Тосо монь васенце "Кортадо эрзякс апак визде" заметкам! Ловныя сонзэ ды ледстявсть весе эрзянь тевень, конат малав весе невтезельть минек газетасонть.
Газетасо эрзянь лопатнеде
Зярдо монень понгсь школасо важодемс эрзянь класс марто, се шкастонть ушодовсть республикасонок, ды, малав, весе масторганок, косо эрясть эрзятне–мокшотне, минек тиринь келенек, культуранок вельмевтемань тевтне. Сестэ, 90-це иетнень ушодовомсто, минек "Восходось" кармаськак нолдамо эрзянь лопат. Койсэм, те ульнесь теезь лия районтнеде седе икеле. Васенце лопанть лемезэль "Литературной эрзянь лопине", мейле "Чачома кудом", " Тиринь кудом" … Нама, мон ульнинь неть лопатнес эрзякс сёрмадовкстнэнь путницятнень ютксо.
Минь тозонь путнинек эйкакшонь ды покш ломанень эрзянь сёрмадовкст: ёвтнемат, ёвкскеть, стихть-валморот; фотографият эрзянь мероприятиятнестэ. Эряви тешкстамс, кодамо талантливой эйкакш марто школасо монень савкшнось важодемс! Ледстнян ды дивсян! Минь сынст марто тейнинек эрзякс и радиопередачат, и квн-т, и поэзиянь част, и концертт… Мезть ансяк эзинек ютавтне! Сынь стихть ёвтнесть, морот морасть, налксемат эрзянь кельсэ налксесть, мик вейке шкасто мероприятиянь эрзянь кельсэ ветицятнеяк ульнесть сынсь эйкакштнэ. Арасельть се шкане пек покш технической средстват, секс кадовсть ледстнемакс ансяк аламнешка фотот ды вейке-кавто видеот, конатнень ней, цифровамодо мейле, путнетяно Интернетс.
Мельспаро тень ёвтамс: минек районсо васенцекс кармасть ютавтнеме эрьва иень Эрзянь фольклоронь кенярксчить. Сынь ушодозельть Ташто Кшуманцясо ("Велень Озкс" ды "Раськень Озкс"). Кенярксчинь ютавтомась поладозель райононь эрзянь велетнесэ ды школатнесэ: Ташто Селищасо, Ташто Чамзасо, Чукалсо, Протасовасо, Андрейвелесэ, Вармазейкасо, Отяжвелесэ …
Неть покшчитнесэ эрьва велень школань тонавтницятнень вийсэ морсевкшнесть эрзянь морот, невтезельть-пурназельть раськень ярсамопельть-симематпельть, эрзянь койть. Сеть шкатнестэ ушодовсь минек ялгаксчись шабрань Нижней ёнксонь Пикшня велень школанть мартояк.
Мейле минек буесэнть кармасть ютамо "Тиринь келесь - раськень ойме" фестивальтне. Сынст программаст ульнесть седе келейть. Соватозельть "Раськень оршамонь невтемань" пелькстамось, "Ялгаксчинь вейсэнь кирькс" коенть ютавтомась ды эрзянь тевтнень кис шнамонь конёвсо ды питней казнесэ каземась.
Минек "Восходось" эрзякс ды рузокс макснесь неть вейсэнь тевтнеде материалт.
Содавикс ломантнень юбилейтне ды ледстямонь концертнэ
Школасо тонавтницятнень марто ютавтнинек поэзиянь-част -концертт эрьва кодамо тематикань коряс: тиринь мастордо, авадо, иень шкатнеде, кшиде, эрзянь содавикс ломантнеде ды ламо лият. Сынст эйстэ ёвтнемадонть башка зярыя сценарийть ульнесть печатазь газетаскак. Эряви видькстамс, газетадонок мельга ламот сынст ютксто печатавкшновсть республикань газетас ды журналскак.
Эрзянь келень читнеде
Башка ёвтнян Эрзянь Келень читнеде, конатнень ютавтомась ушодовсь районсонок 1994 –це иестэ саезь. Те вадря коесь ванстовсь неень шкас. Ютавтозельть школань, велень, райононь кенярксчить. Минь ульнинек истямо покшчитнесэ, конат ютавтозельть респубикасонок, ламоксть ардтнинек келень кенярксчитнес, конат ютавтозельть минек марто вейсэ Пикшня велесэяк. Ды свал сындест тешкстазель газетанок лопатнесэ.
Эрзянь Келень читне ютакшность аволь ансяк школасо, культурань кудосо, сынь ульнесть эйдень кужосояк.
Кедьсэ сёрмадозь "Тештине" журналдонть
Зярыя иеть важодсь минек школасо "Килейне" эрзянь поэзиянь клубось. Эйкакштнэнь марто ванкшнынек эрзянь поэтнэнь творчестваст, ёвтнинек ды морынек сынст стихест-валморост. Минек ёнксонь ломантненень кармасть малавикст Александр Арапов, Маризь Кемаль, Александр Доронин, Анна Сульдина ды лия поэтнэ, сынст шкинемаст.
Эряви ёвтамс истямо паро тевденекак, кода "Тештине" кедьсэ сёрмадозь журналонть ветямось, Эрзянь ёвксонь Часонь ютавтнемась ды "Арсевкске-Ютавкске" стенгазетанть нолдамось. Эйкакштнэ сынсь ладсесь ёвкскеть, валморынеть, кие эрзякс, кие рузокс (мейле сынст эрзянь келень уроксо ютавтылинек весе класснэк эрзякс), газетас путылинек кавонест вариантнэнь. Автортнэ сынсь тейнильть артовкст эсест ёвкстнэнень. Ламот неть шкинемань чачовкстнэ невтезельть школань ды райононь келень олимпиадатнесэяк, печатазельть минек райононь кулялопасонтькак. Теде мейле а визькс ульнесь сынст кучомс "Чилисема" журналовгак. Вейке "Чилисемань" номерсэнть ульнесть максозь мик 10 минек эйкакштнэнь ёвкст!
Эрзянь содавикс ломань марто вастовомат
Ютавтнинек Поэзиянь час-концертт, конат алтазельть Степан Эрьзянень, Серафима Люлякинанень (Сказительницась сакшнось школазонок инжекс ды теевкшнесь тенек паро ялгакс. Куломадонзо мейле сонензэ алтазь концертнэ ульнесть малав эрьва иестэ), Александр Дорониннэнь, Иван Калинкиннэнь, Николай Ишуткиннэнь, Павел Любаевнэнь, Тамара Баргованень ды лиянень. А весть ульнинек Саранскойсэ, Баевасо (Степан Эрьзянь музейсэнть). Ды тосояк ютавтнинек вастовомат, невтнинек эсенек эрзянь концертнэнь.
"Пизёлнэ" - "Рябинушка" ансамблянть марто эрзянь тевтнеде
Пек ламо эрзянь мероприятият ютавтынек "Пизёлнэ" ансамблянть марто. Сеедьстэ газетанть лопанзо лангсо ловныцятне мукшность заметкат минек коллективденть: Покш Игнатовасо, велесэ, райононь ды "Шумбрат, Мордовия!" Республикасонок фестивальтнесэ, сыре ломантнень кудосонть, Нижней ёнксонь "Эрзянь лисьмапрясонть", мик зярдо ульнинек Эстононь масторсонтькак ды ламо лият концертнэде. Покш статьят эрзякс ульнесть путозь весе эрзянь морамонь коллективтнедеяк.
Мейсэ эштё парось: "Пизёлнэсь" свал бажась ютавтнемс эрзянь мероприятиятнень школань, творчествань кудонь эйкакштнэнь марто вейсэ. Кеместэ сюлмазель сонзэ важодемась культурань ды ловномань кудотнень марто.
"Ютан чачома масторган", "Шумбрачи, чачома ёнксом!" - истямо лем ало ютакшность минек покш кенярксчинек, конат алтазельть вечкевикс чачома ёнксонок туртов, райононь чачома чинтень. Сындест пек келейстэ сёрмадозель "Восходонь" эрзянь лопасонть ды республикань прессасонтькак.
Кувать можна ёвтнемс весе сеть эрзянь мероприятиятнеде, конат ютавтозельть 30 иень перть. А весть монень макснесть истямо кевкстема: янксян а янксян, мекс зяро иеть, шка ды вийть максынь те тевентень. Апак кавтолдо мерян: а янксян. Монень те шкась ульнесь шкинемань (творчествань) шкакс. Тонавтнесть эйкакштнэ, тонавтнинь мартост вейсэ монськак. Зяро эрьва мезе теезель: стихть, морот, ёвкст, ёвтнемат, ёвтамот, сценарийть, конат совасть "Мельстуиця эрзянь кель" книгазон, печатазельть минек газетасонть, "Чилисема", "Сятко", "Народное образование РМ" журналтнэсэ, зяро раськень койть невтезельть, зяро эрзянь оршамот стазельть, конатнесэ оршазельть эйкакшонок, конат невтсть эрзянь мазычинть сцена лангсто! Зяро кенярксчи кандсть неть тевтне монень, ды, арсян, лиятнененьгак. Кеман, минек ловныцятне нейсть: эрзянь келесь районсонок ульнесь.
Минек важодемась ульнесь лиянень невтемакс. Ламоксть теде кортасть тень лия райононь ды мик Саранск ошонь тонавтыцятне ды культурасо важодицятне – сынь ламос эрзянь келенть кувалма тонавтнесть минек пельде. Содан, ламо асатыкстнэдеяк. Ансяк мон течи кортан аволь сындест ды сынст витемадост.
Вандынь чиденть арсемат
Карми а карми тиринь келенек, культуранок вандынь чизэ?
Тенень эрявить ламо тувталт (причинат), ды, васняяк, обществасонок сынст эрявиксчист. Неть вельмевтемань колоньгемень иетнень перть пек ламо теезь литературасонть, морамонь культурасонть, раськень оршамонь невтемасонть, койтнень-кирдатнень ванстомасонть ды лиясо мейсэ. Ломантнень кепедевсь раськень ёжост. Ванодо, кода ваньксстэ кортыть эрзякс од ломантне, конат важодить эрзянь СМИтнесэ! Ней республикасонок ютнить мероприятият ванькс эрзянь кельсэяк, конат икеле арасельть. Од ломаненек ней мик тонавтнить тееме раськень оршамопельтькак кезэрень лувсо. Чувтосто керсемась – эрзянь цёраломанень кедьтевесь кепедевсь пек сэрей тёкшос. Кодат мазый морот теезь ды моразь меельце шкатнестэ эрзякс! Ды ламо, мезе лия.
А кадовить ве ёно эрзянь раськень тевтнеде минек райононь ломантнеяк, ды те кепети мель.
Арсян, эрзятне чарькодьсызь: масторпрявтнэ полавтневить, ансяк минек малавиксэнек – покштянок-сырькаенек инепокштяст, инеаваст эрьва ломанентень свал кадовить аполавтовицякс. Сынь жо ульнесть эрзят. Сынь кадсть миненек истямо покш сюпавчи ды питнейчи – тиринь келенек, культуранок! Кода тень, сехте малавиксэнть ды сехте тиринсенть ёмавтомс!? Кеман одтнэнь превейчист ды раськень ёжост лангс. Сынь а макссызь ёмавтомс.
Интернетэнь сайтнэсэ теевсь "моднойкс" весемесь алкуксонь эрзянсесь ды мокшонсесь. Сыця шканок ашти од ломаненек эйстэ. Минек поколениясь теизе эсензэ путовксонзо келень ды культурань вельмевтемантень. Одтнэнень сонзэ поладома. Ней те важодемась парсте невтеви Интернетсэ эрзянь кужотнесэ (группат, сообществат).
Кеман, минек тевтне кадсть валдо тешкс эрзянь ломантнень ойметнес. Парсте содан, сынст лезэст невтемга покш путовксозо "Восходонть". Газетась парсте невтсь минек райононть эрзянь ёнксонть эйсэ, сон свал путсь мель раськень тевтненень.
Мон, арсян, те пек виде, ды истя эрявияк теемс.