Од иестэ наряжиль ды киштиль елкань перька, Ине чистэ артыль алт, паниль пачалксеть ды прякат,Тровицясто морыль эрзянь ды рузонь морот.

Ней Пилезелень дока авась пенсиясо, ялатеке эри ялгаксчисэ весе оянзо, шабранзо, раськензэ марто. Вечки пидеме-панеме ды свал арси кодаткак каванямкат. Ялганзо-оянзо неть "эксперименттнэнь" васенце варчицяст ды шныцяст. Эрьва ие пексты-салты куярт-помидорт, пангт, теи эрьва кодат сокт: умарень, морковонь, дураккуяронь. Оште сон вечки костямс теленень эрьва кодат тикшеть ды човорямс настойкат.

Мария Николаевнань эряза обуцязо а максы тензэ оймсемс, сон свал пильге лангсо, ломань ютксо. Неть Мастянь читнестэ миньгак вастовкшнынек ероков аванть марто, эдь сон коень-кирдань содыця, вейкеяк покш чи а ютавты апак тешкста. Мастядонть – кортамскак а мезть.

- Минек покштятне-бабатне ловсть чипаенть, теке Пазонть, эдь сон макссь эрямо весементень. Секс тундонь чипаентень алтавсь пачалксень панемань коеськак. Лововсь, пачалксенть сэвеманзо марто ломаненть потс понги чипаень валдось ды лембесь. Мастясто пачалксетнеде пансть ды ярсасть ламонь-ламонь. Пансть эрьва кодамо начинка марто: топо, капста ды, нама, ойсэ вадезь ды велькс марто. Пачалксень панемась теевсь уличинь, шумбрачинь ды паро эрямонь тердемань коекс. Ков седе ламо улить панезь ды сэвезь пачалксетнеде, тов седе курок сы тундось ды седе паро карми урожаесь, - евтни М. Н. Моторкина.

Те недлястонть сывельде ярсамс уш а мереви ды те а эрявияк, эдь эрьва кудосо панить пачалксеть. Пачалсесь – те ярсамопель, конань теить вецана чапакссто, ды пидить пси пачалгсо. Пачалксе валось лиссь "пачалго" валсто.

Мария Николаевнань улить эсензэ рецептэнзэ, конатнень яволявтынзе минек ловныцятнень туртов.