Неень шкасто сон виевстэ важоди аволь ансяк сюротнень видеманть-кастоманть коряс, тесэ свалшкане ульнесь сюракшов ракшань трямонь фермаяк, конась иестэ иес касы-виевгады, ды важодемасояк нолдавить неень шкань од технологиятне.
Кода тешкстась Владимир Кабаев, неень шкасто сынст трявить-кирдевить 1200 ламо сюракшов ракшат, эйстэст 552 – потявтовиця скалт.
– Меельце шкастонть предприятиясонтькак ды фермасояк лиссть редявикс полавтомат. Васняяк тесэ ёвтама производствань одкстомтоматнень. Важодемасо келейстэ нолдавить неень шкань технологиятне, конатне тевентькак седе шождалгавтыть, ёмавкстнэньгак аламолгавтыть. Неень шкасто тентеме кодаяк, – корты Владимир Юрьевич. – Тень эйстэ ашти целанек предприятиянть роботазо. Ды бути ломантненень теемс важодемань вадря условият, тевесь эдь овсе лиякс туи, седе парсте.
Истя, 2018 иестэ Кабаевнень максозель "Семейная ферма" грантось. Неть ярмактнень лангс стявтозель 200 таркас скалонь кирдема ферма.
Покш робота теезель ютазь иестэ. Фермасонть стявтовсть зярыя од объектт: вазонь кардо, сюракшов ракшатнень андомань туртов тарка (600 пряс), кизэнь шкань калда ды склад.
– Те иестэ вадрялгавтсынек кизэнь шкасто скалтнэнь кирдема тарканть. Истя жо покш арсеманок теемс тинге ланго. Теке марто неень шкасто ракшатне минек кирдевить содозь. Те лувонть аламонь-аламонь эряви кадомс. Секскак ушодынек ракшатнень туртов 400 таркас кардонть тееме, косо скалтнэ кармить кирдевеме апак содо, – корты Владимир Кабаев. – Скалтнэнь арсеви ламолгавтомс 2000 пряс. Ды теемс ловсонь эштё вейке комплекс. Тень лангсо важодтяно. Арсетяно, весемесь лиси.
Олег Петрович Жигачев В. Ю. Кабаевень КФХ-со важоди ловсонь-товарной фермань прявтокс. Хозяйствасонть труди уш зярыя иеть, ферманть прявтсо жо аволь умок, кавтошка ие. Сонзэ вановт ало роботыть малав колоньгемень ломанть, кемгавтовотне эйстэст – скалонь потявтыцят, эли кода ней сынст лемдить, операторт. Истя жо улить вишка ваз мельга якицят, слесарть, ракшатнень мельга якицят.
– Мон хозяйствасонть важодян аволь пек умок, – корты Олег Петрович. – Васень шкасто ракшатнень мельга якицякс ульнинь. Мейле прявтонок Владимир Юрьевич кортась мартон варчамс вийтнень МТФ-нь прявтонь таркасонть, истя тесэ ушодыньгак. Ней минек фермасонть лововить 552 потявтовиця скалт. Эрьва потявтыцянть мельга кемекстазь 60–65 скалт. Чизэнзэ саеви малав 15 тоннат ловсо, эрьва скалось максы малав 24 литрат. Бути саемс ютазь иень невтематнень, вейке скалонть лангс лиссь 7847 кг ловсо. Невтематне а берянть.
Ловсонть хозяйстванть кедьстэ рами Саранск ошонь "Данон" ловсонь комбинатось. Тосо уш сонзэ эйстэ тееви эрьва кодамо продукция – йогуртт, велькс, топо ды ламо лия мезе.
Жигачевонь валонзо коряс, Кабаев прявтось чарькодиця ды теи весементь эсь важодицятнень лезэс. Секскак, кодамо мелявкс марто тензэ иля пшкаде, весементь куроксто решасы, весементь коряс лезды.
Ольга Николаевна Курченкова КФХ-нь фермасо важоди скалонь потявтыцякс. Авась тескень, Вармазейкань. Велень хозяйствасо важоди уш зярыя иеть. Тевензэ вечксы. Рана валске, зярдо велень эрицятне кудонь тевтнескак кундасть эштё аволь весе, Ольга Курченкова уш фермасо. Ванкшны – весе-аволь ракшатне таркасост, кода анокстазь потявтомань оборудованиясь, кортни скалтнэнь марто. Ды истя теи уш зярыя иетнень перть.
– Школанть прядомадо мейле тонавтнинь Кемлянь совхоз-техникумсонть "Бухгалтер, экономист, делопроизводитель" специальностенть коряс. Профессиясонть тень важодемс савсь а кувать, ушодокшнынь эсенек райононь Новокачаевань колхозсонть, – ёвтни Ольга Николаевна. – Колхозось каладсь, мон туинь Московов. Ардтнинь тов сисем иеть. Мейле эйкакшом чачсь, ве ёнов ардтнеманть кадыя. Весть Владимир Юрьевич пшкадсь тень зярыя чис лисемс скалонь потявтыцякс. Эйкакшонтень ульнесь пельие. Лисинь кавто недляс, кадовинь жо кемгавтово иес. Зяро иеть тесэ роботан ды вестькак эзинь янксезевкшне. Эсь тевем вечкса. Пек парт тесэнь важодицятне. Минь весементь тейтяно вейке-вейкенень лездазь, вейке-вейкень чарькодезь. Вейсэнь тевсэ те пек эрявикс ёнкс.
Мартонзо истя жо скалонь потявтыцякс важоди Валентина Александровна Гайдукова. Авась истя жо тескень. Кемлянь совхоз-техникумонть "Агрономия" специальностенть коряс прядомадо мейле эсь важодема кинзэ ушодокшнызе Вармазейкань "Дружба" колхозсо, мейле роботась райононь зверофермасонть, варчнизе пидицянь-паницянь тевенть. Мельс тензэ эзь туе. Вете иеде икеле пшкадсь Владимир Юрьевичнень, тонась саизе скалонь потявтыцякс. Те тевсэнть покш мельсэ роботыяк. Кода корты сонсь Валентина Александровна, вете иетне аволь ютасть, ливтязь ливтясть.
– Неть вете иетне тень овсе эзть марявояк. Мерят, овсе аволь умок сынь. Роботась тень пек вечкеви. Мекс бу а роботамс, бути ули косо ды тень кисэ пандыть вадря зарплата, – кемексты Валентина Гайдукова.
Анастасия Павловна Учаева В. Ю. Кабаевень кедьсэ истя жо важоди скалонь потявтыцякс. Тейтерь-авась Покш Игнатовань, тесэ роботы омбоце ие.
– Минек эрьва чистэ важодема таркав ды мекев кудов ускси машина. Тень коряс кодаткак мелявкст арасть. Валске важодеманок ушодови 5 чассто, чокшне истя жо. Мон ловован скалонь потявтыцятнень полавтыцякс. Лиякс меремс, роботан сестэ, зярдо кияк саи оймсема чи, – ёвтни Анастасия Учаева.
Авась, кода ламот лиятнеяк, важодемасо эсь уцясканть варчнизе Московсо. Ардтнесь тов зярыя иеть, роботась истя жо колхозсо скалонь потявтыцякс. Мейле чачсь эйкакшозо ды кадовсь эрямо тиринь Игнатбуесэ. Важодемадо а пели, секскак тевгак эстензэ мусь апак мелявто.
А вана Алексей Михайлович Козляков хозяйствасонть од специалист. Роботы прявт зоотехникекс.
– Монь вановт ало ракшатнень андомась, кирдемась ды технической лия кевкстематне. Роботась вечкеви, пек вадрят условиятне. Сехте прявтось жо – монь туртов те пек покш опыт. Ули эштё мезес тонавтнемс, – корты цёрась.
Улить Кабаевень КФХ-со скалонь ваныцяткак. Хозяйствасонть колмо стадат. Эряви меремс, истямо лувось ванстовсь пек аламот хозяйстватнесэ. Зярдо ульнинек фермерэнть кедьсэ, вейке стаданть вансть Од Чамза веленть маласо. Скалонь ваныцятне Евгений Михайлович Каляков ды Александр Григорьевич Марюшкин вансть вазтнэнь. Стадасонть ульнесть 167 вазт. Кода тешкстасть цёратне, сынст важодемань чист ушодови валскень 7 чассто ды таргави чокшнень 7 частнэс. Мейле ракшатне паневить аволь васоло аштиця калдантень. Эряви меремс, скалонь ваныцянь тевесь а шождатнестэ. Пертьпельксэсь прянзо эрьва ёндо теть невтьсы – чиськак пидетянзат вадрясто, пиземетнеяк вакска а ютатадызь, варматнеяк весе тонть. Варчасак эрьва мезенть. Ансяк цёратнень те а тандавты. Сынь весемесэнть ансяк вадря ёнкст вешнить. Васняяк, сельмест икеле пертьпельксэсь эрьва чистэ панжови од ёндо. Кода тень каршо молят. Романтикть!