Кӱӱк айда кычыраачыларга сый болуп , Улаганныҥ орто ӱредӱлӱ школыныҥ ӱредӱчизи Н.Н.Санинаныҥ "Элистиҥ энчи кожоҥдоры" деп, Улаган калыктыҥ оос чӱмдемелдерин айдар улустарынаҥ јууп белетеген байлык бичик - јуунты кепке базылды. Кире сӧсти филология билимниҥ кандидады М.А.Демчинова айдыптыр. Бичикте јаан-јашту ӧрӧкӧндӧрдиҥ элен-чакка энчи эдип , ундыбай алып јӱрген кожоҥдоры, орто јаштулардыҥ эске алыныштары, кеп сӧстӧр, модор сӧстӧр, кеп-куучындар, куучындар, јартамал сӧзлик салылган. Наталья Николаевна тӧрӧл јериниҥ улузын тооп, сӱп, олордыҥ кажы ла айткан эрмегин , сӧзин кичееп, кубултпай бичигени база јакшы эмтир. Јиит, јаш-ӱйеге калыгыныҥ энчи тилиле, эрмек-куучыныла таныжар арга база берилген. Бу бичикти кычырып, ас-мас телеҥит калыгыстыҥ ортозында тапкыр, чечен тилдӱ улустар барыла канайып оморкобос. Бичик ӱредӱчилерге, билимчилерге, ӱренчиктерге, тегин де оос чӱмдемелле јилбиркеген улуска учурлалган.Телеҥит калыктыҥ, оосло айдар чӱмдемелин, кеендигин ӧрӧ кӧдӱрерге, келер ӱйеге агару керегин энчи эдип артыргызып јаткан учун Наталья Николаевнага јаан быйан, једим, су-кадык кӱӱнзейдим.