Улаганныҥ спорт школында бу јыл кочкор айдаҥ бери солун художественный гимнастиканыҥ секциязы иштеп баштаганын эл-јон сӱӱнип уткыган. Секцияныҥ таскадаачызы - Эркелей Геннадьевна Топчина. Ол оогош болчомдорго гимнастиканыҥ телекейин чыдамду ачып, јеҥӱге, једимге ууламјылайт.

Кажы ла эне-ада кызычагын бу секцияда ӱредерге, анайда ок, оныҥ јӱрӱмин јаҥы јилбӱӱле колбоорго кӱӱнзегилйт. Нениҥ учун дезе, художественный гимнастика спорттыҥ эҥ јараш бӱдӱми.

Турнир гимнаст кызычактардыҥ акробатиканыҥ, гимнастиканыҥ ла классический бијениҥ элементтериниҥ бир аай кӧргӱзӱзиле башталды. Ӧткӱрмелдиҥ экинчи бӧлӱгинде балдар јаштары аайынча бӧлӱнгилеп, (тӧрт, беш-алты, јети-сегис, тогус-он) таҥынаҥ колы-будыныҥ ээлгирин, гимнастиканыҥ тӧс бӱдӱмин канайда, кандый кеминде билерин кӧргӱстилер..

Турнирдиҥ уч-турултазыла баштапкы јер алгандар кӱчӱрген айдыҥ баштапкы кӱндеринде Горно-Алтайск калада ӧдӧтӧн бастырароссиялык турнирдиҥ экинчи бӧлӱгинде туружар. Оныҥ учун, кажы ла гимнаст бойыныҥ программазын бийик кеминде кӧргӱзерге чырмайдылар. (Кажы ла бӧлӱктиҥ программазы, некелтези башка.)

Улаганныҥ спорт школыныҥ јааныныҥ ӱредӱ аайынча ордынчызы В.С. Мамаева турнирдиҥ туружаачыларын, эне-адаларды уткуп, спорттыҥ бу бӱдӱминде бийик једимдер кӱӱнзеген кийнинде, оогош гимнасттарга кайралдар ла грамоталар табыштырылды. Онойып, јеҥӱчилдер болуп 9-10 јаш туружаачылар ортодо Асканакова Байару, Адыкаева Альмира, Тырлунова Ижена, Ногоймонова Ижена, 7-8 јашту гимнаст кызычактар ортодо Акимеева Айжана, Куюкова Анастасия, 5-6 јашту туружаачылар ортодо Чулчугашева Виолетта, Куюкова Александра, Топчина Айлана, Кошева Анастасия, 4 јашту туружаачылар ортодо - Чильчинова Ижена чыктылар.

Кызычактардыҥ таскадаачызы Эркелей Геннадьевнаныҥ куучындаганыла болзо, тургуза ӧйдӧ художественный гимнастиканыҥ секциязында бастыра јаба 55 бала (4 јаштаҥ ала 10 јашка јетире). Балдар бир неделеде ӱч катап тазыктырынат. Баштап тарый балдарды ӱредерге, тазыктырарга кӱч болгон, эмди кызыктар таскадаачызын јакшы оҥдоп, олордыҥ алдында кандый некелте тургузылганын јарт оҥдогылап, бӱдӱрерге албанадылар.

Адакыда, бастырароссиялык гимнасттардыҥ турниринде тӧрӧл јериниҥ адын корып атанар спортчы кызычактарга јеҥӱ, мак кӱӱнзейли.