Сыраҥай ла сары кӱстиҥ бойында, качан эбире ар-бӱткен алтын кебин тартынган тужында, Саратан јурттыҥ стадионына чогулган јиит спортчыларды ла кӧрӧӧчилерди айас, чап-чаҥкыр теҥери уткыган. Кажы ла туружаачы ӧткӱрмелдиҥ некелтези аайынча национал кеп-кийимдӱ болгон. Келер ӧйдиҥ ижемјилери – јаш ӱйе алтай кеп-кийимин кийип, јебрен ӧйлӧрдӧҥ бери бистиҥ албаты маргышкан ойындарды ӧткӧн ӧйдӧ ундыбай, бӱгӱнги кӱнге јетире алып јӱргени – сӱрекей јарамыкту деп чокымдап, темдектеер керек.
Бу јилбилӱ ойындар ӧткӱрер санаа керегинде таскадар иштер аайынча Саратанныҥ школыныҥ директорыныҥ ордынчызы Белешева Ольга Анатольевна мынайда куучындады:
- Класстардыҥ башкараачылары ортодо ӧдӱп турган јуундардыҥ бирӱзинде Темдекова Любовь Юрьевна (алтай тил ле литератураныҥ ӱредӱчизи): "Ӱренчиктер ортодо национал спорттыҥ бӱдӱмдериле "Ирбизектиҥ ойындарын" ӧткӱректер" - деп кычыру эткен. Мындый шӱӱлте солун да, тузалу да болгонын ончобыс јӧптӧп, школдыҥ ӧткӱрмелдериниҥ планына кийдирип, физический культураныҥ ӱредӱчилери Алексей Михайлович Петпенеков ло Александр Владимирович Кеденовко јакылта бергенис.
Ӧткӱрмелдиҥ баш јаргычыларыныҥ бирӱзи – Алексей Петпенеков (школдо физический культурала ӱредӱчи, самбо кӱрешле тазыктыраачы, "Беркут" деген јуучыл-патриотикалык клубтыҥ башкараачызы) башкарып ӧткӱрген маргаандар керегинде куучындап, - "Ирбизектиҥ ойындары" - бистиҥ јурттыҥ школы кеминде ӧткӱрилген баштапкы ченемел. Јурт јерде школдыҥ ӱренчиктери ортодо ондый ойындар керегинде солун-табыш јурттыҥ улузына таркадыларда, јерлештер акча-манатла јаан болужын јетирген – 15 000 јуулган. Јербойыныҥ улузы, эне-адалар школдыҥ јӱрӱминеҥ туура артпай, ӱренчиктерди, ӱредӱчилерди јӧмӧгӧнине сӱӱнип, айдары јок јаан быйан айдадыс. Тергеебис ичинде јарлу маргаандарды балдарыс ортодо ӧмӧ-јӧмӧ ӧткӱрип турзабыс, бистиҥ де балдарыстаҥ алып-батырлар - "Ирбизектер" чыгарында алаҥзу јок.
Национал спорттыҥ бӱдӱмдериле узы бийик јаргычылар алдырылган: Петпенеков Рустам Алексеевич - ок-јаа адарыла, Ельдепов Степан Иванович камчы чабарыла јаргылаган. Бу улус бистиҥ кычыруга сӧс јогынаҥ јӧпсинип, ӱренчиктерге мастер-класстар ӧткӱргени, бойыныҥ јепселдерин экелип, бисле кожо бу байрамда турушканына быйанысты айдадыс.
Мынаҥ ары бу ууламјыны јаҥжыгу эдип, јаандардаҥ болуш болзо, эзенде јылда јаскаары аймактыҥ школдоры ортодо ӧткӱрер амаду бар – деди.
Ок-јаа адарыла маргаан башкарган Рустам Петпенеков бойыныҥ санаа-кӱӱниле база ӱлешти:
- Тӧрӧл школымныҥ ӱренчиктери ортодо ондый маргаандар ӧткӱрилип јатканын јерлештерим билдиртип, кычырарда, акту јӱрегимнеҥ кӱӱнзеп баргам. Ӧткӱрмелдиҥ некелтелери аайынча ок-јаа адарында јаргычы бололо, оморкоп ајарганым - ол национал спорттыҥ бу бӱдӱмиле јайалталу балдар кӧп болгоны. Бу айалганы темдекке алып, келер ӧйдӧ балдар да, јаан да улус ортозында аймак кеминде ондый маргаандар ӧткӱрерин јаҥжыгу эткен болзоос, Эл-Ойынга профессионал кеми бийик ок-јаачылар белетелери эрчимдӱ јол алынар эди.
Онойып, бийик кеминде ӧткӧн маргаанныҥ турулталары мындый болды:
Текши чотомолло "Ирбизектиҥ ойындарында" јеҥил эмес јеҥӱни Белешев Айбек, Белешев Аймир, Кензин Саадак, Чимдаев Арчындай алгандар.
Турушкан балдарга "Эҥ артык" деп номинацияла сыйлар берилген. Олор Тедеков Артур (бойы јазаган ок-јаалар ортодо эҥ артыгы), Манзыров Илас (эҥ артык бије), Петпенеков Эжер (эҥ артык костюм), Баграшев Владислав (эк арты ок-јаачы).
Јеҥӱге албаданган балдардыҥ кӱӱни ајару јок база артапаган. Кензин Денис, Кеденов Денис, Юстуков Айдамир, Чейнин Чечен, Орсулов Артем, Чалчиков Кайрал, Манзыров Данил, Тадышев Азамат.
Јеҥӱчилдер ле туружаачылар Кубокло, акча-манатла (кемин јарлабас)), Дипломдор ло Быйанду самараларла кайралдаткан.
Баштаҥкай јерлештериске – тоомјы, турушкан ла јеҥӱ алган балдарга – мак!