Сундерьковонь 27-це чистэ тусь эрямосто Александр Степанович Лузгин - историянь наукань докторось, этнографось, эрзянь ды мокшонь раськетнень регионъютконь вейсэндявксонь Исполкомонь прявтось, икелень шкань МР-нь печатень ды кулянь министрась, МР-нь раськень политикань министрась. Туи ломанесь тоначив, кадовить мельганзо сонзэ паро тевензэ. Парось зярдояк а стувтови.

А. С. Лузгинэнь карминь содамонзо, зярдо ульнинь 2004 иестэнть финно-угрань раськетнень 4-це Конгрессэнть, кона ютась Эстононь масторсо. Сестэ мон ламонь Мордовиянь 40 делегатнэнь ютксто а содылиньгак. Ансяк мейлеяк, эрзянь тевтнесэ, ламоксть сонзэ марто вастневинек.

Александр Степановичень лездамонзо кувалма кучнымизь 2005 иестэ "Равось – ояксчинь лей" этнокультурной экспедициянтень, мезень кис нейгак покш мельспаросан.

Вастневинек эрьва кодат эрзянь ды мокшонь съездэнь, лия тевень ютавтоматнесэ. Зяро-бути иеть совакшнынь исполкомонь составс, ды тосояк савкшнось вастневемс. Сон максызе тень раськень театрань сценанть лангсо "Гордость нации" тешксэнть…

Ансяк неть весе вастовоматне ульнесть, кода мерить, официальнойть. Сынст эйстэ ломанесь обуцянь коряс а содави.

Весть, минек Покш Игнатбуестэ делегация кучокшность Чувашияв "АРТА" раськеъютконь фестивалев (сон минек Раськень Озкс покшчинть кондямо). Ансяк, мекс-бути лиссь истя, минь сынек а шкастонзо, кенярксчись карми ютамо омбоце чистэнть. Лиятне мекев тусть Игнатвелев, мерсть сыть таго ванды. Монь кадымизь. Савсь удомс Порецень буень Аловелесэ пек паро эрзянь ломантнень кедьсэ. Фестивалесь ютась пек вадрясто. Эрзятнеде башка тосольть ламо лия раськень ломантькак. "Артань" концертсэнть монгак морынь эсень морон. Пек парсте каванимизь. Ансяк свал талновсь эйсэнь мелявкс-арсема, кода ней пачкодян мекев кудов. Лиятне, кода алтасть, эзть са. Сельмень икелев понгсь Лузгин. Кевкстия, паряк, сынь кармить Саранскоев ардомо Игнатвеле ланга. Сон арсезевсь ды кармавтызе шофёронть ветямс машинанть минек ёнкска молиця кинть ланга. Мелявксом ёмась…

Валдо ледстнемакс кадовозо тонь леметь, Александр Степанович, весе эрзятнень ды мокшотнень ойметнес, сеть ломатнень мельс ды превс, конат содатадызь тонь, чевте седей ломань!