Тесэ эрить инжень вечкицят ды талантливой ломанть, конат кирдить эсест превсэ ютазь шканть ды ванстыть покштяст-бабаст кезэрень шкань культуранть.
Сынь аволь ансяк ванстыть икелень шкань культуранть, сынь кандыть сонзэ од поколениятнень туртов.
Ламо мезесь Андрейвелень эрицятнень туртов неень шкастонть полавтовсь. Секс, паряк, седеяк питнеекс тенек марявить сеть койтне, конат ванстовсть. Невтемга, сайсынек Андрейвелесэ ютавтовиця эрзянь свадьбань коенть. Те шкас ванстовсть кезэрень свадьбань пельксэнзэ ютавтомась. Свадьбадо икеле урьвакстыця цёранть ды мирденень лисиця тейтеренть раськестэ (роднясто) уряжтнэ мазый оршамосо ёвлемань наряжазь палка марто якить кудосто кудос весе раськеванть ды тердить весень свадьбав.
Истяжо икелень шканть ладсо ютавтови одирьвань рамамо коесь. Сон ушодови урьвакстыцянть кудонзо вакссто, косо пурнавозтне морыть"Стойбоцька" моронть. Те моросонть чанстяви (баславави) шнави свадьбась, покшчинтень анокстазь ярсамопелесь (кшись-салось), симемапельтне пуресь-брагась, паронь арсемань валт ёвтневить чачиця од семиянть туртов. Седе тов, цёранть тетянзо ды аванзо баславамост мейле, колмо кудаватне (свахатне), женихесь уредевенть марто, од ломантне ды урьвакстыцянть ёндо роднясь молить одирьвань кудонтень.
Пек мазыйть свадьбань оршамосо свахатне молить лиятнеде икеле. Васенценть кедьсэ сехте эрявикс свадьбань атрибутось - шумбра СВАХАНЬ ПРЯКА. Свахань прякань панемантень алтави башка кой. Омбоце сваханть кедьсэ ПАЗАВА, конасонть мейле кармить баславазь од семиянь теицятне: урьвакстыцясь ды мирденень лисицясь. Те шкане одирьванть кудонзо кустемпесэ роднясь учи цёранть ёндо кудатнень. Сынь ушодыть морамо "Кудат сыть" свадьбань моронть. Сон ёвтни седе, кодат мазыйть ды мельвановикст сыцят инжетне. Вана кудатне пачкодсть одирьванть кустембес. Васенцекс молицясь, прявт кудавась-свахась ушодсазо "Свахань моронть". Сон ёвтни, кода, окойники пачкодсь те покш ды сюпав кудонтень, косо эри сехте мазый тейтересь.
Каванямодонть ды одирьвань рамамонь койденть мейле свахатне цёранть ды уредевенть марто совить тейтеренть кудос, косо поладовить свахань моротне. Сынь ёвтнить, кодамо чевте седей ды паро ломанть тесэ эриця сватнэ. Одирьвань авантень казить свадьбань пряка, сынсь жо морыть, кода манявсь одирьвань авась, кона свадьбань пряканть лангс миизе тейтерензэ. Тейтерень рамамо койденть мейле, авась баславасазо тейтерензэ мирденень лисемантень. Одирьванть ялаксонзо сайсызь патяст кедте ды макссызь урьвакстыцянтень.
Седе мейле весе молить ЗАГСов. Свахатне весементь ютавтомсто аштить свал одтнэнь вакссо, сынь ветясызь цёранть ды тейтеренть женихень кудос, косо макссызь сынст баславамс вастыцятненень - цёранть тетянзо-аванзо туртов.
Ней ламот одирьвань урнемань валтнэ стувтовсть, ансяк свахань моротнень Андрейвелесэ ламот помнясызь, ды те пек кенярдовты. Свадьбань коесь ды сонзэ ютавтомань позиясь - пек питней материал, конань эряви ванстомс, кандомс сыця шкас ды максомс од поколениянь ломантненень.
Сон содасы тиринь раськень фольклоронть
Кезээрень койтнень-кирдатнень содыцякс ды ванстыцякс минь ловтано Учаев Валериень. Вишка пингстэ саезь сонзэ мельс пек тукшность велень эрямонь койтне, историясь, конатнеде содась бабанзо ды лия сыре ломантнень пельде. Мейле, зярдо сон совась ды кармась морамо "Аннушка" велень фольклорной ансамблясонть, Валерий куроксто теевсь тосо пек эрявикс морыцякс ды содамочинь кандыцякс. Шкань ютазь сон путовтызе морамо куронтень "Истоки" лементь.
Зярдо Валерий Викторович теевсь ансамблянь прявтокс, сон седеяк парсте кармась пурнамо икелень шкань моротнень, урнематнень, лайшематнень, явсь мель содамс Андрейвелень ды лия веленьгак эрзянь койтнень-кирдатнень. Сонзэ прявт ало морокурось аволь весть теевкшнесь "Шумбрат, Мордовия!" художественной творчествань республиканской фестивалень Лауреатокс.
Валерий пек ёроков кедь-суров ломань: сонсь кроясь ды стась ансамблянь участниктненень оршамот концертс. Парсте машты штердеме ды кодамо-сюлмамо. Сонзэ кардазозо пешксе эрьва кодамо скотинадо. Тесэ улить скал, реветь, тувот, саразт ды куркат. Пиресэнзэяк те цёраломаненть касыть эрьва кодат эмежть. Видьстэ меремс, весемесь истя, кода ульнесь икелень шкатнестэ.
Школань прядомадо мейле, цёрась важодсь "Заря" колхозсонть, мейле служась армиясо. Армиядо мейле, истя лиссь эрямось, алтызе эсь прянзо пазонтень служамонтень. Шкань арасьчинть лангс апак вано, Валерий эзизе кадно тиринь раськень фольклоронть. Сонензэ сеедьстэ сакшныть превспутомань мельга культурань роботниктне, велень эрицятне, Саранскоень Л.П.Кирюковонь лемсэ музыкальной училищань студентнэ. Сакшныть кезэрень моротнень сёрмадомо, кунсоломс сеть моротнень истямо лувсо, кодамосо моры сынст Валерий ды "Истоки" ансамблясь. Минь жо аштетяно покш мельспаросо: велесэнек эрить истят питней ломанть, конат содасызь, путыть тензэ алкуксонь питне ды ванстыть тиринь раськенек сюпавчинть - эрзянь фольклоронть.
Кенярдстовты минек се тувталоськак: неень шкань од ломантнеяк явить мель ды сыретнень марто вейсэ паро мельсэ невтнить кезэрень койтнень сцена лангсо. Минек вейсэнь тевенек - а стувтомс, пурнамс ды ванстамс икелень шкань эрицятнень сюпав фольклоронть ды пачтямс сонзэ эсенек эйкакштненень ды нуцькатненень. Фольклорось, тиринь келесь - раськенек оймезэ, сонзэ историязо. Ванстомс сынст - ванстомс раськенек оймень сюпавчинзэ.