Байырлалын чымыштыг иш-биле демдеглээннер.
Эрткен неделяның тѳнчүзүнде Таңды кожууннуң чонну ажылга хаара тудар тѳвүнүң тургустунганындан бээр 29 чыл ою болган. Байырлыг хүн Тѳптүң ажылдакчыларынга чымыштыг ишке эрткен. Олар Россияда, ооң иштинде Тывада чарлаттынган карантин үезинде тускай чурум ёзугаар ажылдап турарлар. Ажыл чок хамаатыларга кѳрдүнген деткимче акша тѳлевирлерин үе-шаанда шилчидип берип, оларга психологтуг болгаш эрге-хоойлу талазы-биле тайылбырлыг дуза чедиреринче угланган дээш, оон-даа хѳй чогуур ажылдарны чорудуп турарлар.
Ук албан чериниң бедик дуржулгалыг, харыысалгалыг болгаш шалыпкын ажылдакчылары бо хүннерде анаадаазындан каш катап хѳй хемчээлдиг ажылдарны кылып чорудуп турарлар. Бот-аңгыланыышкынны сагыыр чурумну сагывышаан, хамаатылар-биле интернет болгаш телефон дамчыштыр харылзааны тудуп турарлар.
Ооң мурнунда чылдарда олар мугур байырлалын албан бир онзагай кылдыр демдеглеп турганын сактыр боор силер. Ажыл-чоктар аразынга спортчу, культурлуг хемчеглерни, ажыктыг тайылбыр ажылдарын, оон-даа ѳске хемчеглерни чорудуп турганнар.
Чонну ажылга хаара тудар тѳптүң тургустунганындан эгелээш ам бо хүнге чедир ажылдап чоруурларның бирээзи - Ооржак Эмма Александровна. Ол ажылын бодунуң беш салаазы дег эки билир, аныяктарның дагдыныкчызы. Анжела Хемер-ооловна Оюн, Салбак Сергеевна Сартыыл олар база-ла ооң соондан чыда калбайн чоруп олурарлар. Саң-хѳѳ талазы-биле ажылдың "бажын билир" Оюн Ай-Суу Николаевна ажылынга харыысалгалыг, негелделиг, шынгыы ажылдакчы. Хүнден хүнче олар ажылын экижидип, билиин бедидип, хоойлу-дүрүмнүң чаа ѳскерлиишкиннеринден чыда калбайн турарлар. Тѳптүң чолаачызы Ооржак Монгун-оол Узутович Таңды кожуунда танывас кижи-даа артпаан деп болур боор. Чон ону Сергей акый дижир. Кожууннуң оруктарын ол кончуг эки билир, караңгыда-даа чазыг чокка халдып келир.
Хѳй чылдар иштинде ук албан черинде найыралдыг, эптиг-демниг коллективти Нурзат Урана Монгушовна удуртуп-баштап чоруур. Урана Монгушовна -ёзулуг кижизиг, бедик мергежилдиг, бѳдүүн чонга чоок билдилиг удуртукчу. Ажыл чок чорукту чавырылдырынга, кожууннуң социал-экономиктиг сайзыралынга ооң киирген үлүг-хуузу хѳѳредиг чок канчаар-даа аажок улуг.
Хүндүлүг Урана Монгушовна база Таңды кожууннуң чонну ажылга хаара тудар Тѳвүнүң бүгү-ле ажылдакчылары! Бот-аңгыланыышкынның белен эвес үезинде, байырлалыңар-биле бүгү-ле чүүлдерге чедиишкиннерни, холдарыңар тутунгур болурун, ажылыңарга сайзыралды, кадыкшылды күзедивис!