Шаржу прять и шаржу сакалть
Кизодонза сядоть вельф.
Сяряди коль сире пакарсь,
Пильгонзовок, мярьгат, керфт.
Колмоксть улендсь сон войнаса,
Прашендсь киц аф фкя зиянц.
Кулсесь аф фкя куломаса,
Ашезь кула, сякокс мянць.
Бабанц мархта вача пингста
Кота цёрат ванесть-щасть.
Ярхцамс марошт кочксесть тингста,
Сякокс эзрайкс арасть-кассть.
Кассть и вчёк ни панжем пингстост
Равчкодсь менельсь – сась войнась.
Ладязь мяштьснон масторть инкса,
Куду аньцек фкясь мрдась.
Сявок эрясь аньцек киза:
Боень даволсь пезфнесь кенчт.
Ашезь кенерь тиемс пиза –
Сярятьфонза сатозь пенц.
Ашезь кирде седиц бабать
Кота цёрань явсемста.
Тердезе Шкайсь сизеф авать
Ведь ведаркань кандомста.
Атясь эняльдсь: "Азка, Шкайняй,
Мес синь сявить – мес аф монь?
Ашет идне, ашет тряйне,
Рьвязевок ни эшкссот тонь.
Синьфтемост аш тейне эряф,
Ськамон лядонь масторть лангс.
Аш кинди пчкафтомс сярятьфсь,
Малазон аш кинди самс.
Сявомак ни моньге тяста
Рьвязень и иднянень вакс.
Мук ни теенге тон васта,
Мадомс мода пакшкя макст…"
Шкайсь изь кулхцонда мес атять?
Тянемс мес сонь ашезь кяш?
Кяшсы, кодак сай ся пингоц,
Канац эряф кити тяштьф.