Быјыл бу байрам јаан изӱ айдыҥ 14-чи кӱнине келишти.

Почта озогы да ӧйдӧ, эмди де кажы ла кижиниҥ јӱрӱмине јаан камаанын јетирет. Почтальондор сакылталу самараларды, газеттерди, журналдарды ӧйинде јетирип, кажы ла айылга јаҥы солундар ла јӱзӱн-башка кӱӱн-тап экеледилер.

Улаган аймактыҥ почтазы тӧзӧлип, иштеп баштаганынаҥ бери канча јылдар ӧткӧн. Ол аймактыҥ ончо јурттары, республикабыстыҥ аймактары, орооныстыҥ калалары ла анайда ок, гран ары јанындагы ороондор ортодо колбу тудуп, jаҥы ӧйдиҥ некелтелериле ижин улалтат.

Тургуза ӧйдӧ Улаганныҥ почтазында бастыр јаба он ишчи. Почтаныҥ јааны болуп баштапкы јыл Вероника Олеговна Олчонова иштейт. Мынаҥ озо јылдарда Вера Васильевна Сартакова почтаны билгир башкарган болгон. Почтаныҥ јааныныҥ ордынчызы - Оксана Николаевна Токоекова.

Быјыл почтаныҥ ишчилериниҥ тоозына јаҥы јиит специалист Аруна Рустамовна Белеева кожулган. Анайда ок, Эллада Михайловна Сартакова мында ишмекчи јолын баштады. Олор оператордыҥ ижин бӱдӱргилейт.

Почтальондор: Светлана Ильинична Чулчушева, Алтынай Васильевна Сартакова, Татьяна Тихоновна Белеева. Тискинчи - Николай Николаевич Бондарь, садучы -Аруна Алексеевна Токоекова, ак-чек учун карулу кижи Айсулу Борисовна Чулчушева.

Бӱгӱнги кӱнде почта ажыра кандый ла калага железнодорожный ла авиа билеттер садып, сотовый телефонго акча салып, электроот тӧлӧӧр, заказной ла тегин самаралар аткарар, акча кӧчӱрер, "Отп-Банк", "Хоум-Кредит", "Альфа-Банк" банктар ажыра алган кредиттер тӧлӧӧр, јӱзӱн-башка журналдар ла газеттер алдыртар, тӱрген почтала посылкалар, самаралар аткарар (тегин почтанаҥ кӧрӧ тӱрген, баалу), открыткалар садып алар аргалар бар. Анайда ок, калганчы ӧйдӧ почтаныҥ www.рochta.ru сайты ачылган. Кажы ла кижи Интернет ажыра сайтка кирип, очередь јогынаҥ заказной самаралар, посылкалар бичип аткарар, посылка кандый јерде јеткени керегинде јетирӱ кӧрӧр лӧ оноҥ до ӧскӧ јаҥыртулар табылган.