Тедеде топодсть 31 иеть, кода сказительницась тусь юткстонок тов, косо, кода мерсь Числав Журавлёв эрзянь поэтэсь, "косо азор Шкась". Серафима Марковна Люлякина - эрзянь содавикс моронь ёвксонь, валморонь, ёвтамонь ды налксемань ладсиця. Сон тиринь кельсэ зярыя книгань автор. Сонзэ книгатнень ловныть покштнэяк ды вишкатнеяк. С.М.Люлякинань ламо сёрмадовксонзо совавтозь тиринь келень коряс тонавтнемань книгатнескак.

Эрямо шкастонзо Серафима Марковна вастневсь ламо велень ды ошонь ломантнень марто, аволь ансяк Мордовия Республикасо, косо сон эрясь 11 иеть, Россиянь лия регионтнэваяк, косо эрить эрзятне ды мокшотне. Вастневсь школань тонавтницятнень ды тонавтыцятнень марто, морсесь тенст эсензэ моротнень, ловнось валморот, содавтсь весень эсензэ шкинеманть марто, эрзянь раськенть культуранзо марто.

Неть седейшкавань вастовоматне кадовсть ломанень ойметнес лембе ледстнемакс. Серафима Марковнань пек вечксызь эрзятне.

Сакшнось сон минек велескак, Покш Игнатвелень школаскак.

Пек вечкевсь Серафима Марковна Люлякина Мордовия Республикань Покш Игнатовань ломантненень, школань тонавтницятненень ды тонавтыцятненень, конатнень марто вастневсь эрямошкастонзо. Ламот юткстост сёрмалесть сёрмат вечкевикс Марковнанень, теевсть тензэ алкуксонь ялгакс. Сынь ванстыть Люлякинань сёрматнень, книгатнень ды лият казнензэ. Велесэнек эрьва иестэ ютавтневильть С. М. Люлякинань ледстямонь концертт, косо морсевильть Серафима Марковнань моротне, ёвтневильть сонзэ валморотне, налксевильть налксематне. Минек райононь газетась паро мельсэ свал сёрмалиль неть ледстямонь тевтнеде.

Тедеде топодсть 30 иеть Мордовиянь ГТРК "Сияжар" каналсонть Покш Игнатвелень школасонть снимазь фильмантень, кона алтазель Люлякинань куломадо мейле вейке иень ютамонтень. Колоньгемень иень перть сонзэ интернетстэ ванызь ламо тёжат ломанть.