Нош туннэ та синмаськымон нылкышноез мукет сямен усьтомы. Ёросысьтымы арлыдоос пӧлын со огез кужмоез но чырткемез спортсменка луэ. Берпуметӥез басьтэм данъетэз луиз пенсионеръёслэн Глазовын ортчем элькун спартакиадазылэн туй медалез. Алнаш нылкышноез спортысь мастеръёс гинэ азьпалтӥзы.

Татьяна Ильинична вордӥськемын Кузёбай гуртысь Мазитовъёслэн семьяязы. Спортэз пичи дырысеныз ке но гажаз, школаын ортчылэм ӵошатсконъёсы ӧз пыриськылы. Бызьылон мылкыдыз Ижкарысь медучилищеын дышетскыкуз пуромиз. Отын егит нылашлэсь быгатонлыкъёссэ соку ик синйылтӥзы. Студенткаез училищелэн сборнояз кутӥзы. Ӝог бызьылэм сяна, Татьяна кузьдалае тэтчанын но висъяськылӥз, нош ӝуждалае тэтчанын со кадь вылӥе тэтчисез ӧй вал. Куасэн но ӵошатсконъёсы пыриськылӥз.

Фельдшерлэсь дипломзэ басьтыса, нылмуртэз Алнаш больницае ужаны келязы. Соку ик ӝог юрттэт сётонъя отделение кутӥзы. Ужан нуналъёс кутскизы, семья кылдӥз, нылпиос вордскизы. Спортэн эшъяськонэз палэнэ кылиз. Нош куке пиосыз будӥзы, Татьяна Ильиничналэн пыдло ватэм мылкыдыз выльысь кыре куриськыны кутскиз. Табере берло дас аръёссэ со спортэн матысьгес эшъяське ни.

– Спортэн эшъяськон со мон понна — ​кыкетӥ улонэ. Бызьылӥсько ке, асме капчиен шӧдӥсько, тазалыке но юнгес луэ кадь потэ, — ​веранзэ азьланьтэ Татьяна Ильинична.

Нылкышно нунал ӵоже весь пыд йылаз берга, али со Алнашысь "СтомаЦентрын" тырше, собере дорысьтыз ужзэ быдэсъя, нош ӝытъёсы бызьылыны пота. Нюлэслы кыдёкын уг улы бере, отӥ ик кык-куинь котыр ортче. Собере гылтӥськыны ӵыпетэ ваське.

– Нырысь бызьылыны потакум ай, котькудӥз пумитам шедись мурт юа вал, кызьы, пе, Таня мылыд потэ на. Нош али дышизы ни кадь, — ​вера арлыдо спортсменка.

Паймоно та нылкышнолы. Сое косӥсез но ӧвӧл, туннэ бызьылӥд-а ни шуыса кылзэ юасез но ӧвӧл, со ачиз ас азяз куронъёс пуктэ но одно ик соосты быдэстыны тырше. Азьтэмъяськыса, чӧлтӥськыса уг улы. Ваньзэ рос-прос лэсьтэ.

Элькун спартакиадаын вормем нылкышно 21-тӥ гудырикошконэ Новосибирске мыныны дасяське, отын со бызьылонын, дартсын, кроссын, шашкаен шудонын ас кужымзэ мерталоз. Шаерысьтымы та ӵошатсконэ 8 пенсионеръёс пыриськозы.

– Али тани Удмуртимылэсь данзэ утьыны мынӥсько бере, бызьылонлы саклык тросгес висъяны тыршисько. Дыр шедьтӥсько, мылпотонэ но бадӟым, — ​шуэ нылкышно.

Анайзылэн спортэн эшъяськон мылкыдыз пиосызлы но пыӵаз. Кыксы но ӝог бызьыло, нош Виталий пиез пӧртэм ӵошатсконъёсы пыриськылэ, трос данъетъёсын пусйылэмын.

– Одӥг малпанэ быдэстытэк кылиз кадь потэ. Нылпиос но зол бызьыло вал бере, семьяос куспын ортчылӥсь ӵошатсконъёсын кужыммес эскероно вылэм. Вормисьёс радын одно ик ветлысалмы, дыр. Но малы ке кузпалы пумит вал. Та малпан туннэ но йырме висьытэ. Малы меда дырыз дыръя со сярысь юнгес ӧй малпаськы, — ​малпанзэ усьтэ Татьяна Ильинична.

Татьяна Михайловалэн бызьылон мылкыдыз нуналысь нуналэ юнма но юнма. Арлыдыз шоры учкытэк, ёросысьтымы егит кышномуртъёсты но ӵошатсконъёсын азьпалтыны быгатоз на.

Татьяна Ильиничналэн мукетыз шумпотон мугез — ​15-тӥ гудырикошконэ со аслэсьтыз 60 аресъем юбилейзэ пусъёз. Сӥзиськомы та задор мылкыдо, чырткем нылкышнолы тазалык, чиданлык но выль вормонъёс!