Маргаандардыҥ јыргалду ачылтазы Улаганныҥ баштамы школыныҥ спортзалында ӧткӧн. Мында јурттыҥ орто ӱредӱлӱ школыныҥ ла баштамы школдыҥ директорлоры Л.А. Кокпашева, А.Р. Кеденова, школдордыҥ ӧмӧликтери турушты.
Спартакиада јарлап, маргаандар ӧткӱрерге спорт оргкомитет тӧзӧлгӧн. Бу оргкомитеттиҥ јааны - Сергей Николаевич Сартаков, турчылары - ӱредӱчилер Любовь Николаевна Деменова, Виктор Рафаилович Талбаков, Эмма Трифоновна Тельденова, Улаганныҥ орто ӱредӱлӱ школыныҥ завхозы Анатолий Николаевич Сюнюшев, аймактыҥ ӱредӱ бӧлӱгиниҥ ишчизи Любовь Исаковна Ужнекова, Улаганныҥ школдорыныҥ директорлоры Любовь Андреевна Акпашева ла Айана Рафаиловна Кеденова. Бу ӧткӱрилип јаткан спорт-маргаандардыҥ тӧс амадузы: эл-јон спортзалга келип, тазыктырынып, спортло, физкультурала најылажары.
Спартакиаданыҥ ачылтазында Любовь Андреевна ӱредӱчилер керегинде ӱлгер кычырып, школ башкарган, ӱренчиктер ӱреткен тоомјылу ӱредӱчи Владимир Константиновичти ундыбагандарга јаан быйанын айтты. Ӱредӱниҥ ветераны Алла Николаевна Мамашева: "Ӱредӱни божодоло, ӱредӱчиниҥ ижин иштеп баштаарымда мениҥ баштапкы директорым болгон" - деп, јылу сӧстӧрлӧ В.К. Ядомыковты эске алынды.
Спорт- маргаандарда бастыра јаба тогус ӧмӧлик туружарын угузып, дартсла, мас-рестлингле тартыжуны баштады. Спорттыҥ бу эки бӱдӱмдери аайынча уч-турултазыла озочылдардыҥ тоозында электросетьтиҥ, баштамы школдыҥ, РОВД-ныҥ нак ӧмӧликтери акалап чыктылар.
Таҥынаҥ туружаачыларды темдектезебис, дартсла баштапкы јер – Амаду Тойдонов (Улаганныҥ баштамы школы), экинчи јер - Сӱмер Чулунов (РОВД), ӱчинчи јер – Егор Бадыкин (аймактыҥ администрациязы).
Ӱй улустар ортодо дартсла баштапкы јерде – Татьяна Каланова (собес), экинчи јерде – Солунай Тадыкина (ӱредӱ бӧлӱк), ӱчинчи јерде - Ирина Бодушнина (культура бӧлӱк).
Мас-рестлингле (агаш тартыш) эҥ кӱчтӱ болуп, Андрей Тузин (аймактыҥ администрациязы) чыкты. Экинчи јерде – Эзендей Бадыкин (Улаганныҥ баштамы школы), ӱчинчи јерде – Дамир Чильчинов (РОВД) болдылар.
Кажы ла ӧткӱрилген маргаанныҥ кийнинде оргкомитеттиҥ турчылары јеҥӱчил болгон спортчыларды уткуп, медаль ла грамотала темдектедилер.
Јаҥар айда волейболло кызу ла јилбилӱ тартыжулар башталган. Ойынныҥ баштапкы бӧлӱгинде РОВД-ныҥ, электросетьтиҥ, культура бӧлӱктиҥ ӧмӧликтери ойногылайт. Экинчи бӧлӱкте аймактыҥ администрациязыныҥ, собес, ӱредӱ бӧлӱктиҥ, орто ӱредӱлӱ школдыҥ ла эмчиликтиҥ ӧмӧликтери тартыжар. Башталган спорт тартыжуларды кӧргӧндӧ, мында мынаҥ озо ӧткӧн спорт-маргаандарда турушпаган солун туружаачылар болгонын спорт комитеттиҥ ишчилери темдектедилер.
Сергей Николаевичтиҥ куучындаганыла болзо, ишмекчи ӧмӧликтер ортодо спартакиада кӱӱк айда тӱгенер. Волейболдыҥ кийнинде теннис (настольный), шашка, электроотту мылтыкла адыш, тӧрӧлин корулаачылардыҥ кӱнине јууктай, эр киндиктӱлер ортодо автомат чогуп, айрып билерин ченеп кӧрӧр маргаан ӧткӱрилер. Анайда ок, јуучыл тӱӱки аайынча викторина јарлалар.