А.Г. Калкинниҥ адыла адалган балдардыҥ кеендигиниҥ школында "Кайчы – эл - јонныҥ курчуузы" деп проект аайынча тергеебистиҥ атту-чуулу кайчылары айылдап келип, балдарга кай јанынаҥ мастер-класс ӧткӱрди.
Бу јакшынак баштаҥкайды Россия Федерацияныҥ Президенти В.В.Путинниҥ коммерсиялык эмес организацияларга государстволык јӧмӧлтӧ эдери јанынаҥ чыгарган јакааны аайынча грант ойноп алган "Алтын – Казык" деп регионал эл-јондык организацияныҥ кайчылары этти.
– деп "Алтын-Казык" эл-јондык организацияныҥ председатели, ГАГУ-ныҥ алтаистика ла тюркологияныҥ факультединиҥ магистри, проекттиҥ башкараачызы Алтынай Матина куучындады.
Бу мастер-классты бистиҥ јерлежис Аркадий Конунов ачып, балдарга кайдыҥ учуры ла айылчылар кандый амадулу келгендери керегинде куучындаарда, бала-барка бу кижи Улаганныҥ кижизи болгонына сӱӱнгилеп, бойлорын бош тудунып баштаганы иле кӧрӱнди. Ээчиде Эмиль Теркишев балдарга "Алып-Манаш" деп кай чӧрчӧктиҥ ӱзӱгин кайлаган, Б.М. Киндиков кайлаарыныҥ методиказын јартаган, Болот Байрышев комус ла шоордыҥ јӱзӱн-јӱӱр бӱдӱмдерин кӧргӱзип, алтай албатыныҥ ундылып калган "ӱнгӱрек" деп той балкаштаҥ јазаган духовой ойноткызыла ойноп таныштырган, Байым-Сур Тадырова топшуур ла башка-башка бӱдӱмдӱ произведениелерди кожоҥдойтон техниканы кӧргӱскен, Алан Темеев пьеса ла эпостыҥ ӱзӱктерин кайлаган. Мастер-класстыҥ учында кайчылар јаан эмес концерт кӧргӱскилеп, кӱӱнзеген, јилбиркеген балдар ла јууктада танышкылап, куучын ӧткӱргилеген. Мастер-класс туружаачыларды эки јандай јилбиркеткен деп айтса јастыра болбос. Анчада ла айылчылардыҥ јӱректерин туштажуныҥ кийнинеҥ сакыбаган јанынаҥ тӧӧлӧс сӧӧктӱ 10 јашту баянист Руслан Сабулов деп уулчак јаан быйанын айтканы ӧкпӧӧртти. Адакыда, айылчыларга директор Л.А.Натова ла А.М.Темеева бийик једимдер кӱӱнзегилеп, јылу алкышту сӧстӧрин айттылар.
Бис те бойыстыҥ адыбыстаҥ алтай албатыныҥ ӧзӱмине керектӱ мындый јакшы проект улалып, албаты-јонго јаан тузазын јетирзин деп акту кӱӱнистеҥ кӱӱнзеп турубыс.