Нылпиослы ужрадэз тунсыко карон понна воспитательёс уно пӧртэм ужрадъёс ортчытъяны тыршо. Кылсярысь, кыкетӥ сменалэн нимыз но ас бордаз кыскись — ​"Дунне вылтӥ 21 нунал куспын" ("Вокруг света за 21 день").

— Ми доры али 45 нылпи ветлэ, — ​шуэ лагерьлэн кивалтӥсез Мария Ивановна Горячёва. — ​Со 5-тӥ но 6-тӥ классын дышетскисьёс, пӧлазы 3-тӥ классысь нылпиос но вань. Соосын куинь воспитательёс ужало: Светлана Леонидовна Кириллова, Людмила Петровна Голикова но Ольга Петровна Орехова.

Та школаын азьвыл трос пӧртэм сменаос ортчылӥзы ни, пе, но соос радъямын вылэм ог порма.

— Ваньмыныз ӵош кене­шы­са, та сменаез ми мылкыд каримы мукет амалъя ортчытыны, малпамы тодматыны нылпиосты дуннеысь пӧртэм шаеръёсын, — ​вера Мария Ивановна. — ​Котькуд нуналмы милям сӥземын кунъёслы, кылсярысь, Россилэсь нуналзэ пусйыкумы ортчытомы дун чылкыт святойёслы Пётр но Февронилы сӥзем ужрадъёс, Грецилэн нуналаз луозы Олимпи шудонъёс но грек мифъёс, Японилэн нуналаз дышетскомы оригами но икебана сувениръёс лэсьтыны. Озьы ик луозы Африкалэн, Бразилилэн, Германилэн, Антарктидалэн нуналъёсыз. Нылпиослы но кельше нуналмысь нуналэ выль шаеръёс сярысь тодыны. Соос али ик тунсыкъясько, ку но мар дасяно шуыса. Нош лагерьмылэсь берпуметӥ нуналъёссэ сӥзёмы дуннеысь калыкъёслэн эшъяськемзылы но лэсьтомы тупаса улонлэсь символзэ.

Со сяна, лагере ветлӥсь нылпиос ужало на проектъёс бордын. Школа котырын котькуд класслэн вань аслаз сэрегез, кытын соос будэто пӧртэм пумо сяськаос. Ваньзы дэмен асьсэлэсь яратоно "кыкетӥ корказэс" шулдыргес карыны тыршо, чеберез адӟыса мылкыд но капчи луэ, шуо. Та ужрад мынэ ни трос аръёс ӵоже.

Туж умой радьямын нылпиосты сюдон но. Ӵукна соосты шумпотто йӧлын пӧрам сиёнъёсын - пӧртэм шыдъёсын но ӝукъёсын, нош нуназе бере нылпиос эшшо емышен куноясько.

— Кун бюджетысь милемлы юрттэт лыктэ, — ​шуэ лагерьлэн кивалтӥсез. — ​Со туж умой, ведь умой сюдӥськод ке, нылпиослэн мылкыдзы но капчи луэ, кужым но потэ.

Озьы тӥни Варзи-Ятчи школаын дышетскисьёслэн гужемзы туж тунсыко ортче, соос мӧзмыса ноку уг пуко.