11 октябрьыште У Торъял тӱвыра да каныме рӱдер Морко район гыч уна-влакым вашлие. Тиде кечын Марий Эл Республикын Тӱвыра, печать да калык-влакын пашашт шотышто министерствын да Калык усталык рӱдерын темлымыж почеш Марий Эл Республикын 100 ийжылан пӧлеклалтше "Юбилейный экспресс" фестиваль почылтын. У Торъял кундемлан фестивальын икымше участникшым - Морко кундемын эн талантан да виян мурышо да куштышо коллектив, исполнитель-влакым - вашлияш пиал шыргыжалын.
Фестивальын тӱҥ цельже - Марий Элысе калыкын икоян улмыжым пеҥгыдемдаш, тӱвыражым арален кодаш, тудым кушкын толшо тукымлан умбакыже шуяш, кугыжаныш да муниципал кучемын общественный ушем-влак дене вашкылым пеҥгыдемдаш.
У Торъял тӱвыра пашаеҥ-влак Морко районысо шке коллегыштым шокшын вашлийыч. Морко районысо "Калинка" куштышо коллектив У Торъял тӱвыра да каныме рӱдер пелен улшо "Линкс" ден "Грация" куштышо коллектив дене Морко куштымаш мастер-классым эртарен. У Торъял тӱвыра да каныме рӱдерыште тӱвыра пашаеҥ-влаклан марий тӱрым тӱрлымаш дене мастер-класс эртен. В.Лазарев лӱмеш академический хор У Торъял районысо ветеран хор дене вашлийын, шке масталыкше дене палдарен.
Кастене районысо тӱвыра да каныме рӱдерыш "Морко велын мурсемже" лӱман концертыш калык лыҥак погынен.
Тӱвыра, печать да калык-влакын пашашт шотышто министрын алмаштышыже М.И. Матвеев фестивальын кӱлешлыкше нерген палемдыш:
- Шушаш ийын республикына 100 ияш лӱмгечыжым палемдаш тӱҥалеш. Тиде марий калыкнан кугу пайремже. 100 ий ончыч марий калыклан автономийым пуэныт. Ме таче тӱвыра нерген ойлена гын, марий калыкын тӱвыраже вияҥын толеш: радио марла кутыра, телевиденийыште, ӱшаныме шуэш, утларак да утларак марий передаче-влак лийыт. Тӱвыра пӧртлаште гын, ме куанен ойлен кертына, ятыр мастар коллектив пашам ышта. Арам огыл, очыни, Торъял кундемыш Морко кундем гыч толыныт. Торъял кундем шуко талантан, творческий шӱлышан еҥ-влакым шочыктен, Морко кундемат талантан еҥ-влаклан поян.
Михаил Иванович У Торъял районлан пӧлек шотеш МарНИИЯЛИ-н лукмо марий калыкын историйжым, тӱвыражым радамлыше "Марийцы" книгажым пӧлеклыш.
У Торъял муниципал кундемым вуйлатыше Е.В. Небогатиков Морко районын делегацийжылан У Торъял районын 95 ияш лӱмгечыжлан пӧлеклалтше альбом ден дискым пӧлек шотеш кучыктыш.
Морко кундемын эн виян да талантан мурызо, куштызо коллектив да исполнитель-влакын мастарлыкыштым ончаш шуко калык погынен. Ончаш толшо-влакым калык лӱмым нумалше "Морко кундем" мурышо ансамбль, "Рвезылык" куштышо ансамбль, В.Лазарев лӱмеш академический хор, "Куан памаш" мурышо ансамль да шуко молат куандареныт. Кажне выступленийыштым шокшо кидсовыш дене вашлийыныт.
"Юбилейный экспресс" республиканский фестивальым У Торъял район умбакыже шуя. Тӱвыра да каныме рӱдер вуйлатышын алмаштышыже Р.С. Соколован мутшо почеш, 21 октябрьыште районысо тӱвыра пашаеҥ-влак шке мастарлыкыштым Советский посёлкышто ончыкташ тӱҥалыт. У Торъял книгагудо пашаеҥ-влак "Шочмо эл гыч кугу Россий дек" виртуальный экскурсийым эртарат. Тӱвыра да каныме рӱдер ветеран-влак ушем дене пырля "Совет Ушемын Геройжо А.Н. Громов - кок районын геройжо" лӱман шарнымаш касым эртара. Н.Н. Михеева ден Т.Н. Бажанова калык прикладной творчество дене мастер-классым ончыкташ тӱҥалыт. Эрик Сапаевлан пӧлеклалтше изирак выступленийым У Торъял йоча сымыктыш школ ямдыла.
"Я здесь живу, и край мне этот дорог". Тыгай лӱман тематический концерт дене У Торъял районысо самодеятельный коллектив ден солист-влак Советский районысо зритель-влак ончылно шке мастарлыкыштым ончыкташ тӱҥалыт. "Линкс", "Грация" куштышо коллектив-влак, Тошто Торъял тӱвыра пӧрт пеленсе "Ший оҥгыр" фольклор ансамбль, солист-влак Наталья Жаворонкова, Елена Желонкина, Сергей Мухин, Аня Ельмекеева, Э. Сапаев лӱмеш йоча сымыктыш школын туныктышо коллективше, Токтарсола гыч йоча вокальный ансамбль ончышо-влакым куандараш тӱҥалыт. А тиддеч ончыч зритель-влаклан "У Торъяллан - 95 ий" документальный фильм темлалтеш.