сööк керегинде, школдо узак jылдардыҥ туркунына директор болуп иштеген Василий Павлович Модоров керегинде ле музейде тургузылган jилбилÿ эдимдери керегинде куучын айттылар. Айдылган кажы ла куучын шиҥдеер учурлу. Ай-Сылу Викторовна ÿренчиктерин jаштаҥ ала шиҥдеериле jилбиркедип турганы сÿреен jакшы ууламjы болгонын темдектеер керек.
Бу кÿн школдыҥ юбилейлик байрамына школдо узак jылдардыҥ туркунына иштеген ÿредÿчилер - педагогикалык иштиҥ ветерандары, öскö школдорыныҥ ÿредÿчилери, школды башка-башка jылдарда божоткон ÿренчиктери öскö аймактардаҥ, каладаҥ кÿÿнзеп келдилер. Jылу уткуулду, быйанду сöстöр ээчий-деечий айдылып турды. Школдыҥ ÿренчиктери ле ÿредÿчилериниҥ кöргÿскен ойын-концертин келген айылчылар изÿ колчабыжула уткып турдылар. Темдектеп айткадыйы – бÿгÿнги кÿнде школдо иштеп турган jиит ÿредÿчилердиҥ кöп сабазы бу ла Кöзÿл jурттыҥ jииттери. Тöрöл школына кайра бурылып, иштеги jолын мынаҥ баштадылар. Школдыҥ ÿредÿчилери "Кÿреелей" деп фольклорлык öмöлик тöзöп алгандар, эптÿ jараш jаҥарыла кöрööчилерин сÿÿнидирип, аймак та, республикан да мероприятиелерге jаантайын туружадылар. Школдо "Кÿзÿҥи" деп балдардыҥ биjелик ансамблин узак jылдардыҥ туркунына Арина Николаевна Елекова билгир башкарат. Алтай албатыныҥ jаҥжыгуларын орныктырар амадулу тöзöлгöн "Солоҥы" деп фольклорлык кружокты алтай тилдиҥ ле литератураныҥ бийик квалификациялу ÿредÿчизи Эльвира Робертовна Кызылова öткÿрет. Школдыҥ директорына Айсулу Александровна Ябыева кöстöлгöни удабады, jе школдыҥ ижин билгир ле чыҥдый баштап алганы билдирлÿ эмтир.
Школдыҥ байрамы бийик кеминде öтти. Байрам элкем-телкем, öҥжÿк öтсин деп амадап, тöрöл школына кöп улус болужын jетирген. Соколов Николай Васильевич ле Альчиков Адар Айабасович мал берген, Кабин Петр Иванович, Киндикова Галина Григорьевна, Тайтов Николай Иванович, Яграшев Амыр Михайлович, Ябыев Александр Темтишевич, Баталов Анатолий Ахмедович, Киндиков Эркин Александрович ле Дядяров Мерген Дмитриевич акча-манатла jöмöп, jаан болужын jетиргендер. Школдыҥ öмöлиги jерлештерине jаан быйанын айдып, мал-ажы кöптöп öссин, колы кокту болзын, алкы бойлоры су-кадык, айыл-jурты амыр jатсын деп кÿÿнзейдилер.
Тогузон jыл – ол бÿткÿл тÿÿки. Школ бу кире öйгö кандый ла солунталар кöргöн. Jе оныҥ тöс учуры – балдарга чыҥдый билгир берери – кажы да öйдö jарт ла чокум тургузылган. Мында канча ÿйениҥ сÿÿнчизи, каткызы, jаш öйи, салымы салынган. Кöзÿл jурттыҥ орто ÿредÿлÿ школына эрчимдÿ иш ле jаан jедимдер кÿÿнзейдис. Амадаган амадулар бÿдÿп, jаантайын школдыҥ jакшы ады угулып турзын!