Кезэрень евтамотнень коряс, Андрелесь теевсь 16-це пингестэ. Ламо иень перть велень эрицятне ванстыть эрзянь коест, эрить ояксчисэ вейкест вейкест марто. Те велесь райцентрадонть ашти овсе маласо.
Тесэ эрить 230 ломанть. Эйстэст 110 – пенсионерт. Школьниктнеде 8, васенце классов моли вейке тонавтниця, те - Саша Наместникова. Тонавтнить Андрелень эйкакштне ней Козловкасо.
Чарькодеви, велень тевтнень топавтомга, савкшны ветямс покш важодема, васняяк, велень администрациянь прявтонтень Наталья Николаевна Зоткинанень.
Андрелесэ ули фельдшерэнь-акушерэнь пунктось (ФАП-сь). Сонзэ прявтозо Алла Юрьевна Клюжина. Тевтеме сон а ашти. Кедьсэнзэ свал ломанть. Кие сы давлениянь онкставтомо, кие уколонь путовтомо. Стакасто сэредицятне ильтявить Отяжбуень больницяв.
А мезть сепомс, ФАП-тне велесэ эрявить. Течи эрицятнестэ ламотне пенсионерт, ды тееви весемесь, штобу сынь а марявольть мельтемечи. Эрявольть шумбрасто ды кувать.
Велесэ важодить кавто лавкат, косо микшневить ярсамопельть. Эсь лавкат кирдить предпринимательтне - Р.В. Зоткин, О.Л. Живаева.
Течи Андрелень ломантнень талномаст ды кенярксост вейке, те строявиця церьковась. Зярдо бути велесэнть ульнесь чувтонь церькова, кона строязель 1885-це иестэ ды важодсь 1930-це иетнень самс. Мейле сон пекстазель.
Ды вана те кизэстэнть веленть куншкасо ушодовсь покш стройка. Чиде-чис церьковась касозь кассы.Тесэ жо, келя, карми трапезной. Озныця ломантне пек учить, што тевесь нацяс тееви ды сынст карми кевень храмост. Кемтяно, те покш тевесь максы велень эрицятненень ламо од вийть ды валдо мельть-арсемат.