Ол јеҥӱге канайда келгени керегинде аймактыҥ администрациязыныҥ культура, јашӧскӱрим политка ла спорт аайынча бӧлӱгиниҥ спортло специалисти Рустам Петрович Куюков куучындайт:

- 2016 јылда ӧткӧн Эл-Ойында Улаган аймактыҥ јуунты командазы спортло 4-чи јерде болгон. Ӱчинјчи јер аларга арай ла келишпеген (2 ле очко јетпеген болгон). Мен 2016 јылда тулаан айда спорт аайынча специалист болуп иштеп баштагам. Кичӱ изӱ айда команданы чогуп, Эл-Ойынга турушкан болгоныс. Командабыс јиит болгон. Ол ло команда эки јылгы белетенип, быјылгы Эл-Ойында баштапкы јерге чыкканы бу. Бӱдӱмдерле башка кӧрӧр болзо, быјыл бис мӧшкӧ чыгарыла баштапкы јерде (ӧткӧн Эл-Ойында јӱк ле алтынчы болгоныс). Камчыла быјыл ӱчинчи јерде – 2016 јылда 7-чи болгоныс, тоҥжоон јӱгӱрӱкле 2-чи јердеҥ баштапкы јерге чыкканыс, ок-јаа адышла – 6-чыдаҥ 4-чи јерге, кӧдӱрге ташла – 5-чидеҥ баштапкыга, токпок чачышла 7-чидеҥ 5-чиге. Шатрала маргаанда Манзырова Руслана лда Чалчикова Алена бистиҥ команданы баштапкы јерге чыгарып келгендер (2016 јылда бу бӱдӱмле 7-чи јерде болгоныс). База бир јаан једим – ат јарышла ӱчинчи јер алганыста (оноҥ озо Эл-Ойында јетинчи јерге болгоныс). Бастыра бӱдӱмдерле ичкери барганыс. Јаҥыс ла алтай кӱреште командалар ортодо первенстводо јеҥӱлӱ јер аларга келишпеген. Оныҥ шылтагы неде дезе, бескелерди астадып салганында. Оноҥ озо тогус беске сайын кӱрежип турган болзо, быјыл 5 ле башка категория тургузып салгандар (60 кг, 70 кг, 80 кг, 90 кг, 90+ кг). Бистиҥ кӱрешчилер оогош бескелерде јакшы кӱрежип турган болгон. Ондый да болзо, Улаган аймак командный зачетто баштапкы јерге чыккан. Эл-Ойынныҥ тӱӱкизинде Улаган аймактыҥ командазы качан да јеҥӱлӱ јерге чыгып кӧрбӧгӧн болгон.

Бойымныҥ адымнаҥ Эл-Ойында турушкан бастыра спортчыларга јаан быйаным айдадым. Ол бистиҥ бастырабыстыҥ јаан једимис. Анайда ок, аймактыҥ јааны Н.А. Санинге ле культура ла спорттыҥ бӧлӱгиниҥ јааны И.К. Куюковко акча-манатла, јепселдерле болужып јӧмӧгӧн, болушканы учун база быйаным айдадым. Келер Эл-Ойында оноҥ јакшы туружар деп бӱдӱп турум.

Анайда ок, быјылгы Эл-Ойында баштапкы катап ветерандар ортодо база маргаандар ӧткӧн. Камчыла маргаанда баштапкы јерди Ельдепов Степан Иванович алып, Эл-Ойыныҥ 3 катап јеҥӱчили болуп калды. Ветерандар ортодо тебекле маргаанда база Степан Иванович 101 катап тебекти тебеле баштапкы јерге чыккан, экинчи јерде Ядагаев Геннадий Лукич (Горно-Алтайск, 40 катап тепкен), ӱчинчи јерде база бир јерлежис – Чулунов Альберт Калистратович (37 катап тепкен).

Д. Акчин