Кочкурбуень Вирь ало Тавлась таштамковонь чистэ пешкедсь ламо ломанде. Ютксост седе ламотне – морыцянь коллективть. Сынь весе састь "Торамась терди" эрзянь кезэрень моронь фестивалев, кона тедеде ютавтовсь котоцеде. Сынст ютксо минек райононь ансамблясь "Рябинушка".

"Торамась терди" фестивалесь аламо меремс ютась седе а ков парсте. Тесэ весемесь токась седей. Инжетненень, конатнень ютксольть Саран ошонь прявтось, Россиянь финнэнь-угрань раськетнень вейсэндявксонь ветиесь П.Н.Тултаев, МР-нь Культурань, национальной политикань ды архивень тевень министрань васенце полавтыцясь А.И.Карьгин, Регионъютконь мокшэрзянь раськень вейсэндявксонь прявтось Ю.А.Мишанин, васня невтезезельть од скульптуратне. Сельмтне эзть кенере ваномо весе се мазычинть лангс, кона теезель чувтосто керсицятнень кедьсэ. Авань чачотнень полавтсть виев рунго маралятне.

Содамга: Истямо фестивалень ютавтомадо меленть васенцеде ёвтызь П.В.Рябовонь прявтсо чувто ланга керсицянь "Эрьмезь" вейсэндявксонтень совицятне. Те ульнесь 2008 иестэ. Сестэ ладязель сонзэ ютавтома шкаськак – те "Торама" ансамблянь теицянть В.И.Ромашкинэнь чачома чистэ – сентябрянь 6-це чистэ. Ютавтома таркакс кочказель "Йовлань Олонь лемсэ Этно-кудось".

Кинь мелезэ ульнесь седе ламо содамс Йовлань Олодо, сынст эйсэ учось "Эрзянь ойме, валдо прев" лем ало выставкась, конань анокстызь А.С.Пушкин лемсэ библиотекасо важодицятне В.Бояркина ды В.Пронина.

Ды вана веленть келес каятотсь тораманть вайгелезэ. Те истя весень тердизь "Торамась терди" фестиваленть панжомо. Маней чипаесь, маряви, седеяк пейдезевсь, зярдо морыцятне оршнизь эсест оршамост ды Этно-кудонть перька таркась кирвазсь седеяк валдо ды мазый тюссо. Фестивалесь, кода свал, ушодозель кезэрень койсэ: кирвастезель Раськень Штатолось (кирвастицясь Р.Д.Жегалина), ютавтозель Инешкипазонтень озномась. Седе тов тусть кортамот. Сынь весе сюлмавозельть Йовлань Олонь лементь марто. Маризь Кемаль ледстизе, кодамоль Ромашкин обуцянь коряс. Ромашкинэнь парсте содылизе П.Н.Тултаевгак. Сон тешкстызе музыкантонть минек культурантень путовксонзо. Сонсь Тултаев сась аволь чавонь кедть. Чувтосто керсицятнень туртов максозельть Шнамонь коневт ды казезельть питней казнеть. Эряви меремс, неть кавто фестивальтнень ютавтомаст туртов весемеде покш лезксэсь ульнесь П.Н.Тултаевень пельде, мезенть кисэ седейшкавань сюкпря ёвтасть сонзэ ютавтыцятне.

Моронь кужось ушодозель "Тюштя" моросо, конань серьгедизь Йовлань Олонь лемсэ "Торама" ансамблясо морыцятне. Ды, кода свал, "Торамась" таго "раминзе" весень оймест. Эрьва морост кунсолыцятне ильтясть виев цяпамосо.

Вейке омбоце мельга сцена лангс кармасть лиснеме морыцятне. Сынь састь эрьва ёндо: Саран ошсто, Ицялбуестэ, Покш Игнатбуестэ, Дубинкабуестэ, Кочкурбуестэ. Сынст полавтсть васолдо сазь морыцятне: Московсто, Нижней Новгородсто, Пензасто ды лия таркасто. Пек лембестэ вастозель эрзянь од морыцясь Андрей Бочканов. Весе сынст вайгельтне валовсть вейсэнь моронь иневедекс.

Фестивалесь таго невтизе, кодамо сюпавчи кадсть тенек покштянок-бабанок. Кода ванстомс те сюпавчинть? Теде мелявтсь В.И. Ромашкингак. Маряви, сонзэ мелявксонть маризь эрьва косо. Ней, аволь кода икеле, эрзянь кельсэ моротне алкукс кармасть гайгеме весе вийсэ.