Алтай албаты кандый да болзо, качан да болзо бойыныҥ ады-јарлу јараш кыстарын, ойгор санаалу уулдарын ӱргӱлјиге ундыбайтаны ол бистиҥ аҥылуус, оморкодуус деп айтсаас јастыра болбос. Улу Улаган Алтайыста баштапкы кар база ла сакыбаган јанынаҥ "кӱп" этире јаап салган кӱн Чибит јурт бойыныҥ кожоҥчы, кӱӱ чӱмдеечи, ӱлгерчи, јурукчы болгон атту-чуулу уулыныҥ Борис Бухтуевич Каятовтыҥ чыкканынаҥ ала 60 јажын кӧдӱриҥилӱ айалгада темдектеди.
Бу кӱн Борис Каятовтыҥ ла "Амаду" ӧмӧликтиҥ кожоҥдоры јаҥыланган эземниҥ туштажузында нӧкӧрлӧрдиҥ, тӧрӧӧн-туугандардыҥ, кожо иштегендердиҥ кажызы ла Борис Бухтуевич керегинде кунукчылду да, кокырлу да эске алыныштарыла ӱлешкилеп, 15 јылга чӧйилген коромјыныҥ кемин оҥдоп, акту јӱректеҥ сыгылган јылу сӧсторин айттылар. Айана Темеева, Марина Саксаева, Алексей Тазранов, Алексей Калкин, Андрей Альдашев, Алан Темеев, Сергей Табулгин, Эдуард Согоноков баштаган кожоҥчыларыс бойыныҥ ӧйинде Алтайыстыҥ эстрадалык телекейин "чочыда" ойгозо кожоҥдогон Борис Каятовтыҥ "Эркелей", "Алтынай", "Чейнежим", "Кару кыс", "Таҥдалай" ла анаҥ да ӧскӧ јарлу кожоҥдорын акту кӱӱнинеҥ сыйлагылаган. "Амаду" ӧмӧликтиҥ база бир туружаачызы Александр Тозыяков синтезаторло ойноп, кижиниҥ каны изиир, бажы јимиреер "Афганистан" деп кожоҥын кожоҥдоордо ӧй туруп калгандый билдирген. Эҥ ле кижи ӧкпӧӧрӧӧр айалга кийнинче уулы Эрчим Каятов адазыныҥ "Эркелей" деп кожоҥын кожоҥдоп баштаарда ого залдаҥ јерине отурынып болбой "Амаду" группаныҥ бас-гитаристи болгон Леонид Тимофеевич Тойлонов чыгара јӱгӱрип кожоҥдожордо, залда отурган ончо улус бут бажына тургулап, кожоҥды бажынаҥ ала учына јетире кожоҥдошконы Борис Каятов кажы ла кижиниҥ јӱрегинде "ТИРӰ" болгонын недеҥ де баалу керелеген.
"Адам эзен-амыр јӱрерде мени "кожо кожоҥдойлык балам, мен бис экӱге кожоҥ чӱмдеерим"-деп айдып туратан… је ол ӧйдӧ мен арай ла јаш болгом, ӧйди калас ла чӧйгӧм, адам јӱрӱмнеҥ андый эрте сала берер деп бир де сананбагам. Эмди кӧрӱп турзам мен адам ла чылап сценага кожоҥдоп 30 јаштуда чыккан эмтирим"- деп, адазыныҥ јаркынду јолын улалтып апарып јаткан уулы Эрчим айдат.
Культураныҥ јааны Солунай Санаа база ок кӧксинеҥ чыккан сӧстӧрди айдып, бу Эземниҥ туштажу-эҥирине учурлап чӱмдеген ӱлгерин кычырганын залда чогулган албаты-јон бир тынышла угуп уткыган:
Јӱрген јӱрӱми сӱрекей кыска
Ӧткӧн јӱрӱми элбек, телкем.
Јӱректеҥ чыккан эрӱ кӱӱлер
Арткан биске эзем, эзем…
Туйук кӧлдиҥ ӱстинде
Турна ачу кыйгырбас,
Эркелейди јоксынып,
Кемде артып карыкпас.
"Кӧрӧр кӱӱним јок сени" –деп,
Кӧӧркийине кем айдар?
"Тойыҥа калас кычырдыҥ" –деп,
Туйказынаҥ кем карыгар?
Кара кӧстӱ јараш кыс
Кожоҥын не укпадыҥ?
Чейне, Чейне, Чейнежис
Сӱӱжиҥди не кыскандыҥ?
Алдаачы Афганистан
Алып барды уулдарды.
Ажуда јаламалар,
Јаҥып, јаҥып арт калды.
Ӧчӱп калган јылдысты
Ӧрӧ алып кем илер?
Шыркалаткан јӱректиҥ
Сыс шылтагын кем билер?
Айпазааста билереер,
Сананарыс ундыбай…
Кожоҥдороорды баалайт,
Кӧзи кара Алтынай.
Уурак сӱдин эмискен
Уулдар эмди карыды.
Энезиниҥ колдоры
Эркелеткен балдары.
Тӧрӧл слердиҥ Чибитте
Тӧрӧӧндӧр дӧ јуулышты
Кожоҥныҥ экпининде
Кӧстӧр араай јашталды.
Эзен болуп, эзен јӱрӱп,
Эткен ижеер учун быйан!
Эбире турган эжер туулар
Ӱшкӱрет бӱгӱн- "Уулыс кайран!"
Калганчы эҥир, калганчы чӧӧчӧй,
Калганчы кожоҥ, калганчы сӧстӧр.
Је канайдар, је канайдар?
Јӱрегеер слердиҥ тӱҥей ле…сескир!
Учуралды тузаланып, Эркелей ле Эрчим Каятовтор эземниҥ эҥирин ӧткӱрерге јаан јӧмӧлтӧзин јетирген мындый улуска јерге батпас алкыш-быйанын јетирет: А.И.Альдашева, А.К.Алмадаков, Л.К.Алмадакова, А.Ю.Асканакова, О.Н.Акчинова, А.С.Анчина, Р.М.Алмадакова, Г.Н. Асканаков, Ю.А.Альчинова, Н.Я.Альчинова, Ю.А.Каятов, Л.С.Калкина, Г.Ю.Бачимов, Н.В.Борисова, Е.Ю.Идынова, Л.П.Идынова, А.П.Каишева, Л.О.Каишева, А.В.Каишев, В.Я.Каятова, К.Н.Калкин, М.Н.Качкинова, О.И.Кукулова, М.К.Каишева, Д.В.Каишев, Ю.М.Кучалу, Ц.К.Князева, В.В.Каятов, Д.К.Калбырчакова, Г.М.Каишева, Мандаевтердиҥ билези, А.И.Мандаев (СПК), Манатаевтердиҥ билези, Г.С.Мандаева, Н.А.Мандаева, Е.М.Селешева, З.Е.Саватова, Э.А.Тойлонов, Л.И.Тойлонова, Н.И.Тойлонова, Р.М.Таханова, Л.С.Туденева, А.В.Таханова, Н.В.Тойлонова, А.И.Таныева, Акташ јурттыҥ "Тана" ӧмӧлиги, А.И.Юков, Р.В.Кужакова, В.И.Тойлонов, Э.С.Алмадаков, Р.И.Акчинов, В.М.Тадырова, Л.Т.Тойлонов, А.Н.Тозыяков, З.И.Тадыкина, Табулгиндердиҥ билези, З.В.Тойлонова, М.В.Тойлоновтыҥ билези, Н.Г.Тякова, В.С.Тебекова, А.Н.Тозыяков, "Таҥдак" ӧмӧлик, О.Н.Яимова, Д.К.Яимов, Т.К.Яимов, М.К.Яимов, М.М.Мамыева, С.В.Селешева, А.Л.Борисов, А.А.Кучалу, Чибит јурттыҥ јеезезиниҥ ишчилерине, Чибит јурттыҥ орто ӱредӱлӱ школыныҥ ӱредӱчилери ле Улаган аймактыҥ культура бӧлӱги.
Ӧй… јӱрӱм јаҥыс катап берилерде ӧйдиҥ ӧткӧни салкын-шуурганга кептӱ ӧдӧтӧн эмтир… Бу ла јуук ӧйлӧрдӧ ончо республикабыстыҥ ичинде ады-јары чыккан "Амаду" ӧмӧлик бӱгӱнги кӱнде албаты-јонныҥ јаҥыс ла сагыжында ла кӧксинде арткан. Је андый да болзо бӱгӱнги кӱнге јетире бис Борис Каятовтыҥ јӱректи ӧйкӧгӧн кожоҥдорын баалап, келер ӧйдӧ кереестеп алып јӱреристе алаҥзу јок.