Коронавирусонь инфекциянть каршо минек районсо алкукскак "тюрить" ламо медицинской роботникть. Врачтне теить эсест тевест, велень ФАПсо важодицятне – эсест.
Ушаковкань ФАПонь зданиясь ташто, тона иестэ снартнить тееме од, ялатеке велень эрицятне аштить мельспаросо, што сынст ули медпунктост ды эсест фельдшерэст. Те ломанесь – Любовь Михайловна Кузина.
Любовь Михайловна чачсь-кассь Аловелесэ. Школань прядомадо мейле тейтернесь мольсь тонавтнеме Орданьбуень медучилищав. Аванть ледстнеманзо коряс, се шкась ульнесь пек валдо ды мельстуиця, од пора. Ледстнематнеде кадовсть пек ламо. Велявтомс бу се шканть, ды а велявтови…
Училищанть прядомадо мейле Люба тусь Сараношов ды кармась важодеме эйдень республиканской больницясо. Авась тешксты, зярдо сон кочкизе медикень профессиянть, свал арсесь – шожда а карми. Ансяк сехте стака марявсь тензэ ошсо эрямось – мелезэнзэ сон эзь тукшно. Эрьва сменадо мейле туиль тиринь Аловелев, пек тошнакадыль аванзо кисэ. Истя савсь ардтнемс тензэ кавто иень перть. Чарькодсь – ошось аволь сонзэ эрямо таркась, эряви туемс мекев велев, эдь Отяжбуесэяк эрявить медикть.
Таркась лиссь рузонь велестэ, Ушаковкасто. Косо истямось, тейтересь сестэ а содыльгак! Васенце важодема чизэ кадовсь мелезэнзэ течимо чис, теке мерят иссяк ульнесь. А ульнесь те 1992 иестэ панжиковонь 12-це чистэ. Тесэ лиссь мирденень, тесэ чачсь-кассь сынст Леша церынест. Тесэ эрить сонзэ ялганзо ды роднянзо. Урьвазояк теке велень. Од ломантне эрить Саранскойсэ. Покш кенярксозо Любовь Михайловнань – Даша нуцькинезэ, конанень ниле пель марто иеть.
Пек лембестэ ледстни авась сеть иетнень, конат ютавтозь Ушаковкасо, зярдо велесэнть ульнесть ламо ломанть – ульнесь колхоз, школа, клубсо эрямось гайгсь, теке мерят, паро моро… Аволь весть велень самодеятельностень сценанть лангс лиснесь ФАПсо важодицяськак – Л.М. Кузина.
Медицинасо Любовь Михайловна важоди 31 ие. Роботамонь лувозо аванть а шождатнестэ, сэредицятне васняяк эдь сыть эсь медпунктов, зярдо марить рунгосонть кодаткак мелявкст. Покш температура, козома, судокстомо, неть ды лия пеняцямотне неень шкане сехте вастневицят. Кунсоломс ды оймавтомс сыцятнень, эдь малав весе ней арсить, што сынст коронавирус, Любовь Михайловнань васенце тевезэ.
Кузина важоди кавто велева – Ушаковкасо ды Сосуновкасо. Вейсэ изнямс апаро орманть ней лезды вакцинась. Малав весе велень ломантне сонзэ путызь апак кавтолдо. Минь арсетяно Любовь Михайловнанень ды весе те сферасонть трудиця ломантненень шумбрачи, ванстомс эсь прянть, малавикстнэнь ды куроксто одов велявтомс икелень эрямонтень!